Nga Francisco Lirola Villegas, D-Cerca
Në operacionin “ABULA” të zhvilluar nga Guardia Civil e Almería-s në Spanjë, janë konfiskuar 300 kilogramë kanabis, me një vlerë më shumë se gjysmë milioni euro.
Operacioni ka zbuluar praninë e një karteli shqiptar të vendosur në Roquetas de Mar, me plantacione marihuane të shpërndara në Sierra de Los Filabres, duke gjetur një prej tyre në komunën e Felix dhe një tjetër në Las Tres Villas. Janë arrestuar tre nga anëtarët e tij, të akuzuar për krime kundër shëndetit publik dhe mashtrim me energjinë elektrike.
Plantacioni ishte i fshehur në një zonë të thellë me orografi të komplikuar dhe larg qendrave të mëdha të populluara, me akses të vështirë. Ai kishte masa të larta sigurie përreth, si kamera vëzhgimi dhe një gardh elektrik që mbulonte të gjithë sipërfaqen e mbjellë. Pasi aktiviteti policor u fokusua te grupi kriminal, u zbulua një plantacion i dytë në komunën e Felix, i cili kishte masa sigurie të ngjashme.
Operacioni u zhvillua në dy faza në mënyrë të njëkohshme. U krye hyrja dhe kontrolli i tre banesave dhe arrestimi i tre personave; gjithashtu u lokalizua një ndërtim nëntokësor, i cili po përgatitej për një plantacion të brendshëm, ku u gjetën llamba LED me fuqinë e lartë, qese me substrakt për bimë, si dhe materiale të ndryshme të nevojshme për këtë lloj kultivimi.
Plantacionet ndodheshin në zona me terren shumë të pjerrët dhe me diferencë lartësie të konsiderueshme, gjë që e vështirësonte operacionin e nxjerrjes. Për këtë, ishte e nevojshme mbështetja logjistike e Shërbimit Ajror të Guardia Civil (SAER), për të nxjerrë bimët duke përdorur një ankorim të pezulluar, ku lidhnin qese me kapacitet 1000 litra. Gjatë operacionit, agjentët konfiskuan 300 kilogramë kanabis, me një vlerë mbi gjysmë milioni euro.
Hetimet zbuluan ekzistencën e një organizate ndërkombëtare, duke identifikuar një rrjet kriminal me origjinë shqiptare, të vendosur në Roquetas de Mar dhe të lidhur me trafikimin e drogës. Anëtarët e tij kishin një nivel të lartë profesionalizimi ndërkombëtar dhe tashmë ishin dënuar për veprime të ngjashme në vende si Mbretëria e Bashkuar dhe Kosova.
Në zhvillimin e këtij operacioni morën pjesë Njësitë territoriale, Njësia e Sigurisë së Qytetarit, Shërbimi Kinologjik dhe Njësia e Shërbimeve e Komandës, e cila gjithashtu ka pasur mbështetjen e Shërbimit Ajror të Guardia Civil (SAER).
Si rezultat përfundimtar, Guardia Civil e Komandës së Almería-s ka arrestuar tre persona për krim kundër shëndetit publik dhe mashtrim të energjisë elektrike, duke konfiskuar 300 kg kanabis me një vlerë mbi 500.000 euro, si dhe materiale të ndryshme të nevojshme për kultivimin e tij. Personat e arrestuar janë vënë në dispozicion të Gjykatës së Shkallës së Parë të provincës Almería.