Trump kundër njohjes së Palestinës: “Një shpërblim për Hamasin”

Presidenti i SHBA-së, Donald Trump, ka reaguar ashpër ndaj përpjekjeve ndërkombëtare për njohjen e shtetit palestinez, duke e cilësuar këtë si një “shpërblim për Hamasin”. Deklarata u bë publike nga zëdhënësja e Shtëpisë së Bardhë, Karoline Leavitt, e cila konfirmoi se Trump do të adresojë këtë çështje në fjalimin e tij nesër në Asamblenë e Përgjithshme të Kombeve të Bashkuara. “Presidenti Trump do t’u kujtojë atyre vendeve se këto janë vetëm fjalë, jo veprime konkrete,” tha Leavitt, duke iu referuar shteteve si Franca që kanë shprehur mbështetje për shtetësinë palestineze. Fjalimi i Trump pritet të përqendrohet në qëndrimin e SHBA ndaj Lindjes së Mesme dhe rolin që Uashingtoni do të luajë në ruajtjen e stabilitetit në rajon, në një kohë tensionesh të rritura.