Aksionet evropiane kanë hyrë në atë që historikisht është periudha më e dobët e vitit për tregjet – muajt gusht dhe shtator. Të dhënat e dekadave të fundit tregojnë se gushti sjell vazhdimisht kthime negative për indeksin e aksioneve në të gjithë kontinentin, duke reflektuar një ndjeshmëri të shtuar ndaj zhvillimeve ekonomike dhe gjeopolitike, si dhe një reduktim të likuiditetit për shkak të pushimeve verore.
Historikisht, gushti është muaji më i dobët për EURO STOXX 50, indeksin referues të aksioneve më të mëdha evropiane, me një rënie mesatare prej 1.66% gjatë 30 viteve të fundit. Vetëm 43% e rasteve ka përfunduar në territor pozitiv, ndërsa STOXX Europe 600 ka rënë me një mesatare prej 0.7% në 24 vitet e fundit, po me një normë fitimi prej 43%. Gushti më i keq për tregjet erdhi në vitin 1998 kur EURO STOXX 50 ra me 14.4%, i ndjekur nga viti 2001 me një rënie prej 13.79%.
Edhe tregjet kombëtare e ndjekin këtë prirje. Indeksi DAX i Gjermanisë, një nga tregjet më të mëdha në Evropë, bie mesatarisht me 2.2% në gusht dhe shënon fitime vetëm 47% të kohës. CAC 40 i Francës bie me 1.47%, FTSE MIB i Italisë humb rreth 0.7%, ndërsa IBEX 35 i Spanjës ka një rënie mesatare prej 0.9% gjatë gushtit.
Disa nga korporatat më të mëdha gjermane janë veçanërisht të ekspozuara ndaj dobësisë sezonale të gushtit. Sipas të dhënave të TradingView, aksionet e Thyssenkrupp AG bien mesatarisht me 4.6%, me një normë fitimi prej vetëm 30%, që do të thotë se kanë përfunduar me fitim vetëm në 9 nga 30 gushtet e fundit. BMW AG humbet rreth 4.1%, Volkswagen AG bie me 3.3% dhe ka performuar pozitivisht në vetëm 27% të gushtit të viteve të analizuara. Deutsche Bank AG, huadhënësi më i madh i Gjermanisë, regjistron një rënie prej 3.47%, ndërsa E.ON SE, Siemens AG, Deutsche Börse AG dhe Beiersdorf AG shfaqin gjithashtu dobësi sezonale, me norma të ulëta fitimi dhe rënie të qëndrueshme.
Kjo rënie sezonale vjen pavarësisht një fillimi të fortë të vitit 2025 për tregjet evropiane. EURO STOXX 50 dhe STOXX 600 janë rritur përkatësisht me 8% dhe 7% deri tani, të nxitura nga një rimëkëmbje e gjerë pas presionit të tarifave të muajve të mëparshëm. Megjithatë, historia tregon se gushti shpesh shënon një kthesë negative në treg, veçanërisht për korporatat me kapital të madh në Gjermani.
Rënia sezonale e gushtit është një model i qëndrueshëm që nuk mund të anashkalohet. Me vëllime më të ulëta tregtare, likuiditet të dobët dhe një ndjeshmëri të lartë ndaj lajmeve negative, investitorët përballen me një sfidë të vërtetë në këtë muaj. Ndërkohë që asnjë trend sezonal nuk garanton rezultatet e ardhshme, gushti mbetet sipas shumë analizave, muaji më i rrezikshëm për investitorët në tregjet evropiane të aksioneve.