Në një moment të ngarkuar politikisht për opozitën në Turqi, Partia Republikane Popullore (CHP) rizgjodhi Özgür Özel-in si kryetar të saj për herë të dytë gjatë Asamblesë së Përgjithshme të Jashtëzakonshme të mbajtur këtë të diel në Ankara. Özel mori një mbështetje të gjerë nga delegatët, duke siguruar 1171 nga 1276 vota.
Procesi zgjedhor u bë më i qartë pas tërheqjes së kandidatit Ümit Uysal, kryetar i bashkisë së Muratpaşës në Antalya, si dhe dështimit të kandidaturës së Berhan Shimşek, ish-kryetar i CHP-së në Stamboll, për të siguruar mbështetjen e nevojshme të delegatëve.
Asambleja u zhvillua në sfondin e një vale goditjesh ndaj opozitës, përfshirë arrestimin e figurave të rëndësishme të CHP-së, si kryebashkiaku i Stambollit dhe kandidati presidencial i partisë, Ekrem İmamoğlu. Opozita ka denoncuar zhvillimet si një “grusht gjyqësor”, veçanërisht ditën e 19 marsit, kur İmamoğlu u burgos në Silivri, burg i njohur për çështje politike.
Qeveria turke, ndërkohë, vazhdon të mbrojë proceset ligjore, duke theksuar se “gjykatat funksionojnë në mënyrë të pavarur dhe të paanshme”.
Tensionet u thelluan më tej pas deklaratave të presidentit Recep Tayyip Erdoğan në kongresin e partisë së tij në Manisa, ku ai akuzoi CHP-në se kishte përjashtuar ish-kryetarin Kemal Kılıçdaroğlu përmes “një kongresi të errët”. Vetë Kılıçdaroğlu, i cili udhëhoqi partinë nga viti 2010 deri në 2023, ka bërë të ditur se nuk do të rikandidojë.
Për më tepër, Zyra e Prokurorit Publik të Ankarasë ka nisur një hetim lidhur me kongresin e nëntorit të kaluar, duke shqyrtuar pretendime për blerje votash përmes ofertave me para, telefona apo shtëpi për delegatët. Autoritetet kanë paralajmëruar marrjen në pyetje të zyrtarëve të përfshirë në Kongresin e 38-të të zakonshëm.
Deputeti i CHP-së, Oğuz Kaan Salıcı, ka njoftuar se do të propozojnë një “Listë Bilanci dhe Solidariteti” në përballje me listën e Özelit për Asamblenë e Partisë. Ai kërkoi mbështetje për një strukturë më të barabartë dhe përfshirëse brenda partisë.
Vetë Özel, në deklaratën e tij, tha se asambleja u thirr për të “parandaluar përpjekjet për të emëruar një administrues të besuar në CHP”, duke ftuar delegatët të mbronin vlerat e partisë përmes votës së tyre.