Constance Marten, 38 vjeçe, dhe Mark Gordon, 51 vjeç, u shpallën fajtorë për vrasje nga pakujdesia e rëndë ndaj foshnjës së tyre Victoria, më shumë se dy vjet pasi trupi i saj i dekompozuar u gjet në një çantë blerjesh në Brighton.
Vendimi i jurisë erdhi pas një rishqyrtimi të gjatë dhe kaotik në Gjykatën e Lartë të Londrës, të cilin gjykatësi e cilësoi si të përpjekur për t’u “sabotuar” nga çifti.
Prokuroria argumentoi se Marten dhe Gordon morën në mënyrë të vetëdijshme vendime që vunë në rrezik jetën e foshnjës, e cila sipas ekspertëve mendohet se vdiq nga hipotermia ose u mbyt gjatë fjetjes në një tendë të vogël dhe të papërshtatshme në kushte të ftohta dhe me lagështi, në janar të vitit 2023. Shkaku i saktë i vdekjes mbetet ende i paqartë.
Në një gjyq të mëparshëm, çifti ishte shpallur fajtor për fshehjen e lindjes, pengimin e drejtësisë dhe keqtrajtim ndaj fëmijës – akuza që nuk mund të bëheshin publike deri më tani. Tani, me dënimin për vrasje nga pakujdesia e rëndë, gjykata vendosi se sjellja e tyre ishte skajshmërisht e papërgjegjshme dhe larg standardeve të prindërve kompetentë.
Historia e çiftit tërhoqi vëmendjen publike vitin e kaluar, kur ata u zhdukën për 53 ditë pas zbulimit të një makine të djegur pranë Boltonit, ku kishte prova të një lindjeje të fundit. Marten dhe Gordon kishin katër fëmijë të tjerë të marrë më parë në kujdes nga shteti dhe besohet se u arratisën për të shmangur autoritetet dhe për të mbajtur foshnjën me çdo kusht.
Gjatë gjykimit, juria u njoh me të kaluarën e kontrastuar të çiftit: Marten vinte nga një familje e pasur dhe e privilegjuar, ndërsa Gordon ishte dënuar për përdhunim në SHBA në vitin 1989, kur ishte vetëm 14 vjeç. Ai kishte vuajtur 20 vite burg dhe më pas ishte deportuar në Mbretërinë e Bashkuar – një informacion që u bë publik vetëm gjatë rishqyrtimit të dytë të çështjes.
Gjatë gjyqeve, sjellja e çiftit ishte e trazuar dhe shpeshherë përçmuese ndaj autoriteteve gjyqësore. Ata nuk merrnin pjesë rregullisht në seanca, ishin të pasjellshëm me oficerët e gjykatës dhe ndërprisnin procedurat. Marten ka ndërruar 14 avokatë që nga fillimi i procesit.
Pas vendimit, prokurorja e lartë Jaswant Narwal tha se çifti nuk kishte treguar “asnjë pendesë” dhe përdori “çdo mjet për të penguar drejtësinë”, ndërsa prokurorja e qarkut të Londrës, Samantha Yellend, e quajti veprimin e tyre “të tmerrshëm” dhe të nxitur nga egoizmi.
Policia britanike i gjeti çiftin më 27 shkurt 2023, ndërsa trupi i foshnjës u zbulua dy ditë më vonë në një kasolle në zonën Hollingbury të Brightonit. Hetuesi kryesor i rastit, Detektiv Superintendent Lewis Basford, tha se vdekja e Victorias ishte “plotësisht e shmangshme” dhe se prindërit kishin pasur shumë mundësi për të kërkuar ndihmë.
“Si prind vetë, e kam të vështirë të kuptoj si dikush mund të zgjedhë të jetojë jashtë në kushte të ngrira në vend që të kujdeset për fëmijën e vet,” tha ai.
Dënimi përfundimtar për çiftin pritet të jepet në shtator./ BBC – Syri.Net