Ministri i Jashtëm ukrainas, Andrii Sybiha, ka bërë thirrje për më shumë presion ndërkombëtar ndaj Rusisë, duke theksuar nevojën për një marrëveshje paqeje të drejtë dhe të qëndrueshme. Komentet e tij erdhën gjatë një takimi me Sekretarin e Përgjithshëm të NATO-s, Mark Rutte, në Bruksel, ku po zhvillohen bisedime të nivelit të lartë mes ministrave të jashtëm të Aleancës.
“Rusia duhet të merret seriozisht me paqen,” deklaroi Sybiha, duke theksuar se Ukraina ka pranuar një propozim të SHBA për një armëpushim të përkohshëm 30-ditor pa kushte, por se Moska vazhdon të insistojë në kërkesa dhe kushte të njëanshme. “Tani është koha për diplomaci, por edhe për presion dhe frenim,” shtoi ai, duke paralajmëruar se Rusia përbën ende një kërcënim ekzistencial për Evropën.
Nga ana tjetër, Sekretari i Përgjithshëm i NATO-s, Mark Rutte, tha se çdo marrëveshje për paqe duhet të jetë “e qëndrueshme” dhe paralajmëroi për pasojat globale të rezultatit të kësaj lufte. “Kjo nuk është vetëm një luftë mes dy fqinjëve. Është një konflikt global,” deklaroi ai, duke përmendur aleancën e Rusisë me Kinën, Korenë e Veriut dhe Iranin.
Rutte theksoi gjithashtu se rezultati i luftës në Ukrainë do të ndiqet me vëmendje nga liderët botërorë, përfshirë presidentin kinez Xi Jinping. “Ai do të shikojë se kush do të dalë në krye – Rusia apo Perëndimi – dhe kjo do ta informojë në hapat e tij të ardhshëm në Indo-Paqësor,” tha ai.
Takimi i NATO-s në Bruksel, ku mori pjesë edhe Sekretari i Shtetit amerikan Marco Rubio, u përqendrua në gjetjen e rrugëve për të mbështetur më tej Ukrainën dhe për të forcuar sigurinë euroatlantike përballë kërcënimeve në rritje.