Ambasada e Shteteve të Bashkuara në Tiranë ka përcjellë sot një mesazh të qartë mbështetjeje për SPAK-un, përmes një postimi në rrjetet sociale.
E ngarkuara me punë e SHBA-ve, Nancy VanHorn, zhvilloi një takim me kreun e SPAK, Altin Dumani, dhe disa prej prokurorëve të këtij institucioni të specializuar kundër korrupsionit dhe krimit të organizuar.
Gjatë takimit, VanHorn vlerësoi guximin dhe përkushtimin e ekipit të SPAK në çmontimin e rrjeteve kriminale që kërcënojnë sigurinë e Shteteve të Bashkuara dhe të Shqipërisë.
“VanHorn vlerësoi bashkëpunimin e SPAK në luftën e Shteteve të Bashkuara kundër krimit ndërkombëtar, trafikut të drogës dhe emigracionit të paligjshëm dhe falënderoi Dumani për guximin dhe angazhimin e SPAK në shkatërrimin e rrjeteve kriminale që kërcënojnë sigurinë e Shteteve të Bashkuara dhe të Shqipërisë”, thuhet në mesazhin e publikuar nga ambasada amerikane në rrjetet sociale.