Foto ilustruese
Një faturë prej gati 150 milionë lekësh llogaritet se është paguar ndaj të gjithë gjyqtarëve që u shkarkuan nga shkalla e parë e vettingut dhe që, sipas ligjit, ata duhet të merrnin 75% të pagës, sepse konsideroheshin të pezulluar nga detyra derisa të shprehej KPA.
Por kjo nuk është fatura e vetme që po paguhet ndërkohë nga buxheti i shtetit. Të gjithë gjyqtarët dhe prokurorët që u shkarkuan edhe nga shkalla e dytë, pra Kolegji i Posaçëm i Apelimit, i janë drejtuar Institutit të Sigurimeve Shoqërore për të përfituar nga skema e sigurimit suplementar, kërkesa që janë refuzuar nga ky institucion, duke hapur një fenomen të ri.
I kontaktuar në telefon, kreu i këtij instituti, Astrit Hado, u shpreh i shqetësuar duke thënë se gjykatat administrative po u japin të drejtë të shkarkuarve nga detyra për të qenë pjesë e kësaj skeme.
Të gjithë gjyqtarët dhe prokurorët e shkarkuar po kërkojnë në Gjykatën Administrative përfitim të pagës kalimtare.
Pagesa kalimtare që fitohet në gjykatë llogaritet në varësi të detyrës që ka mbajtur gjyqtari i shkarkuar. Për gjykatat e larta dhe prokurorët në organin qendror të akuzës deri në tre vjet, kurse për shkallët më të ulëta deri në një vit.
Nga 8 shkurti 2018 deri në 30 nëntor 2024, kur edhe i përfundoi mandati Komisionit të Pavarur të Kualifikimit, u kontrolluan 805 gjyqtarë e prokurorë.
373 u konfirmuan në detyrë, ndërsa 268 të tjerë u shkarkuan, ndërkohë që për 105 të tjerë u dhanë vendime për ndërprerje të procesit. Të shkarkuarit iu drejtuan KPA-së, ku mandatin e Komisionerit Publik e ka marrë SPAK.
Top Channel