Lajmidites.com

Author: Zeri.ai

  • Bashkia e Tiranës/ Rama mohon ndërhyrjet: S’e drejtoj unë! Berisha me akuza: Kërcënove Goxhajn!

    Bashkia e Tiranës/ Rama mohon ndërhyrjet: S’e drejtoj unë! Berisha me akuza: Kërcënove Goxhajn!

    Edi Rama dhe Sali Berisha

    TIRANË- Një pjesë e mirë e retorikës së fushatës për zgjedhjet parlamentare të 11 majit është fokusuar tek Bashkia e Tiranës, dhe mungesa e kryebashkiakut Erion Veliaj, i cili tashmë është arrestuar me urdhër të SPAK. Mëngjesin e sotëm, gjatë rubrikës “Sy m’sy”, Rama i pyetur nga qytetarët sqaroi se nuk ka bërë asnjë ndërhyrje në Bashki, duke shtuar se institucionin nuk e drejton më që prej vitit 2011.
    “Unë punët në bashki i kam mbyllur në 2011-ën, e dashur Rozeta nuk jam kryetar. Unë nuk lë mënjanë asgjë. Të gjitha këto janë pjesë e së njëjtës gjë. Do vazhdoj të flas për bufin e kënetës deri më 9 maj që është edhe dita e Evropës, finishi i kësaj fushate elektorale. Flas, i bie pragut që të dëgjojë dera”- i përgjigjet Rama.
    Pas sqarimit që bëri Rama, një përgjigje erdhi nga kryedemokrati Sali Berisha. Gjatë një konference për shtyp, Berisha pretendon se Sara Goxhaj u kërcënua nga kryeministri për të lënë postin që ia delegoi Veliaj nga ambientet e paraburgimit të Durrësit. Më pas, shtoi se të gjitha postimet që ka bërë në rrjetet e tij sociale Veliaj, në fakt janë të shkruara nga vetë Rama.
    “Lidhur me pjesën e parë të pyetjes, se kush qeveris bashkinë e Tiranës, kjo është e faktuar. Është një zonjë që quhet Anuela Ristani, e cila u shkarkua nga kryetari në qeli i detyrës, se duhet të pranojmë se pavarësisht se është në qeli, ai është kryetar. Dhe u shkarkua, u emërua një zonjë tjetër, e cila u thirr dhe u kërcënua nga Edi Rama në mënyrë më pak dinjitoze. Jo vetëm u kërcënua ajo zonjë, por ajo u dëbua nga puna sepse Erion Veliaj e emëroi atë nënkryetare bashkie dhe i delegoi firmën si një njeriu që i besonte të kryente veprimet që duhej të kryente në vend të kryetarit. Pra, këto akte janë publike, nuk janë të fshehta. Është Edi Rama ai që ka ndërhyrë në mënyrë brutale në shkarkimet dhe emërimet në bashkinë e Tiranës. Por, meqë jemi këtu dhe ligji e ndalon në mënyrë kategorike çdo akt dhe veprim të pushtetit qendror mbi pushtetin vendor. Ato, thotë ligji dhe Gjykata Kushtetuese, mund të bëhen vetëm nëpërmjet padive në gjykata. Kryeministri, nëse ka një aprovim, nëse konstaton se qeveria vendore bëri një akt të paligjshëm, ai mund t’i adresohet gjykatës dhe të mos ndërmarrë asnjë veprim ekzekutiv ndaj tij. Këto janë shumë të prera. T’u bëj një pyetje unë. Si u duket ju, marrin të burgosurin, e ndryjnë aty dhe pastaj shkojnë e publikojnë statusë në emër të tij. Dhe ato statuse, sipas burimeve që duhen hetuar, janë të shkruara nga dora e Edi Ramës,”-tha Berisha në deklaratën e tij.
    Erion Veliaj u vendos në pranga më 10 Shkurt. SPAK e akuzon Veliajn se bashkë me të shoqen ka krijuar një skemë përfitimi ryshfetesh për pasurim personal. Pas arrestimit të tij, si kryetare e komanduar, u caktua nënkryetarja Anuela Ristani. Por më 18 mars, ajo u zëvendësua me firmën e Veliajt nga Sara Goxhaj. Të nesërmen, Goxhaj u shkarkua nga detyra dhe iu ndërpre kontrata e punës, ndërsa në detyrë u rikthye sërish Ristani. Vetë kryebashkiaku i arrestuar sqaroi se emërimin e ri e kishte bërë për shkak të një keqkuptimi. Ndërsa reagimi i parë nga Rama erdhi sot./ZËRI

  • INVESTIGIMI/ Emërimi që po trondit politikën austriake, si u caktua Fate Velaj ambasador?

    INVESTIGIMI/ Emërimi që po trondit politikën austriake, si u caktua Fate Velaj ambasador?

    Fate Velaj

    VIENË- Emërimi i Fatmir Velajt si ambasador i Shqipërisë në Austri në vitin 2023 po bëhet gjithnjë e më shumë një fuçi baruti diplomatike dhe politike. Çështja ‘Velaj’ po shkakton shumë polemika në Ministrinë e Jashtme të Beate Meinl-Reisinger dhe është kthyer në një çështje politike dhe po e vë qeverinë e re federale në një situatë të pasigurt.
    Emërimi i Fatmir Velajt
    Fatmir Velaj (i njohur në Shqipëri si Fate Velaj) u emërua ambasador i Shqipërisë në Vjenë në korrik 2023, kur Republika e Shqipërisë e emëroi zyrtarisht atë si pasardhës të ambasadorit Roland Bimos. Në vitin 2024, emërimi i Velajt si ambasador u vu në pikëpyetje nga anëtari i atëhershëm i Këshillit Kombëtar, Helmut Brandstätter. Kërkesa e tij ngre dyshime lidhur me përshtatshmërinë e Velajt në postin që i është besuar. Në kërkesën e depozituar në Këshillin Kombëtar janë listuar 14 pyetje të detajuara mbi papajtueshmëritë e figurës së tij dhe ndikimin politik. Brandstätter donte të dinte nëse Velaj ishte një shtetas i dyfishtë austriako-shqiptar në kohën e emërimit të tij dhe nëse ai merrej me aktivitet tregtar në Austri. Sipas praktikës aktuale, të dyja do të ishin arsye për përjashtim nga akreditimi si ambasador.
    Kërkesa thotë fjalë për fjalë: A është e vërtetë që kandidati i caktuar është duke ushtruar një aktivitet tregtar në Austri? A do të ishte kjo një arsye për përjashtim?
    Bëhen gjithashtu pyetjet e mëposhtme: A dihet nëse kandidati i caktuar ka hequr dorë nga shtetësia austriake apo do të hiqte dorë nga ajo nëse emërohej në postin e ambasadorit?
    Gjithashtu, diskutohet edhe mundësia e ndërhyrjes politike. Ka dyshime se një anëtar i qeverisë mund të ketë ndërhyrë në favor të Velajt. Përmendet në mënyrë specifike ministren Federale të atëhershme për Çështjet e BE-së dhe Kushtetutës, Karoline Edtstadler: A është e vërtetë që Ministrja Federale për Çështjet e BE-së dhe Kushtetutës, Karoline Edtstadler, ishte e përfshirë në këtë emërim?

    Kërkesa e depozituar

    Në qendër të kritikave është edhe Ministria e Jashtme. Pyetja është nëse BMEIA i ka kërkuar Ministrisë së Jashtme në Tiranë që të emërojë një kandidat tjetër me notë verbale në korrik 2023 , por edhe nëse kjo kërkesë është dërguar, nuk është përmbushur deri më sot.
    Kjo do të thotë se Velaj nuk është i vetmi fokus. Lind dyshimi se pas emërimit qëndron një rrjet i errët lobimi politik dhe oportunizmi diplomatik. 
    Nga azilkërkues në ambasador
    Biografia e Velajt në pamje të parë duket meteorike. Ish-azilkërkuesi nga Traiskirchen mori jo vetëm Dekoratën e Artë të Meritave të Republikës së Austrisë, por edhe titullin “Profesor”. Sipas certifikatës së çmimit të datës 13 dhjetor 2019, ai u nderua për arritjet e tij si “piktor, fotograf, shkrimtar, publicist, menaxher kulturor dhe kurator ekspozite”.
    Certifikata është në dispozicion të ekipit të medias që ka publikuar shkrimin.
    Përgjigja zyrtare e Ministrisë së Jashtme konfirmon akuzat kryesore rreth emërimit të Fatmir Velajt si ambasador i Shqipërisë në Vjenë. Prandaj, Ambasada Shqiptare kërkoi një marrëveshje diplomatike më 27 korrik 2023. BMEIA zbuloi se i emëruari kishte shtetësi austriake dhe shqiptare dhe kishte qenë aktiv në Austri në të kaluarën. Të dyja këto detaje janë të papajtueshme me dispozitat e Konventës së Vjenës për Marrëdhëniet Diplomatike. 
    Vetëm më 19 mars 2024, ambasada shqiptare njoftoi se Velaj kishte hequr dorë nga shtetësia austriake , duke i hapur kështu zyrtarisht rrugën akreditimit. Që më 3 prill 2024, presidenti dha miratimin e tij për ambasadorin e ri. Më 26 qershor 2024, Velaj më në fund dorëzoi letrat kredenciale. Kjo do të thotë se pavarësisht viteve të punës në Austri, pavarësisht shtetësisë së dyfishtë dhe pavarësisht nga një të kaluar si biznesmen në vendin e tyre, Velaj u akreditua.
    Këshilli i Ministrave nën presion
    Tani është e qartë: Ministri i Jashtëm Meinl-Reisinger është nën presion për të vepruar. Sipas dosjeve të brendshme të Ministrisë së Jashtme, Velaj mësohet se ka ndërhyrë personalisht në BMEIA në disa raste. Në interes të transparencës dhe higjienës politike, i gjithë procesi duhet të rishqyrtohet. Pyetja kryesore është nëse ka pasur ndonjë ndikim të padrejtë në emërimin e tij si ambasador?
    Nëse do të ishte kështu, shkarkimi do të ishte pothuajse i pashmangshëm.
    Një hap i tillë do të kishte rëndësi edhe në nivel ndërkombëtar. Kjo mund të çojë në tensione diplomatike me Tiranën dhe ngrejë hije dyshimi lidhur mbi standardet e politikës së jashtme austriake. 
    Shumë pyetje mbeten pa përgjigje në rastin Velaj. Por një gjë është tashmë e qartë – nëse rezulton se një kandidat i papërshtatshëm është emëruar ambasador përmes ndërhyrjes politike, kjo gjë do të shkaktojë një skandal diplomatik me pasoja të konsiderueshme. Dhe një gjë tjetër është po aq e sigurt: kjo çështje nuk mund të fshihet thjesht në aspektin e politikës së jashtme./ZËRI
    Marrë nga fob.at

  • Meta audio-mesazh nga qelia: Rama është kyçur sy më sy me vetveten, i kushtëzoi qëllimisht më 2008

    Meta audio-mesazh nga qelia: Rama është kyçur sy më sy me vetveten, i kushtëzoi qëllimisht më 2008

    Ilir Meta

    TIRANË-Kreu i Partisë së Lirisë Ilir Meta ka përcjellë një audio-mesazh nga qelia për të gjithë qytetarët shqiptarë. Meta u ka bërë thirrje mbështetësve të votojnë më 11 maj për të në listën e hapur të Tiranës dhe për kandidatët e partisë. Kreu i PL ironizoi edhe kandidatët e Partisë Socialiste, gjithashtu edhe kryeministrin Edi Rama. Meta ka akuzuar ashpër 12 vitet e qeverisjes socialiste, duke e cilësuar fitoren e opozitës në zgjedhjet e 11 majit si të pashmangshme.

    Audio – mesazhi i Presidentit të Partisë së Lirisë, Ilir Meta: 
    Fitorja i zgjidh të gjitha! Prandaj të gjithë faktorët opozitarë tani kanë vetëm një rrugë, për t’i dhënë një zgjidhje historike së ardhmes së Shqipërisë, duke ndëshkuar përgjithmonë pengmarrësit e demokracisë, llogaridhënies, parlamentarizmit, integrimit uuropian të vendit, por edhe pengmarrësit jo vetëm të Partisë Socialiste, por edhe të opozitës në veçanti. Atij që e keqpërdori pushtetin për të blerë, korruptuar e shantazhuar drejtuesit e opozitës dhe që sot nxjerr lotë “krokodili” për primaret e PD-së, të cilat janë si dita me natën me përzgjedhjet e tij personale në errësirë si Kryetari i Organizatës me anonimët pafund, shumica të rekomanduar nga bandat e njohura. Po kështu, ai kërkon të shmangë vëmendjen nga asgjësimi përfundimtar që po u bën socialistëve të paktë që i kishte mbajtur deri tani, sa për shenjë. Ai që në 2021–shin kandidoi i teti në Durrës dhe kishte kopsitur rezultatin me bandat dhe partnerin e tij të errësirës së 17 Majit, tani është kyçur i pari në bunkerin e listave të mbyllura bashkë me gjithë anonimët, që nesër s’mund t’i kërkojnë dot llogari për humbjen. Ai të cilit, as socialistët nuk ja njohin për fytyrë të paktën 3/4 e Ministrave, ka hallin e kontributeve të 2 apo 3 demokratëve të papërfshirë në listat e opozitës. Ai që është kyçur sy më sy me vetveten dhe e ka tmerr të dalë me gazetarë të pavarur, ka hallin e demokracisë. Ndaj opozita e ka rrugën e qartë për të korrigjuar edhe çështjen e listave të mbyllura njëherë e përgjithmonë. Ishte Edi Rama ai që kushtëzoi qëllimisht me ndryshimet kushtetuese të vitit 2008 listat e mbyllura, pikërisht për të shndëruar Kuvendin, siç është sot, në një “noter” të korrupsionit të tij skizofrenik. Ndaj fitorja plotësisht e mundshme me 84 mandate e opozitës, garanton edhe hapjen e plotë të listave përgjithmonë edhe pa Ramën.Për këtë, garanci është Partia e Lirisë që ka qenë kundër këtij projekti të mbylljes së listave që në vitin 2008. Për këtë garant është edhe vet premtimi publik i Z. Berisha, i cili ka deklaruar se është pro listave të hapura. Për këtë, garant do të jenë edhe gati 40 deputetë të opozitës që do të zgjidhen nga listat e hapura më 11 Maj. Ndaj të përqëndrohemi të gjithë tek programi ynë i shkëlqyer që i jep fund Narkoekonomisë, ekonomisë klienteliste dhe kriminale në shërbim të pakicës dhe të votojmë për një Shqipëri prodhuese dhe eksportuese, në interesin e të gjithë shqiptarëve. Arritjet më të mëdha integruese nuk kanë aspak lidhje me shakaxhiun dhe penguesin e integrimit, i cili s’ka asnjë meritë në liberalizimin e vizave, arritja më e madhe në Bashkimin Europian, që u realizua nga koalicioni PD – LSI. Dhe mos harroni që publikisht ai paralajmëronte Bashkimin Europian, se kjo do të sillte largimin e shqiptarëve drejt Bashkimit Europian dhe kjo ndodhi, por shumë vite më vonë si rezultat i programit të tij shpopullues. Asnjë kontribut nuk ka ai për anëtarësimin e Shqipërisë në NATO, kur besoj nuk e keni harruar dhe një miting dëshpërues që bëri pas kësaj ngjarje madhore në historinë e Shqipërisë. Dhe po kështu të gjithë e dinë “kontributin” e tij në vizitën historike të Presidentit Bush, ku ai, në Krah të Kryeministrit Berisha në atë kohë, shpalli edhe Pavarësinë e Kosovës nga Tirana. Ah për pak harrova, i vetmi kontribut i tij është që shpiku vjedhjen e orës të Presidentit Bush që u bë lajm botëror pikërisht nga xhelozia. Ndaj të gjithë të përqëndrohemi në programin tonë të shkëlqyer që është në interest të të gjithë shqiptarëve. Të gjithë të përqëndrohemi në një Fitore Madhështore që garanton Shqipërinë Madhështore, pikërisht Shqipërinë si fuqi eksportuese.
    Meta kandidon në listën e hapur të koalicionit PD-Aleanca për Shqipërinë Madhështore për Qarkun e Tiranës. Kreu i Partisë së Lirisë u vu në pranga më 21 tetor teksa po kthehej nga Kosova. Ai kishte planifikuar të mbërrinte në selinë e Partisë së Lirisë ku do të mbante një konferencë me gazetarët, por në hyrje të Tiranës, u ndalua nga efektivët e policisë që i vunë prangat. Policia e Shtetit arrestoi ish-presidentin e vendit Ilir Metën, pasi ai akuzohet nga SPAK për veprat penale: korrupsion, pastrim parash dhe mosdeklarim pasurish. Edhe pse ka kërkuar disa herë një masë më të butë sigurie, me arsyetimin se kërkon të jetë pjesë e fushatës zgjedhore, kërkesat e tij janë rrëzuar nga GJKKO./ZËRI

  • Partitë firmosin Kodin e Etikës në fushatë, ndalohet bullizmi dhe publikimi i përmbajtjeve me AI

    Partitë firmosin Kodin e Etikës në fushatë, ndalohet bullizmi dhe publikimi i përmbajtjeve me AI

    Ceremonia e nënshkrimit

    TIRANË-Përfaqësues të partive politike që garojnë në zgjedhjet parlamentare të 11 Majit, kanë firmosur ditën e sotme në ambientet e KQZ-së Kodin Etik. 
    Në prag të zgjedhjeve parlamentare të 11 majit 2025, Kodi i etikës për fushatat digjitale në Shqipëri do të shërbejë si një marrëveshje e përbashkët për të nxitur standardet etike, për të luftuar dezinformimin dhe keqinformimin në zgjedhje, si dhe për të siguruar një fushë loje të barabartë në sferën digjitale. Nënshkrimi i këtij kodi nga partitë politike simbolizon angazhimin e tyre për të zhvilluar një fushate digjitale etike dhe me integritet, duke kontribuar në një proces zgjedhor të drejtë dhe transparent.
    Subjektet ndalohen që përmes llogarive të rreme ose bot-e automatike të manipulojn opinionet e zgjedhësve, si dhe u ndalohen dhe trolle, akuza të pabaza ose bullizëm kibernetik. Gjithashtu, ndalohen edhe përmbajtje manipuluese, duke përfshirë audio, imazhe ose video të gjeneruara me ose pa përdorimin e inteligjencës artificiale, me qëllim paraqitjen e shtrembëruar ose të falsifikuar në mënyrë të rreme ose manipuluese të kandidatëve, zyrtarëve ose çdo pale tjetër të përfshirë në zgjedhje.
    Zotimet e palëve nënshkruese
    Nënshkruesit e këtij Kodi Etike që përfaqësojnë subjektet zgjedhore që planifikojnë të regjistrohen në zgjedhjet parlamentare të vitit 2025 marrin përsipër  bashkërisht sa vijon:
    -Të ruajnë integritetin e zgjedhjeve përmes respektimit të rregullave dhe normave në fuqi dhe përmes zbatimit të parimeve për fushata të ndershme dhe transparencë financiare.-Të nxisin një diskurs politik gjithëpërfshirës, pjesëmarrje dhe kontribut në procese zgjedhore të sigurta, veçanërisht:duke mos prodhuar, duke mos përdorur ose duke mos shpërndarë deklarata dhe paragjykime diskriminuese ndaj grupeve të caktuara për shkak të gjinisë, origjinës racore ose etnike, fesë, besimit, aftësisë së kufizuar, moshës ose orientimit seksual;duke mos shpërndarë, duke mos postuar dhe duke mos promovuar mesazhe që nxisin dhunë ose urrejtje; nënshkruesit inkurajohen të dënojnë me forcë dhe të ndërmarrin sanksione ndaj çdo akti dhune ndaj kandidatëve ose përfaqësuesve të zgjedhur.Duke mos shkurajuar zgjedhësit dhe duke mos shpërndarë informacione të pasakta në lidhje me procesin zgjedhor, siç janë të dhënat e zgjedhësve, procesi i votimit dhe qendrat e votimit.-Të garantojnë një përdorim etik dhe transparent të mjeteve dhe teknologjive për fushatë, duke përfshirë edhe inteligjencën artificiale.
    -Të mos prodhojnë, të mos shpërndajnë përmbajtje keqinformuese, veçanërisht:të dhëna ose materiale të rreme, të fabrikuara, të bëra publike pa leje dhe në mënyrë dashakeqe ose të vjedhura;përmbajtje manipuluese, duke përfshirë përmbajtje audio, imazhe ose video të gjeneruara me ose pa përdorimin e inteligjencës artificiale, me qëllim paraqitjen e shtrembëruar ose të falsifikuar në mënyrë të rreme ose manipuluese të kandidatëve, zyrtarëve ose çdo pale tjetër të përfshirë në zgjedhje. Përdorimi i përmbajtjes së gjeneruar nga inteligjenca artificiale të bëhet vetëm kur kjo përmbajtje etiketohet qartësisht si e tillë. Në këto raste këshillohet përdorimi i shenjave dalluese (ëatermarking) dhe i shenjave që tregojnë origjinën e materialit (provenance signals); llogari të rreme ose bot-e automatike për të manipuluar opinionet e zgjedhësve; trolle, akuza të pabaza ose bullizëm kibernetik; përmbajtje të krijuara dhe të shpërndara nga aktorë jashtë vendit që përpiqen të dëmtojnë parimet e demokracisë, lirisë, barazisë, mbrojtjes së të drejtave të njeriut, shtetit të së drejtës dhe të promovimit të paqes e stabilitetit.-Të shfrytëzojnë të gjitha burimet e mundshme për të luftuar efektet negative të përmbajtjeve manipuluese të gjeneruara nga inteligjenca artificiale dhe të shohin mundësitë e trajnimit të stafit të tyre për këtë qëllim; të mos përdorin informacione personale ose konfidenciale në instrumentet e inteligjencës artificiale, si për shembull në pyetjet apo udhëzimet e dhëna (prompts), duke garantuar kështu privatësinë dhe sigurinë e individit gjatë zgjedhjeve; të shohin mundësinë e ngritjes së një mekanizmi të strukturuar që do t’u mundësonte qytetarëve të raportojnë për shqetësime ose për keqpërdorim të teknologjive të inteligjencës artificiale.-Të garantojnë transparencën e kontributeve financiare të marra, duke përfshirë edhe përfitimet në natyrë si dhuratat, trajtimet, huatë, donacionet, kontributet për fushata dhe shpenzime, në përputhje me legjislacionin evropian dhe atë kombëtar në fuqi.-Të garantojnë transparencën e reklamave politike dhe komunikimeve të fushatës:-të mos përdorin reklama politike të sponsorizuara nga interesa të padeklaruara dhe të mos angazhojnë palë të treta ndërmjetëse për dhënie mesazhesh për fushatë ku nuk identifikohet burimi ose sponsorizuesi i mesazhit.-të veprojnë në përputhje me politikat dhe mekanizmat e transparencës së platformave online dhe të japin informacione të sakta mbi proceset e regjistrimit dhe verifikimit.-të ofrojnë informacion, mundësisht në faqet e internetit të partive politike në lidhje me:organizatat dhe fondacionet me të cilat janë të lidhura; ose ne lidhje me subjekte të tjera ligjore që zhvillojnë fushatë në emër të tyre;-përdorimin e reklamave politike, duke përfshirë sponsorizuesit, burimet e financimit dhe shumat e shpenzuara për to;iii. targetimin e reklamave dhe përdorimin e çfarëdolloj sistemi të inteligjencës artificiale në shpërndarjen e reklamave.
    -të mos përdorin taktika, teknika dhe procedura manipuluese për amplifikim të mesazheve politike dhe të mos përdorin të dhëna sensitive për mikrotargetim. Të marrin masa që të dhënat e përdorura për fushata politike të jenë plotësisht në përputhje me ligjin shqiptar për mbrojtjen e të dhënave, duke i kushtuar rëndësi të veçantë minimizimit të të dhënave dhe përpunimit të tyre në mënyrë të ligjshme, të drejtë dhe transparente.-Të shmangin në mënyrë proaktive amplifikimin e narrativave që kanë për qëllim minimin e parimeve demokratike, të nxitura nga subjekte dhe aktorë si brenda dhe jashtë vendit.-Të ndërmarrin hapa aktivë për arritjen e standardeve bazë të sigurisë kibernetike, për të dalluar, parandaluar dhe frenuar sulmet kibernetike, si dhe për të shpërndarë informacion, duke përfshirë edhe përmes organizimit të trajnimeve brendapërbrenda mbi rreziqet ndaj sigurisë kibernetike në zgjedhje.-Të heqin ose të kërkojnë heqjen pa vonesë të çdo përmbajtjeje të publikuar në emër të një pale që ka nënshkruar këtë Kod, nëse ajo përmbajtje është në shkelje të angazhimeve të këtij Kodi Etike. Përmbajtje të tilla duhet të raportohen në platformat online.-Të rrisin ndërgjegjësimin brendapërbrenda strukturave dhe organizatave të tyre për këtë Kod Etike dhe të nxisin zbatimin e tij nga stafi i fushatës, degët e partive, organet e tjera dhe institucionet që lidhen me to. Të inkurajojnë anëtarët që ta nënshkruajnë këtë Kod ose të respektojnë angazhimet e parashikuara në të.-Të marrin masa që stafet e tyre të fushatës dhe degët e partive të tyre të respektojnë me rigorozitet rregullimet kombëtare për të parandaluar keqpërdorimin e burimeve publike gjatë zgjedhjeve; të rrisin ndërgjegjësimin e anëtarëve të partive për nevojën e respektimit rigoroz të këtyre rregullimeve.-Të promovojnë përmbushjen në mënyrë të pavarur të angazhimeve të parashikuara në këtë Kod Etike dhe bashkëpunimin e plotë me autoritetet mbikëqyrëse, vëzhguesit zgjedhorë ndërkombëtarë dhe vendas, si dhe me aktorë të tjerë të përfshirë në vëzhgimin e pavarur, si mediat, studiuesit akademikë dhe organizatat e shoqërisë civile.-Të diskutojnë për zbatimin e këtij Kodi Etike me kryetarët e subjekteve zgjedhore dhe/ose sekretarët e përgjithshëm dhe degët përkatëse të partive para zhvillimit të zgjedhjeve.-Të bëjnë një vlerësim paszgjedhor dhe të vazhdojnë diskutimet brendapërbrenda subjekteve zgjedhore dhe mes subjekteve të ndryshme zgjedhore pas zgjedhjeve të përgjithshme të vitit 2025.

  • $2000, ora e punës/ Erion Veliaj kërkon lirinë, kontrakton avokat amerikan (KONTRATA)

    $2000, ora e punës/ Erion Veliaj kërkon lirinë, kontrakton avokat amerikan (KONTRATA)

    Erion Veliaj

    TIRANË- Kontrata me studion “Kasowitz Benson Torres’ e firmosur nga kryebashkiaku dhe vëllai i tij Arbër Veliaj është publikuar në faqen zyrtare të Departamentit Amerikan të Drejtësisë dhe parashikon shërbime ligjore në formë këshillash ligjore, mediatike dhe strategjike për procesin gjyqësor.
    Avokatët e studios që do të asistojnë Veliajn në këtë proces kanë një pagesë për orë pune që varion nga 500 USD deri në 1950 USD. Sipas kontratës, kjo studio do të marrë përsipër përveç konsulencës ligjore dhe lobim pranë Departamentin Amerikan të Shtetit dhe degë të tjera të qeverisë amerikane dhe shërbime të marrëdhënieve me publikun në lidhje me qeverinë shqiptare dhe legjislacionin shqiptar.

    Një përfaqësues i studios ligjore të kontraktuar nga Veliaj erdhi në Tiranë në fillim të marsit gjatë seancës së Apelit për masën e sigurisë, por ai nuk u lejua të merrte pjesë në seancë për shkak të ndalimeve ligjore që parashikon legjislacioni shqiptar.
    Veliaj, bashkëpunëtori i ngushtë i kryeministrit Edi Rama dhe kryetar i Bashkisë së Tiranës prej vitit 2015, u arrestua nga SPAK më 10 shkurt. Prokuroria e Posaçme, SPAK, thotë se ai dyshohet se ka përfituar përmes familjarëve të vet të afërm apo personalisht, pagesa apo të mira të tjera nga biznesmenë të ndryshëm në nëntë raste.
    Veliaj i mohon akuzat dhe pretendon se është shënjestër e një prokurorie të padrejtë.
    Pas arrestimit, Veliaj sulmoi përmes disa statuseve në Facebook, prokurorin e çështjes, Ols Dado dhe gjyqtarin Erion Bani, duke pretenduar për persekutim politik. Veliaj publikoi gjithashtu një transkript me përmbajte të pavërtetë, që u vlerësua si një përpjekje për të sfiduar drejtësinë dhe për të diskretituar figurën e prokurorit, nëpërmjet të dhënave të tjetërsuara, që u shpërndanë nga media pranë tij.
    Po ashtu, gjatë seancës së vlerësimit të masave së sigurimit, qindra mbështetës të Veliajt protestuan kundër ndalimit të tij. Sipas njoftimeve të atëhershme të Gjykatës së Posaçme të Shkallës së Parë dhe SPAK, protestuesit kishin rrezikuar seriozisht jetën dhe shëndetin e gjyqtarëve, prokurorëve dhe punonjësve të administratave të këtyre institucioneve, kur ata ishin larguar nga puna./BIRN

  • ‘Nata vazhdon’, Rama batuta me të riun në Kombinat: Qiellin e pe sa blu ishte, muhabet bënin gjermanët

    ‘Nata vazhdon’, Rama batuta me të riun në Kombinat: Qiellin e pe sa blu ishte, muhabet bënin gjermanët

    Edi Rama

    TIRANË-Kryeministri Edi Rama, mbrëmjen e sotme ka zhvilluar një takim me shtabin elektoral të njësisë numër 6, në Kombinat. Rama ka qenë i shoqëruar nga drejtuesja politike e Tiranës, Ogerta Manastirliu, dhe ministri Blendi Gonxhe. Kreu i qeverisë i ka inkurajuar të punojnë për fushatë, duke u thënë se duhet “ta thithin ujin e kënetës.”
    Edi Rama: Duhet futur pompa në të gjitha pikat ku të thithet sa të mundet uji i kënetës. Duhet thithur sa më shumë uji i kënetës, të filtrohet dhe një pjesë të kthehet në ujë të pijshëm. Pra demokratët që duan të çlirohen, t’i çlirojmë. Pastaj pjesa tjetër, kemi Lulin që të merret me ta. Sa i madh që është e, shumë i madh. Kemi Lulin që do merret me ata! Do jetë interesant, të shohim çfarë do të ndodhi.
    Pjesë e shtabit elektoral ishte edhe një i ri, i cili kishte emigruar drejt Gjermanisë dhe ishte kthyer. Mes tyre nuk munguan as batutat duke krahasuar eksperiencën në Gjermani me atë në Shqipëri.
    Pjesë nga biseda:
    I riu: Më keq se kafja ishte ushqimi.
    Rama: Po qielli të pëlqeu sa blu ishte? Po diellin e pe se sa ngrohte, po muhabet, bënin muhabet gjermanët? Ça bëre në Gjermani?
    I riu: Jam marrë me pjesën e mirëmbajtjes tek pjesa e transportit publik, thash ta shfrytëzoj, sikur po më mbylleshin rrugët, kjo mania e madhe, edhe e provum, jemi kthyer t’i japim drejtim se kontributin këtu do ta japim.

  • Specialja kërkon vijimin e paraburgimit për Thaçin, shkak një video-telefonatë

    Specialja kërkon vijimin e paraburgimit për Thaçin, shkak një video-telefonatë

    Haxhi Shala dhe Hashim Thaçi

    PRISHTINË- Një fotografi e publikuar nga djali i Haxhi Shalës në ditën e Pavarësisë së Kosovës, ka ndikuar në vijimin e paraburgimit për Hashim Thaçit. në pamjet e publikuara, dukej Haxhi Shala dhe Hashim Thaçi duke qëndruar bashkë në Qendrën e Paraburgimit, duke biseduar në një telefonatë me video.
    Sipas rregullave të Speciales, kjo është e ndaluar, dhe Prokuroria e ka përdorur për të pretenduar se Thaçi mund të ndikojë në këtë mënyrë tek dëshmitarët.
    “Pjesëmarrja e dukshme e Thaçit në video-telefonatën e një të burgosuri tjetër, bie ndesh me kushtet e vendosura ndaj tij, nënvizon rrezikun që ai mund të përdorë komunikimin me vizitorët e të burgosurve të tjerë për të vendosur kontakte indirekte me dëshmitarët ose për të shpërndarë informacion konfidencial. Jashtë mjedisit të kontrolluar të Qendrës së Paraburgimit, rreziqe të tilla do të ishin edhe më të mëdha. Prandaj, paraburgimi është mjeti më efektiv për të kufizuar aftësinë e Thaçit për t’u arratisur, përndryshe të pengojë procedurat e KSK-së dhe/ose të kryejë krime të mëtejshme”, thuhet në dokumentin e Prokurorisë së Hagës.
    Ish-presidenti i Kosovës, Hashim Thaçi po mbahet në paraburgim që nga 5 nëntori i vitit 2020. Në po këtë ditë, ai kishte dhënë dorëheqje nga pozita e Presidentit të Republikës së Kosovës dhe ishte transferuar për në Hagë. Arsye për këtë ishte ngritja e aktakuzës nga Dhomat e Specializuara në Hagë.  Veprat që rëndojnë ndaj Thaçit, kanë të bëjnë me krime lufte, ndalimit të paligjshëm ose arbitrar, trajtimit mizor, torturës dhe vrasjes së paligjshme dhe krimet kundër njerëzimit të burgosjes, akteve të tjera çnjerëzore, torturës, vrasjes së paligjshme, zhdukjes me forcë të personave dhe përndjekjes, të cilat sipas Dhomave të Specializuara, janë kryer midis marsit 1998 dhe shtatorit të vitit 1999./ZËRI

  • SHBA: Rusia dhe Ukraina kanë rënë dakord për një armëpushim në Detin e Zi

    SHBA: Rusia dhe Ukraina kanë rënë dakord për një armëpushim në Detin e Zi

    Volodymir Zelenskyy, Donald Trump dhe Vladimir Putin

    SHBA- Rusia dhe Ukraina kanë rënë dakord të ndalojnë sulmet në Detin e Zi, duke bërë një tjetër hap të rëndësishëm drejt një armëpushimi. Njoftimi u bw me dije nga Shtëpia e Bardhë pas përfundimit të raundit të fundit të negociatave midis Uashingtonit dhe Kievit në Riad. Shtetet e Bashkuara, Rusia dhe Ukraina kanë rënë dakord në bisedimet në Arabinë Saudite për të siguruar një armëpushim të pjesshëm, lundrim të sigurt dhe përjashtimin e përdorimit të forcës në Detin e Zi.
    Propozimi për një armëpushim të kufizuar në Detin e Zi, siç shpreson Uashingtoni, do të hapë rrugën për negociata më të gjera të paqes. Uashingtoni thotë se Amerika synon të promovojë aksesin e zgjeruar të Rusisë në portet dhe sistemet e pagesave për eksportet e plehrave dhe ushqimeve.
    “Moska dhe Uashingtoni do të vazhdojnë të punojnë drejt arritjes së një paqeje solide dhe të qëndrueshme,”-shkruhet nw njoftimin e Shtwpisw sw Bardhw. 
    Si pjesë e një nisme më të gjerë në Detin e Zi, Uashingtoni do të ndihmojë Rusinë të kthehet në tregun botëror për eksportet bujqësore dhe plehrat. Me këtë, presidenti amerikan Donald Trump i bëri një tjetër favor të madh liderit rus Vladimir Putin.
    Ministria e Mbrojtjes e Ukrainës lëshoi ​​deklaratën e saj mbi marrëveshjen, e cila kryesisht ndjek të njëjtin formulim si Shtëpia e Bardhë./ZËRI

  • Fotoreporteri turk i AFP u burgos se raportonte demonstratat ‘pro-Imamoglu’

    Fotoreporteri turk i AFP u burgos se raportonte demonstratat ‘pro-Imamoglu’

    Foto ilustruese

    STAMBOLL- Një gjykatës turk urdhëroi sot paraburgimin e Yasin Akgul, një fotoreporter për Agjencinë Franceze të Lajmeve (AFP), me akuzën e pjesëmarrjes në një tubim të paligjshëm në mbështetje të Ekrem Imamoglu. Lajmin e dha për “AFP”, avokati i fotoreporterit.
    Gazetari bëri me dije gjatë seancës së tij gjyqësore se kishte shkuar në tubim për të mbuluar protestën në mbështetje të kryebashkiakut të burgosur të Stambollit, por akuzohet se ka marrë pjesë si protestues. Por pavarësisht pretendimeve të tij, gjykatësi e la në paraburgim. Mbi të rëndojnë akuzat për pjesëmarrje në tubime, marshim i paligjshme dhe moslargim vullnetar pavarësisht paralajmërimeve nga forcat e Policisë.
    Akgul, i cili punon për AFP, u arrestua herët të hënën në shtëpinë e tij, së bashku me nëntë gazetarë të tjerë në Stamboll dhe Izmir (perëndim), qyteti i tretë më i madh i vendit. Lidhur me rastin, ka pasur një reagim edhe nga “Reporters ëithout Borders” (Reporters Sans Frontiers- RSF), OJF, e cila e përshkroi vendimin e gjyqtarit turk si “skandaloz”.
    “Kjo është hera e parë që një gazetar, identiteti i të cilit është konfirmuar qartë, ndalohet në bazë të këtij ligji kundër tubimeve dhe demonstratave. Ky vendim skandaloz pasqyron një situatë gjithnjë e më serioze që po zhvillohet në Turqi,”- tha për AFP Erol Oteroglu, përfaqësuesi i RSF-së për Turqinë./ZËRI

  • U tha se u arratis në Serbi, Dodik përfundon shumë larg Bosnjë-Hercegovinës: Ky vend mbron lirinë

    U tha se u arratis në Serbi, Dodik përfundon shumë larg Bosnjë-Hercegovinës: Ky vend mbron lirinë

    Milorad Dodik

    IZRAEL-Presidenti Milorad Dodik ka arritur të arratiset pavarësisht një urdhri arresti ndaj tij. Më herët mediat serbe raportuan se Dodik ia arriti që të kalonte kufirin për në Serbi, pavarësisht se ndaj tij është prerë një urdhër-arresti, por vendi ku ka zgjedhur të ‘fshihet’ qëndron shumë larg Bosnjë-Hercegovinës.

    Pas qëndrimit në Beograd, ai ka udhëtuar drejt Izraelit, ku ka bërë një deklaratë përmes rrjetit social “X”. Dodik shprehu respektin e tij për Izraelin, duke theksuar se ky vend mishëron forcën dhe vendosmërinë për të mbrojtur lirinë dhe sigurinë.
    “Fillova vizitën time në Izrael. Izraeli tregon se liria dhe siguria nuk kanë çmim dhe se një popull që e di kush është nuk pranon të jetë as objekt, as i nënshtruar. Ashtu si Izraeli mbron veten pa kërkuar falje, ashtu edhe Republika Serbe mbron të drejtën e saj për të ekzistuar, vendosur dhe ruajtur betimin e paraardhësve. Izraeli ashtu siç Republika e Serbisë ka të drejtë të jetojë, të durojë dhe të mbajë qëndrimin e saj. Serbët dhe hebrenjtë janë popuj që u përpoqën të zhdukeshin plotësisht – dhe ata mbijetuan. Kjo është arsyeja pse ne e kuptojmë njëri-tjetrin. Dhe kjo është arsyeja pse ne qëndrojmë së bashku,”-shprehet Dodik në reagimin e tij.

    Почео сам посјету Израелу, земљи чију снагу, историју и одлучност дубоко поштујем.Израел показује да слобода и безбједност немају цијену и да народ који зна ко је – не пристаје да буде ни мета ни послушник.Као што се Израел брани без извињавања, тако и Република Српска брани… pic.twitter.com/IhvsuzjYHn
    — Милорад Додик (@MiloradDodik) March 25, 2025

    Milorad Dodik kishte planifikuar të merrte pjesë në Konferencën kundër Antisemitizmit në Jerusalem, Izrael, më 26 dhe 27 mars, sipas njoftimeve të mëparshme. Largimi i Dodikut shkaktoi reagim të Policisë Kufitare në Bosnjë-Hercegovinë, pasi me urdhër të drejtorit Mirko Kupresakoviç nisi një hetim mbi mënyrën se si ai e ka kaluar kufirin shtetëror.
    Gjykata e BeH urdhëroi paraburgimin dhe lëshoi ​​një urdhër arresti për Dodikun, si dhe për kryeministrin e Republikës Srpska, Radovan Vishkoviç dhe kryetarin e Parlamentit të entitetit, Nenad Stevandiç. Ata akuzohen se kanë kryer veprën penale të “sulmit ndaj rendit kushtetues”. Urdhri nënkupton që çdo oficer policie në vend që i ndeshet duhet t’i arrestojë menjëherë.
    Presidenti i Republikës Srpska u dënua më 26 shkurt me 1 vit burg dhe heqjen e të drejtës për të ushtruar detyrën e presidenti për 6 vjet, pasi refuzoi të zbatonte direktivat e përfaqësuesit të lartë Christian Schmidt. Vendimi nuk është përfundimtar dhe Dodik mund ta apelojë atë. Dodik akuzohet për nënshkrimin e dekreteve presidenciale, me të cilat shpalli të vlefshme dy ligje jokushtetuese të Republikës Srpska, të cilat më parë ishin shfuqizuar nga Përfaqësuesi i Lartë.
    Bëhet fjalë për ligjet mbi moszbatimin e vendimeve të Gjykatës Kushtetuese të Bosnje-Hercegovinës, dhe moszbatimin e vendimeve të Përfaqësuesit të Lartë në territorin e Republika Srpskas. Llukiç akuzohej për publikimin e këtyre ligjeve dhe dekreteve në Gazetën Zyrtare të Republikës Srpska./ZËRI