Lajmidites.com

Author: Syri.net

  • Konglomerati më i madh i luksit në botë: Kush janë dhe me çfarë merren

    Konglomerati më i madh i luksit në botë: Kush janë dhe me çfarë merren

    Trashëgimtari i tij ende nuk është caktuar. Madje nuk dihet as nëse, një ditë, roli i numrit një të konglomeratit më të madh të luksit në botë, i cili është i lidhur fort me pronarin Bernard Arnault (sot 76 vjeç dhe ende shumë larg dëshirës për të dalë në pension), do të kalojë në duart e njërit prej pesë fëmijëve të tij. Apo ndoshta, në krye të LVMH-së do të vijë një menaxher jashtë familjes.

    Ajo që dihet me siguri është se, një herë në muaj, në numrin 22 të Avenue Montaigne, klani Arnault mblidhet për drekë. Rreth një tavoline në katin e fundit të selisë së grupit, disa hapa larg Champs-Élysées, patriarku diskuton për të tashmen dhe të ardhmen e shtëpive të modës së bashku me pesë fëmijët e tij. Dy të parët, Delphine dhe Antoine, kanë lindur nga martesa me Anne Dewavrin; tre të fundit, pra Alexandre, Frédéric dhe Jean, janë fryt i martesës me pianisten kanadeze Hélène Mercier. Të gjithë, përveç më të voglit (vetëm për arsye moshe), janë gjithashtu anëtarë të Bordit të Drejtorëve të LVMH-së dhe mbajnë pozicione të rëndësishme në kompanitë e grupit.

    “Formimi im në biznes filloi kur isha 9 vjeç, gjatë mëngjesit”, ka pohuar i treti nga fëmijët, Alexandre, sipas asaj që ka raportuar New York Times, duke dhënë një pasqyrë të qartë të disiplinës dhe rreptësisë me të cilën ai dhe vëllezërit e tij janë rritur. Ndërmjet studimeve në shkollat më të njohura, mësimeve të pianos dhe testeve të vazhdueshme për të përmirësuar aftësitë matematikore, që i ati i vinte zakonisht çdo mbrëmje para darkës, të gjithë fëmijët e Arnault janë edukuar që të marrin një rol drejtues në biznesin familjar.

    “E shoh veten si një ambasador të trashëgimisë dhe kulturës franceze. Ajo që krijojmë është emblematike. Është e lidhur me Versajën, me Maria Antonuanetën”, ka deklaruar patriarku, i cili, përveçse ka ndryshuar statutin për të zhvendosur kufirin e moshës për CEO-n nga 80 në 85 vjeç, ka strukturuar kompaninë në mënyrë që fëmijët e tij të mos mund të shesin aksionet e tyre për 30 vjet. Kontrolli i LVMH-së është kështu i mbyllur në duart e Arnault-ve deri në vitin 2052. Po me çfarë merren sot pesë trashëgimtarët?

    Delphine Arnault

    Lindur në vitin 1975, e vetmja grua mes pesë trashëgimtarëve, Delphine që nga shkurti 2023 është presidente dhe CEO e Christian Dior Couture. Pasi ka ndjekur studimet në EDHEC Business School në Lille dhe në London School of Economics, ajo bëri hapat e parë në botën e punës te McKinsey, për të hyrë më pas në LVMH duke punuar pranë John Galliano-s. Në vitin 2001 ajo iu bashkua Dior-it, ku, pas shtatë vitesh, mori postin e zëvendësdrejtoreshës së përgjithshme ekzekutive, një pozicion që e mbajti deri në vitin 2013, kur u emërua zëvendësdrejtoreshëe përgjithshme ekzekutive e Louis Vuitton. Dy vite më parë, ajo u bë drejtuese e markës më të rëndësishme të grupit.

    Antoine Arnault

    47 vjeç, Antoine është fëmija i dytë i Bernard Arnault. Që nga viti 2024 ai është president i Berluti, një rol që nga viti 2013 e mban edhe për Loro Piana. Njëkohësisht, ai është edhe drejtor i imazhit dhe mjedisit në LVMH. Më parë ka mbajtur disa pozita në rritje te Louis Vuitton, ku u bashkua në vitin 2000, deri sa u bë drejtor komunikimi (2007-2011). Sa i përket formimit të tij, Antoine ka marrë një diplomë në HEC Paris (École des HautesÉtudes Commerciales), një nga shkollat më prestigjioze të biznesit në Francë, si dhe një master në administrim biznesi në INSEAD.

    Alexandre Arnault

    Vetëm 33 vjeç, në shkurtin e kaluar Alexandre u emërua zëvendësdrejtor i përgjithshëm i Moët Hennessy, divizioni i verërave dhe pijeve alkoolike i LVMH-së. Pas diplomimit në Inxhinieri Informatike në Télécom ParisTech dhe marrjes së një Masteri në Kërkim dhe Inovacion në École Polytechnique, nga viti 2015 deri në 2016 ai u mor me investimet e grupit, duke luajtur një rol kyç në blerjen e Rimowa (për 800 milionë euro). Për markën e valixheve ai mbajti postin e drejtorit të përgjithshëm, për të kaluar më pas në vitin 2021 në drejtimin e Tiffany & Co. Megjithëse shumë i ri, me një karrierë të spikatur, Alexandre mund të bëhet së shpejti pjesë e bordit të drejtuesve të Moncler, nëse asambleja e aksionarëve e planifikuar për 16 prill miraton bordin e ri.

    Frédéric Arnault

    I lindur në vitin 1995, Frédéric u emërua drejtor i përgjithshëm i Loro Piana vetëm disa ditë më parë. Deri tani, djali i katërt i Bernard Arnault ishte përqendruar kryesisht te orët, duke qenë drejtor i përgjithshëm i divizionit të orëve, që përfshin markat Hublot, Zenith dhe TAG Heuer (këtë të fundit e drejtoi si drejtor i përgjithshëm nga viti 2020). Pas diplomimit për Matematikë të Aplikuar dhe të Llogaritshme në École Polytechnique (të cilën e ka ndjekur edhe babai i tij), ai bëri hapat e parë në botën e punës fillimisht te McKinsey, e më pas te Facebook (tani Meta) në departamentin e inteligjencës artificiale. Tani, nga IA-ja, ai ka kaluar te kashmiri.

    Jean Arnault

    Më i riu mes trashëgimtarëve, Jean (i lindur në vitin 1998), është i vetmi që ende nuk ka një vend në bordin e LVMH. Kjo zgjedhje ka të bëjë thjesht me moshën dhe nuk lidhet me ndonjë mungesë besimi nga ana e babait. Përkundrazi. Që nga viti 2022, ai mban postin e drejtorit të orëve për Louis Vuitton, një markë për të cilën ka punuar edhe si drejtor marketingu dhe zhvillimi për orët, si dhe më parë si asistent shitjesh (një përvojë e shkurtër, e realizuar në vitin 2017, siç tregon profili i tij në LinkedIn).

    Sa i përket formimit të tij, Jean Arnault ka marrë një Master në Inxhinieri Mekanike në Imperial College London dhe ka studiuar Matematikë Financiare në Massachusetts Institute ofTechnology (MIT). Një karrierë e ndritur, që është vetëm në fillimet e saj. / Soldout Service – Syri.net

  • Trump: Gruaja është një person që është shumë më ezgjuar se një burrë

    Presidenti Donald Trump nuk hezitoi të premten kur u pyet për të dhënë një përkufizim të fjalës “grua”, diçka që ka qenë e ndërlikuar për demokratët vitet e fundit.

    “E kam të lehtë të përgjigjem,” tha Trump. “Sepse gruaja është dikush që mund të ketë një fëmijë në rrethana të caktuara. Ajo mundet… ka një cilësi… gruaja është një person që është shumë më e zgjuar se një burrë, e kam vënë re gjithmonë.”

    Deklaratat e tij u pritën me duartrokitje dhe brohoritje nga të pranishmit në Zyrën Ovale, teksa ai iu përgjigj një pyetjeje që është kthyer në një çështje të rëndësishme kulturore.

    Progresistët u kanë mëshuar të drejtave të personave transgjinorëgjatë dekadës së fundit, duke mbështetur idenë se burrat mund të bëhen gra dhe se gjinia mund të jetë e ndryshueshme dhe jo vetëm binare. Por kjo qasje i ka vënë ndonjëherë në një pozitë të vështirë kur bëhet fjalë për përkufizimin e termave të tyre.

    Më e famshmja ishte përgjigjja e gjyqtares së Gjykatës së Lartë, Ketanji Brown Jackson, gjatë seancave të konfirmimit në vitin 2022, kur tha se nuk mund të jepte një përkufizim për fjalën “grua”.

    “Nuk mundesh?” e pyeti senatorja Marsha Blackburn (R-TN), e cila e ngriti këtë temë.

    “Jo në këtë kontekst. Nuk jam biologe,” u përgjigj Jackson, duke shtuar: “Në punën time si gjyqtare, unë trajtoj mosmarrëveshjet. Nëse ka një mosmarrëveshje për një përkufizim, njerëzit japin argumentet e tyre, unë shoh ligjin dhe marr një vendim.”

    Pyetja “Çfarë është një grua?” madje u bë titulli i një dokumentari nga komentatori konservator Matt Walsh, i cili argumenton se përkufizimet progresiste të këtij termi janë rrethore.

    Trump nuk ngurroi në këtë çështje të premten.

    “Gruaja është një person që nuk i jep një burri as edhe një mundësi suksesi,” shtoi ai, “dhe gruaja është një person që në shumë raste është trajtuar shumë keq.”

    Trump ka mbajtur një qëndrim të ashpër për ndalimin e atletëve transgjinorë që të konkurrojnë në sportet e grave, duke thënë se beson se 94% e vendit pajtohet me të në këtë çështje.

    “Ditën tjetër, një kongresist i njohur demokrat po i mëshonte faktit se burrat duhet të lejohen të konkurrojnë në sportet e grave,” tha ai. “Shpresoj që ata të vazhdojnë kështu, sepse nuk do të fitojnë më kurrë zgjedhje. Gratë janë njerëz të jashtëzakonshëm, bëjnë shumë për vendin tonë, dhe ne i duam gratë tona dhe do të kujdesemi për to.” / Washington Examiner – Syri.net

  • Rama takim me diasporën në Kretë/ ‘Pasaportë të BE-së për shqiptarët ne Greqi’

    Rama takim me diasporën në Kretë/ ‘Pasaportë të BE-së për shqiptarët ne Greqi’

    SYRI TV

    Pasi në 12 vjet, i dëboi shqiptarët nga vendi, Kryeministri Edi Rama ju ka premtuar edhe shqiptarëve që jetojnë në Greqi, pasaportën evropiane, megjithëse një pjesë e konsiderueshme e tyre, i kanë dokumentat.

    Ëndrrën evropiane, Rama ja shiti edhe shqiptarëve të Kretës, të cilët kanë braktisur atdheun për të  jetuar në një shtet të Bashkimit Europian. 

    Madje të vetmen alternativë që kryeministri, ju ofroi shqiptarëve për tu kthyer në vend, ishte paketa e maleve e cila është konceptuar, për ata shqiptarë që mund të investojnë miliona euro dhe jo për emigrantët e thjeshtë.

    Ndërsa vijoi sërish të  sulmonte, opozitën me gjuhë fyese dhe vulgare, i vetmi premtim konkret i Edi Ramës për shqiptarët e diasporës ishte hapja e një zyre konsullate në  Kretë. 

  • ODEON/ ’15 ditë prilli’, kronologjia e fundit e diktaturës, Markarian: Thirrje për reflektim

    ODEON/ ’15 ditë prilli’, kronologjia e fundit e diktaturës, Markarian: Thirrje për reflektim

    Mbrëmja e sotme në Odeon na fton të hyjmë në një univers dramatik, ku historia dhe ndërgjegjja përplasen në një nga periudhat më të errëta dhe vendimtare të Shqipërisë. “15 Ditë Prilli”, e sjellë në skenë nga regjisorja Driada Dervishi dhe e bazuar në romanin e Anisa Markarian, na vendos përballë tensionit të një kohe që po merrte fund dhe pasigurisë së një fillimi të ri.

    Në sfondin e një hekurudhe, ku punonjësit i kushtojnë rëndësi të veçantë bustit të diktatorit, shfaqja zbërthen absurditetin e një sistemi në grahmat e fundit, ku errësira dhe ligësia përzihen me zgjimet e ndërgjegjes. Këto janë 15 ditët e fundit të diktatorit, por edhe ditët e para të një demokracie të brishtë, që lind mes pikëpyetjeve për të tashmen dhe të ardhmen.
    Përmes interpretimit të aktoreve Alesia Xhemalaj, Suela Bako, Mimi Marjanaku dhe Sanije Hoti, historia merr jetë në skenë, duke na përballur me dilemat dhe kontradiktat e asaj periudhe. Si e përjetojnë personazhet këtë prag të madh ndryshimi? A është fundi i një epoke domosdoshmërisht fillimi i diçkaje të re?
    Sonte, në këtë bisedë me autoren Anisa Markarian, regjisoren Driada Dervishi dhe aktoret e shfaqjes, do të eksplorojmë jo vetëm sfidat e sjelljes së një periudhe kaq të ngarkuar në teatër, por edhe mesazhet që ajo përcjell për sot. Një reflektim mbi historinë, artin dhe njeriun.

    Autorja e romanit, Anisa Markarian, e sheh 15 Ditë Prilli jo vetëm si një histori, por si një thirrje për reflektim. Ajo thekson se një prej dëshirave të saj ka qenë që lexuesi dhe shikuesi të ndalet dhe të meditojë mbi kohën dhe ngjarjet që kanë ndodhur.Në një realitet ku e kaluara shpesh mbetet në hije ose harrohet, Markarian sjell një rrëfim që nuk kërkon vetëm të tregojë, por edhe të nxisë pyetje, ndjesi dhe ndërgjegjësim. 

    Regjisorja Driada Dervishi e ka përjetuar romanin 15 Ditë Prilli si një përmbledhje të fuqishme të 50 viteve të fundit, një histori që të jep dorë për të krijuar dhe për të rrëfyer artistikisht një epokë të tërë. Në bisedën e saj në Odeon, ajo shprehet se është përpjekur ta sintetizojë këtë përvojë të gjatë historike përmes errësirës së këtyre 15 ditëve, duke sjellë në skenë atë që populli shqiptar ka jetuar në realitet. Për Dervishin, sfida më e madhe ka qenë të kapë esencën e një kohe të ngarkuar me frikë, dhunë dhe shpresa të thyera, por edhe me momentet e vogla të dritës dhe guximit njerëzor. 

    Në këtë histori të mbushur me tension dhe ndryshime dramatike, Alesia Xhemalaj mishëron një figurë të fuqishme: një vajzë ëndërrimtare, studente e mjekësisë, e cila ngre zërin për të vërtetën, duke mos u ndikuar nga realiteti i errët që e rrethon. Në një kohë kur frika dhe nënshtrimi ishin normë, ajo përfaqëson shpirtin e pamposhtur, një zë rebel që nuk pranon të heshtë. Përmes interpretimit të saj, Xhemalaj sjell në skenë një personazh që lufton jo vetëm për të drejtën, por edhe për dashurinë—dy ndjenja që shpesh përplasen me diktaturën dhe kufizimet e saj. Ajo mbetet e pathyeshme, edhe kur përballet me presionin dhe pasigurinë e një epoke që po shkatërrohej.

    Në mozaikun e errët të “15 Ditë Prilli”, një nga figurat më të frikshme është ajo e kryeinfermieres, një grua e ftohtë dhe bashkëpunëtore e mjekut në vrasjen e pacientëve. Ajo nuk është vetëm një hallkë në sistemin e dhunës, por një simbol i njeriut që, i zhveshur nga ndjenja dhe moraliteti, bëhet pjesë e krimeve me një qetësi tronditëse.
    Aktorja Suela Bako, përmes interpretimit të saj të fuqishëm, sjell në skenë këtë personazh kompleks, duke na vënë përballë pyetjes: Si mund të bëhet njeriu kaq i pamëshirshëm, edhe kur është plotësisht i vetëdijshëm për të keqen që po kryen? 

    Në një kohë kur realiteti ndahej mes heronjve pozitivë dhe negativë, reporteri që sjell Mimi Marjanaku në skenën e Odeonit është një figurë e pazakontë një zë mes errësirës, që dëshmon atë që ndodh në një epokë të vështirë. Përmes këtij personazhi, ajo prek një nga plagët më të mëdha të diktaturës: asgjësimin e shpirtrave për të cilët regjimi nuk njohu mëshirë.

    Në dramën e thellë të 15 Ditë Prilli, një nga figurat më prekëse është ajo e një nëne që ka humbur djemtë e saj dhe jeton mes dhimbjes dhe pasigurisë, pa e ditur kurrë se ç’u bë me fatin e tyre. Ky është roli që sjell në skenë Sanije Hoti, një portret i nënave të një epoke ku humbjet nuk kishin përgjigje, vetëm heshtje dhe ankth.

    15 Ditë Prilli nuk është thjesht një shfaqje, por një rrëfim i fuqishëm që na sfidon të reflektojmë mbi historinë dhe kujtesën. Përmes interpretimit të aktorëve dhe vizionit të regjisores Driada Dervishi, kjo vepër na fton të ndjejmë peshën e një epoke dhe të pyesim veten për të shkuarën, të tashmen dhe atë që na pret. Një histori e errët, por e domosdoshme për t’u treguar.

    Anisa Markarian

    Driada Dervishi

    Alesia Xhemalaj

     

    Suela Bako

  • Ja tri ushqimet që gratë nuk duhet t’i shmangin pas moshës 30-vjeçare

    Ja tri ushqimet që gratë nuk duhet t’i shmangin pas moshës 30-vjeçare

    Gastroenterologu, Saurabh Sethi, rekomandon që gratë pas moshës 30-vjeçare të përfshijnë tri superushqime në dietën e tyre, për të përmirësuar shëndetin dhe cilësinë e jetesës. Lulelakra, kërpudhat dhe çaji jeshil janë ushqime të pasura me vlera ushqyese, që ofrojnë përfitime të shumta për trupin dhe trurin.

    Lulelakra është një nga ushqimet kryesore që mjeku Sethi rekomandon. Ajo është e pasur me lëndë ushqyese që ndihmojnë në forcimin e trurit dhe humbjen e peshës. Lulelakra gjithashtu ndihmon në detoksifikimin e trupit dhe përmban antioksidantë dhe përbërës që zvogëlojnë rrezikun e sëmundjeve neurodegjenerative, si Alzheimeri. Kjo për shkak të squfrit që ndihmon në largimin e metaleve të rënda nga trupi.

    Studimet tregojnë se kërpudhat mund të kenë ndikim pozitiv në shëndetin e trurit, veçanërisht për gratë, të cilat kanë dy herë më shumë gjasa se burrat të zhvillojnë Alzheimeri. Sipas mjekut Sethi, ngrënia e kërpudhave disa herë në javë mund të zvogëlojë rrezikun për këtë sëmundje me deri në 60%. Kërpudhat janë të pasura me substanca që ndihmojnë në mbrojtjen e trurit dhe forcimin e funksioneve të tij.

    Çaji jeshil është një tjetër superushqim që mjeku Sethi rekomandon për gratë pas moshës 30 vjeçare. Ky çaj është i njohur për përmbajtjen e tij të ‘polifenolëve’, të cilët janë anti- inflamatorë dhe mund të ndihmojnë në parandalimin e sëmundjeve të lidhura me plakjen. Çaji jeshil gjithashtu ka vërtetuar shkencërisht se mund të reduktojë simptomat e demencës dhe të ndihmojë në menaxhimin e ankthit dhe humbjen e peshës falë përbërësve të tij si kafeina dhe L-tiamina.

    Përveç këtyre tre superushqimeve, mjeku Sethi gjithashtu rekomandon heqjen e ushqimeve të përpunuara, të skuqura dhe pijet joalkoolike nga dieta, pasi këto ndikojnë negativisht në florën mikrobike dhe shëndetin në përgjithësi. Syri.net-Bovary.gr.

  • ‘Ne kemi miratuar propozimin e Egjiptit dhe Katarit për armëpushimin në Gaza’, thotë Hamasi

    ‘Ne kemi miratuar propozimin e Egjiptit dhe Katarit për armëpushimin në Gaza’, thotë Hamasi

    Një zyrtar i lartë i Hamasit tha sonte se organizata rebele ka miratuar një propozim të ri për një armëpushim në Rripin e Gazës.

    Ky propozim u paraqit nga ndërmjetësit, duke i kërkuar edhe Izraelit ta mbështesë atë dhe duke paralajmëruar se shkelja e saj përbën një ‘vijë të kuqe’, për qeverinë e Netanyahut.

    “Dy ditë më parë ne morëm një propozim nga vëllezërit tanë ndërmjetësues të Egjiptit dhe Katarit. Ne e miratuam atë. Shpresojmë që Izraeli të mos sjellë pengesa,” tha Khalil al-Haya.

    Megjithatë, Hamasi paralajmëroi se nuk do të çarmatoset për sa kohë të ekzistojë pushtimi izraelit mbi territoret palestineze. Syri.net-CNN.gr.

     

  • Plagosje me thikë në Pogradec një person në spital, autori në kërkim

    Plagosje me thikë në Pogradec një person në spital, autori në kërkim

    Një plagosje me thikë ka ndodhur mbrëmjen e sotme në Pogradec, në lagjen nr. 3, pranë një dyqani. Sipas informacioneve paraprake, 36-vjeçari M. T. është goditur me mjet prerës pas një konflikti të çastit me shtetasin L. O. për motive të dobëta.

    I plagosuri është dërguar menjëherë në spital dhe ndodhet jashtë rrezikut për jetën.

    Ndërkohë, autori është shpallur në kërkim, ndërsa forcat e policisë po vijojnë kontrollet për kapjen e tij.
    Grupi hetimor, po punon për zbardhjen e plotë të rrethanave të ngjarjes dhe dokumentimin ligjor të saj.

  • Kreu i PD, Sali Berisha uron besimtarët muslimanë për Natën e Bajramit

    Kreu i PD, Sali Berisha uron besimtarët muslimanë për Natën e Bajramit

    Lideri i Partisë Demokratike, Sali Berisha, ka bërë një postim në Facebook ku ka uruar besimtarët muslimanë për Natën e Bajramit, festën që shënon përfundimin e agjërimit të muajit të Ramazanit.

    Ai ka theksuar se ky është një moment për të nderuar sakrificën dhe përkushtimin e besimtarëve muslimanë, duke lutur që sakrificat e tyre të pranohen dhe të kthehen në mirësi për ata, familjet e tyre dhe kombin shqiptar. Berisha ka uruar të gjithë besimtarët e Zotit për këtë ditë të shënuar.

    Berisha:

    Sonte Nata e Bajramit!
    Të dashur miq, sonte besimtarët musliman nderojnë dhe kremtojnë përfundimin e agjerimit të muajit të Madhnueshëm të Ramazanit. 
    Me këtë rast le të urojmë nga zemra të gjithe ata që agjeruan, por dhe të gjithë besimtarët musliman dhe besimtarët e Zotit që i Gjithëfuqishmi të pranojë sakrificën e tyre dhe ta kthej në mirësi për ata, familjet e tyre dhe kombin shqiptar.

  • Pas vizitës së dështuar në Izrael, Milorad Dodik njofton arritjen e tij në Rusi

    Pas vizitës së dështuar në Izrael, Milorad Dodik njofton arritjen e tij në Rusi

    Presidenti i entitetit të Republikës Serbe, Milorad Dodik, njoftoi në platformën X se “ka arritur”, por nuk specifikoi nëse po fliste për kthimin e tij në Bosnjë dhe Hercegovinë pas një vizite të dështuar në Izrael. Sipas burimeve të pavarura të konfirmuara për Klix.ba, Dodik ndodhet aktualisht në Moskë, ku pritet të ketë një takim me presidentin rus, Vladimir Putin.

    Dodik, për të cilin është shpallur një fletarrest ndërkombëtar, anuloi papritur një vizitë në Rusi që ishte planifikuar për më 19 mars. Pavarësisht mungesës së një konfirmimi zyrtar, është e qartë se ai ka udhëtuar drejt Moskës pas zhvillimeve të fundit.

    Gjykata e Bosnjës dhe Hercegovinës kërkoi para disa ditësh lëshimin e një fletarresti ndërkombëtar për Dodik, ndërkohë që vendimi i Interpolit për këtë çështje ende nuk është marrë. Prokuroria e Bosnjës dhe Hercegovinës po zhvillon një hetim ndaj Dodik për dyshimin për kryerjen e veprës penale të sulmit ndaj rendit kushtetues të vendit. Përveç Dodik, në hetime janë edhe Radovan Viskoviq dhe Nenad Stevandiq.

  • Ina Zhupa prezanton programin e PD-së në Sarandë: PS e ka nënvlerësuar rrethin tonë, garanci te Berisha

    Ina Zhupa prezanton programin e PD-së në Sarandë: PS e ka nënvlerësuar rrethin tonë, garanci te Berisha

    Drejtuesja Politike e rrethit Sarandë, Ina Zhupa, hapi fushatën dhe prezantoi kandidatët e PD-ASHM: Shqipërisë i duhet programi që ka paraqitur Partia Demokratike.

    Në fjalën e saj, Ina Zhupa theksoi: “Jam e nderuar që përfaqësoj 4 bashki plot vlera, si Saranda, Finiqi, Delvina dhe Konispoli, duke më besuar demokratët me votë dhe duke marr mbështetjen e kryetarit të PD, Prof. Dr. Sali Berisha”.

    Fjalimi i Zhupës

    Unë po rinovoj kontratën me ju me besimin e plotë që kësaj radhe do ju përfaqësoj si deputete e maxhorancës dhe do bëjmë shumë për rrethin tonë. Nuk dua të kem vetëm fjalën në mbrojtje të interesave tuaja, por ka ardhur koha të veprojmë dhe të bëjmë realitet programin tonë.

    Partia Socialiste e ka nënvlerësuar rrethin tonë, duke mos vënë asnjë përfaqësues të 4 bashkive tona në listën e mbyllur si një shenjë respekti ndaj këtyre qytetarëve që ju kanë dhënë mandate lokale dhe qendrore.

    Është skandaloze që në 2025 të premtosh ujë 24 orë, në atë vend që cilësohet si “Maldivet e Europës” dhe njëkohësisht të premtosh pasaportë europiane.

    Pasaporta europiane arrihet vetëm kur arrihen standardet europiane. Nuk mund të kesh shëndetësi me standarde afrikane dhe të premtosh pasaportë europiane. Nuk mund jesh i rankuar i  fundit në testin ‘Pisa’ për cilësinë e arsimit dhe të premtosh pasaportë europiane.

    Nuk mund të kesh qytete pa ujë, pa drita, pa rrugë, pa menaxhim mbetjesh dhe të premtosh pasaportë europiane.

    Gënjeshtra bajate të ricikluara 12 vite, ndërkohë që shqiptarët kanë tmerr tashmë nga fjala ‘pasaportë’ se i kujton vetëm ikjen e familjarëve, ikjen e miqve, shpopullimin e vendit.

    Si kundërpërgjigje nuk do marr dot votën e shqiptarëve brenda dhe jashtë vendit.

    Vota e diasporës do jetë vota e rotacionit politik. Vetëm për qarkun tonë janë regjistruar mbi 19 mijë emigrantë ku do prodhojnë të paktën një mandat më shumë për koalicionin PD-ASHM. Bashkë me votat brenda vendit, ne shkojmë me bindjen e plotë se në këto zgjedhje Vlora del minimumi barazim, 6 me 6, falë votës tuaj dhe votës së diasporës shqiptare.

    Sepse të gjithë janë të vetëdijshëm që Shqipërisë i duhet programi që ka paraqitur Partia Demokratike.

    Partia Demokratike ka planin për turizmin ku përfitojnë qytetarët, ekonomitë familjare, bizneset e vogla dhe të mesme, ku plazhet janë për të gjithë, dhe jo turizmi i vilave të oligarkëve.

    Partia Demokratike ndalon vjedhjet strategjike të pronave të banorëve në emër të klientëve të pushtetit, që kanë privatizuar çdo cep të vijës bregdetare.

    Partia Demokratike vendos takse të sheshtë 10% mbi kapitalin.

    Zero taksa mbi profesionet e lira dhe biznesin e vogël.

    Ne ulim nga 15% në 2% të taksës së shitjes së pronës.

    Ne heqim  ‘Taksën Rama’ mbi karburantet. Çdo litër karburant do të kushtojë të paktën 24 lek më lirë.

    Shqiptarët, të cilëve iu premtua shëndetësi falas, paguajnë sot për kujdesin e tyre shëndetësor, 5 herë më shumë se gjermanët, 3 herë më shumë se italianët. Paguajnë nga xhepi i tyre 60 përqind të shpenzimeve që nevojiten për sistemin shëndetësor.

    Buxheti për shëndetësinë do dyfishohet.

    Do ndërpriten menjëherë dhe do vendosen para ligjit të gjithë aktorët e krimit të koncesioneve në sistemin e shëndetësisë që i kushtojnë buxhetit 300 milionë euro.

    Unë kam bërë betejë për identitetin dhe trashëgiminë kulturore dhe garantoj këtu para jush që ne ndalojmë koncesionet në trashëgimi, ne anulojmë koncesionin e Butrintit dhe e kthejmë kulturën në motor për turizmin.

    Të gjitha këto janë plotësisht të realizueshme nëse përdor paratë publike për ti shndërruar në të mira publike dhe jo për të pasuruar veten dhe klientët. Ne kemi garancinë se kryeministri i ardhshëm Sali Berisha, ka pikë të fortë mbajtja e fjalës. Sali Berisha ka treguar që të pamundurën e bën të mundur, që mban fjalën e dhënë, që punon për shqiptarët dhe arritjet më të mëdha për vendin kanë qenë me të kryeministër.

    Ndaj të votojmë si njësha, të votojmë Nr 1!

    Të nisim rrugëtimin e fitores, duke marrë përsipër me përgjegjësi ndërtimin e një Shqipërisë Madhështore!