Analisti Lorenc Vangjeli i ftuar në një studio televizive ka deklaruar se ngjarja e 21 janarit është një varr i hapur dhe duhet një hetim sa në linjën penale ashtu edhe atë politike.
Duke analizuar thërritjen e Berishës në SPAK për 21 janarin, Vangjeli theksoi se ajo çka ka ndodhur nga viti 2011 deri më sot tregon shumë për trajektoren politike të Partisë Demokratike.
Ai shpjegoi se nga eksponentët kryesorë të Partisë Demokratike, nisur nga Sali Berisha nuk është thënë e vërteta për 21 janarin.
“Ka detyrën dhe detyrimin që të rrëfejë të vërtetën e tij. Çfarë ka ndodhur në 21 janar shpjegon trajektoren shumë të çuditshme, luhatjet, dashuritë, urrejtjet e këtyre personazheve të cilët veç e veç nuk ka dhënë të vërtetën.
Ajo që ndodhi shpjegon shumë dinamika në Partinë Demokratike në pjesën e fundit të mandatit të saj, 2011-2013,”, tha Vangjeli.
Analisti Vangjeli vuri në dukje se 21 janari mbetet një varr i hapur dhe se hetimi duhet të përfshijë atë penal, politik por edhe moral.
“Shoqëria shqiptare ia ka borxh edhe vetvetes këtë vrasje ndërgjegje. Është një varr i pambyllur. Në këtë proces unë nuk besoj se mund ndahet linja e hetimit penal, linja e hetimit politik që nuk e bën drejtësia dhe linja e hetimit moral. Vetëm në këtë mënyrë, shoqëria jonë e cila nuk ka pasur këllqe të bëjë revolucion do të jetë e iluminuar të bëjë evolucion”, tha Vangjeli.
“Është një varr i pambyllur”/ ’21 janari’, reagon ashpër analisti: Ia ka borxh edhe vetvetes, këtë vrasje ndërgjegje
