Kryetari i delegacionit të Partisë Socialdemokrate të Austrisë në Parlamentin Evropian, Andreas Schieder, u shpreh se pret një reagim të qartë nga Komisioni Evropian ndaj zhvillimeve të fundit në Serbi.
Në një deklaratë për agjencitë APA dhe DPA, Schieder tha se skenat nga Serbia janë tronditëse dhe se qytetarët kanë dalë paqësisht në rrugë për muaj të tërë për shkak të ngopjes me sistemin e korruptuar të udhëhequr nga Aleksandar Vuçiç.
Ai shtoi se qytetarët nuk duan më të tolerojnë abuzimin me pushtetin, që sipas tij, nuk kushton vetëm para, por edhe jetë njerëzore, ndërsa Vuçiç po përgjigjet me dhunë në vend që të marrë përgjegjësi.
Raporti i APA/dpa thekson se për më shumë se nëntë muaj, mijëra qytetarë kanë protestuar rregullisht kundër qeverisë së Vuçiçit. Shkëndija e fundit e protestave lidhet me shembjen e mbikalimit të rinovuar të stacionit hekurudhor në Novi Sad më 1 nëntor 2024, ngjarje në të cilën humbën jetën 16 persona.
Ekspertët e pavarur dhe opozita fajësojnë tragjedinë për neglizhencë dhe korrupsion në qeverinë e Vuçiçit.
Sipas mediave të pavarura dhe organizatorëve të protestave, përshkallëzimi i dhunës së fundit ka ardhur si pasojë e provokimeve nga partia SNS e Vuçiçit, e mbështetur nga policia dhe shërbimet sekrete. Protestuesit e kritikojnë qeverinë si të korruptuar dhe autoritare dhe kërkojnë dorëheqjen e Vuçiçit dhe organizimin e zgjedhjeve të reja.