Emërimi i gjyqtarit Asim Vokshi në Gjykatën Kushtetuese ka hapur një front të ri të luftës politike dhe institucionale në Tiranë, i cili po shpalos në mënyrë të qartë mekanizmin e presionit të pushtetit ndaj drejtësisë. Ka dyshime të forta se ky është një plan të orkestruar nga Presidenti Bajram Begaj dhe Kryeministri Edi Rama, të cilët, përmes media-platformave të kontrolluara nga mazhoranca, kanë nisur një fushatë diskreditimi dhe presioni publik për të minuar legjitimitetin e Vokshit dhe për të frenuar hyrjen e tij në Kushtetuese. Goditja kryesore erdhi nga Top Channel më 9 nëntor, ku u publikua një raportim që pretendonte se kryetari i KED-it, Sokol Sadushi, kishte “fshehur” informacione të klasifikuara për Vokshin, kinse të ardhura nga AKSIK, duke e paraqitur gjyqtarin si të lidhur me shërbime inteligjente. Por prova e vetme e kësaj akuze u rrëzua nga dokumentet që vetë televizioni publikoi një ditë më vonë, materiale që tregonin se KED jo vetëm kishte verifikuar informacionin, por edhe e kishte rrëzuar zyrtarisht si të pabazuar. Pavarësisht kësaj, fushata nuk u ndal. Nga sulmet publike te presionet në prapaskenë dhe deri te përpjekjet për të shfrytëzuar konfliktin brenda vetë sistemit gjyqësor, mazhoranca duket se ka ngritur një plan sistematik për të bllokuar afrimin e një gjyqtari që nuk konsiderohet i kontrollueshëm.
Reagimi i Vokshit dhe KED
Gjyqtari Asim Vokshi i cilësoi akuzat e Top Channel si të pavërteta dhe si një përpjekje për të penguar emërimin e tij në Gjykatën Kushtetuese. “Fakti që bëhet scoop tani, flet vetë për qëllimet dashakeqe dhe të paligjshme me të cilat më bie rasti të përballem, vetëm për faktin se ndokujt nuk i pëlqen profili im për në Gjykatën Kushtetuese,” tha ai. Çfarë e bën situatën edhe më të çuditshme është se vetë dokumentet e publikuara nga televizioni – një faksimile e vendimmarrjes së KED – bien në kontradiktë me raportimin e tij, ndërsa tregojnë se Këshilli jo vetëm që e ka verifikuar dokumentin e AKSIK-së, por ka kryer edhe një hetim administrativ dhe e ka rrëzuar atë si të pabazuar. KED reagoi gjithashtu të hënën, duke e cilësuar të pavërtetë raportimin e Top Channel. “Ky publikim mbështetet mbi të dhëna të rreme, të marra nga burime të dyshimta, në kufijtë e shkeljeve penale,” thuhet në njoftimin për mediat. I kontaktuar nga BIRN, drejtori i informacionit në Top Channel, Robert Rakipllari, tha se televizioni i qëndronte vërtetësisë së raportimit të tij.
Përplasja për zgjedhjen në Kushtetuese
Kur krijohet një vend vakant, Gjykata e Lartë shpall thirrjen për aplikime dhe KED vlerëson kandidatët që plotësojnë kushtet ligjore dhe kriteret profesionale, përfshirë përvojën mbi 15-vjeçare në fushën e drejtësisë, integritetin moral dhe etik, si dhe mungesën e lidhjeve politike apo dënimeve penale. Nëse Gjykata e Lartë nuk arrin shumicën 3/5 për zgjedhjen e një anëtari të Gjykatës Kushtetuese brenda afatit 30-ditor, kandidati i renditur i pari në listën e Këshillit të Emërimeve në Drejtësi shpallet automatikisht i zgjedhur. Gjyqtari Asim Vokshi u shpall fitues i pozicionit vakant në Gjykatë Kushtetuese më 30 shtator. Nga votimi i fshehtë në Gjykatën e Lartë, kandidatja Naureda Llagami kishte siguruar 8 vota, Vokshi 6 vota, ndërsa një votë u shpall e pavlefshme. Me arsyetimin se asnjëri nuk arriti të sigurojë 3/5 e votave, u shpall fitues Vokshi, i cili në pikëzimin e KED kishte siguruar vendin e parë.
Pikëzimi nga KED, një organ kolegjial me 9 anëtarë i përbërë nga gjyqtarë e prokurorë të të gjitha niveleve përfshi 2 anëtarë të Gjykatës Kushtetuese dhe që është përgjegjës për verifikimin e kushteve ligjore, integritetit dhe vlerësimin profesional të kandidatëve për Gjykatën Kushtetuese, është një nga ndryshimet thelbësore të reformës në drejtësi. KED është vlerësuesi i kandidatëve për në Kushtetuese dhe pikëzimi e bën të pamundur që organet emëruese, Parlamenti, Presidenti dhe Gjykata e Lartë të bllokojnë procesin. Ndërkohë, në rastin e Vokshit që u përzgjodh nga pikëzimi, konkurrentja e tij Llagami ngriti pretendime për votën e pavlefshme, me argumentin se vullneti i zgjedhësit ishte i qartë në favor të saj.
Ajo u ankua fillimisht në Gjykatën Administrative dhe më pas edhe në Gjykatën Kushtetuese me kërkesë për pezullimin e zbatimit të vendimit që shpalli fitues Vokshin. Gjykatat Kushtetuese do ta shqyrtojë sot ankesën e LLagamit. Gjykata Administrative shpalli moskompetencë. E pyetur për procedurën e KED, Llagami tha se: “Nuk kam asnjë informacion dhe nuk kam si të kem informacion. Kjo është retorikë e mediave”. Lidhur me votën e pavlefshme, Gjykata e Lartë këmbënguli në vendimmarrje të drejtë. Ajo sqaroi se vota e pavlefshme për Llagamin kishte shenjë të dytë që cënonte fshehtësinë e saj. “Ky parim cilësohet si një garanci substanciale që siguron që asnjë gjyqtar të mos ndjehet i ekspozuar, i identifikueshëm apo i ndikuar nga mënyra si voton”, arsytoi Gjykata e Lartë në një deklaratë për shtyp.
Raporti kontradiktor i Top Channel
Burimi i raportit që po përdoret në këtë përplasje është Autoriteti Kombëtar për Sigurinë e Informacionit të Klasifikuar (AKSIK), një institucion në varësi të Kryeministrit. AKSIK, i njohur më parë si DSIK, është një nga institucionet kryesore që u përdor në procesin e vetingut për kontrollin e figurës së gjyqtarëve dhe prokurorëve, duke verifikuar nëse ata kanë pasur kontakte të papërshtatshme me krimin e organizuar. Megjithatë, gjatë procesit të vetingut, më shumë se një herë, raportet e ardhura nga ky institucion u rrëzuan si të pabaza nga Komisioni i Pavarur i Kualifikimit apo Kolegji i Posaçëm i Apelimit. Në disa raste, AKSIK dështoi të raportonte problemet e figurës së magjistratëve, që u gjetën më pas nga hetimet administrative. Në publikimin fillestar të datës 9 nëntor, Top Channel këmbënguli se kishte dokumente që provonin se KED kishte lejuar pjesëmarrjen e Vokshit në garë, edhe pse, sipas tij, para se të merrej vendimi, kishte informacione se gjyqtari ndodhej në kushtet e pazgjedhshmërisë.
“Por me gjithë informacionin që duhej të ishte lexuar më pas nga KED si kriter ndalues, të dhënat nuk u vlerësuan, nuk u panë dhe u anashkaluan gjatë vlerësimit, dhe gjyqtari Asim Vokshi u listua më 17 qershor 2025 për të vijuar garën”, thuhej në raportimin e datës 9 nëntor. Por një faksimile e publikuar nga vetë televizioni të hënën, më 10 nëntor, që sipas pretendimit “vërteton përcjelljen e të dhënave sekrete për gjyqtarin e lartë”, në fakt referon të kundërtën. Në faksimile bëhet e qartë se informacioni kishte ardhur pas vendimit të KED për të lejuar garimin e Vokshit, të marrë më 17 qershor, dhe po ashtu aty thuhet se KED dhe anëtarët e saj kishin kryer hetimet dhe verifikimet e kërkuara. “Me qëllim verifikimin e informacioneve të mësipërme,
Këshilli i Emërimeve në Drejtësi kreu veprimtarinë hetimore administrative të nevojshme për rastin konkret… duke përfshirë edhe takime të drejtpërdrejta të anëtarëve të caktuar të Këshillit të Emërimeve në Drejtësi me përfaqësues të institucioneve ligjzbatuese,” thuhet në pasazhin e faksimiles që Top Channel publikoi. KED shprehet po aty se pas këtij procesi u vendos që vendimmarrja për lejimin e garimit të Vokshit në Kushtetuese nuk cenohej. “Nuk ndodhemi përpara kushteve të rishikimit të Vendimit nr. 14, datë 17.06.2025,” thuhet në dokumentin e referuar nga media – të cilin, kjo e fundit, e ka lexuar si provë për pretendimet e ngritura. I pyetur nga BIRN, Vokshi tha se e shihte veten përballë një fushate “të orkestruar shpifjesh, që ka vetëm një qëllim – të njollosë procesin dhe ta delegjitimojë atë”.
Ai vuri në dukje se figura e tij ishte verifikuar dy herë të tjera në pesë vitet e fundit, gjatë procesit të vetingut dhe kur garoi për në Gjykatën e Lartë. “Unë jam vetuar në procesin e vettingut dhe gjithashtu edhe në procedurën e konkurrimit për në Gjykatën e Lartë, dhe asnjëherë nuk kam pasur as të dhënën apo hamendësimin më të vogël për të tilla aludime haluçinante,” tha ai. KED reagoi të hënën duke e cilësuar raportimin të pavërtetë dhe në shkelje të legjislacionit. “Publikimi i djeshëm përbën një akt të papërgjegjshëm, që cenon rëndë integritetin e magjistratëve,” tha KED. “Përhapja e të dhënave të klasifikuara ose interpretimi i shtrembëruar i tyre përbën shkelje të ligjit dhe dëmton besimin e publikut te institucionet kushtetuese,” përfundoi Këshilli.
Sulmi i organizuar Begaj-Rama nëpërmjet mediave për të bllokuar gjyqtarin kushtetues Vokshi, ja si kryeministri dhe…
