Ish-deputeti i PS-së emërohet drejtor i Postës Shqiptare

Ish-deputeti i Partisë Socialiste, Etjen Xhafaj, është emëruar Drejtor i Përgjithshëm i Postës Shqiptare. Vendimi është bërë zyrtar ditën e sotme, ndërsa Xhafaj do të drejtojë institucionin publik që mbulon shërbimin postar dhe logjistikën shtetërore në të gjithë territorin e vendit. Xhafaj ka mbajtur më herët disa poste të rëndësishme në administratën shtetërore, përfshirë atë të zëvendësministrit të Brendshëm, si dhe deputet i PS-së në Kuvendin e Shqipërisë. Ai është përfshirë në disa procese të rëndësishme të reformës në administratë dhe digjitalizimit të shërbimeve publike. Emërimi i tij në krye të Postës Shqiptare shihet si pjesë e një riorganizimi të brendshëm të institucionit, që synon modernizimin dhe zgjerimin e shërbimeve postare dhe financiare për qytetarët.