Aksionet e themeluesit të Oracle, Larry Ellison, u rritën me 40% në tregtinë e hershme, duke e bërë pasurinë e tij 393 miliardë dollarë, pak përpara Elon Musk-ut, i cili zotëron 384 miliardë dollarë.
Larry Ellison, miliarderi amerikan i teknologjisë, ka kaluar Elon Musk si njeriu më i pasur në botë pas rritjes së ndjeshme të aksioneve të kompanisë që ai themeloi, Oracle, në tregtinë e hershme të së mërkurës.
Pas rezultateve financiare më të mira se pritshmëritë, aksionet e Oracle u rritën mbi 40%, duke i dhënë vlerë 340 dollarë secilit aksion dhe duke vlerësuar kompaninë në 958 miliardë dollarë. Pjesa e Ellison në kompani, 41%, arrin vlerën e 393 miliardë dollarëve, pak më shumë se pasuria e Elon Musk prej 384 miliardë dollarësh, sipas Bloomberg Billionaires Index.
Kjo rritje e aksioneve është më e madhja në një ditë në historinë e Oracle dhe po ashtu shënon rritjen më të madhe të pasurisë në një ditë në indeksin e Bloomberg. Ellison dhe Musk qëndrojnë shumë përpara Mark Zuckerberg dhe Jeff Bezos.
81-vjeçari Ellison ka edhe burime të tjera të pasurisë, përfshirë pjesëmarrjen në Tesla, një skuadër lundrimi, turneun e tenisit Indian Wells dhe një ishull në Havai. Musk, i njohur për marrëdhënie kontradiktore në botën e biznesit dhe politikës, ka një lidhje të ngushtë me Ellison, i cili shpesh përshkruhet si mentor i tij.
Ellison ishte anëtar i bordit të Tesla midis 2018 dhe 2022 dhe investoi 1 miliard dollarë në blerjen e Twitter-it nga Musk – i cili më pas u riemërua X. Sipas biografisë së Musk nga Walter Isaacson, kur CEO i Tesla kërkoi investim nga Ellison për Twitter, Ellison pranoi të investonte një miliard dollarë ose ‘çfarëdo që ju rekomandoni’. Musk është vizitor i shpeshtë në ishullin e Ellison në Havai, Lanai.
Oracle përbën pjesën më të madhe të pasurisë së Ellison dhe vlera e saj u rrit nga kërkesa e kompanive të inteligjencës artificiale për shërbimet cloud të Oracle, që ofrojnë kapacitet kompjuterik për firma si OpenAI, zhvillues i ChatGPT.
Musk, CEO i Tesla dhe pronar i kompanisë raketore SpaceX, u bë njeriu më i pasur në botë për herë të parë në 2021, sipas Bloomberg, përpara se ta humbiste këtë vend ndaj Bezos dhe miliarderit francez Bernard Arnault. Ai e rikuperoi këtë titull vitin e kaluar, por pas vetëm 300 ditësh, e ka humbur sërish përballë Ellison.