Violina e parë e shkencëtarit të njohur Albert Ajnshtajn, të cilën ai u detyrua ta fshihte për t’i shpëtuar nazistëve, do të dalë në ankand në Mbretërinë e Bashkuar me një çmim fillestar prej 300,000 £ (rreth 345,800 €).
Fizikani e bleu këtë instrument pak para se të largohej nga Mynihu në mes të viteve 1890 për të studiuar në Zvicër. Ai luajti mbi këtë violinë gjatë adoleshencës dhe edhe si i rritur, ndërsa zhvillonte teorinë e relativitetit.
Violina ka të gjitha pjesët origjinale, përfshirë telat, laku i bishtit dhe vida e akordimit, dhe mban një etiketë të prodhuesit të Mynihut. Përveç instrumentit, ankandi ofron edhe sediljen e biçikletës së Ajnshtajnit dhe një libër mbi filozofinë e Dekartit dhe Spinozës, i nënshkruar dy herë nga vetë Ajnshtajni.
Sendet kanë qenë në pronësi të familjes së tij për 70 vjet dhe tani po shiten nga ankandisti Dominic Winter në Cirencester, Gloucestershire. Violina, së bashku me biçikletën dhe librin e filozofisë, ia kishte dhënë mikut të tij Max von Laue në vitin 1932, për t’i shpëtuar persekutimit nazist, dhe më pas kaluan te Margaretha Homrich nga Braunschweig.
Ajnshtajni filloi të luante violinë në moshën pesë vjeç dhe e konsideronte muzikën një pasion të madh; madje ka deklaruar se do të kishte ndjekur një karrierë muzikore nëse nuk do të ishte bërë fizikant.