Afati i dhënë dekanit dhe policisë nga studentët që bllokuan Fakultetin e Filozofisë në Novi Sad skadoi në orën 22:00, duke ndezur përplasjen mes protestuesve dhe forcave të rendit. Përpara se koha të mbaronte, dikush nga turma u tha oficerëve të policisë përmes një megafoni se kishin vetëm 10 minuta për t’u larguar, ndërsa menjëherë pas kësaj shpërtheu një përleshje e dhunshme.
Sipas raportimeve, u përdor sprej me piper dhe pati konfrontime trup më trup mes policisë dhe qytetarëve në hyrje të kolegjit. Turma brohoriste “kujdesuni” ndërsa policia kaloi mes tyre, me qytetarët që mbanin duart lart. Në vendngjarje mbërritën edhe forcat e Xhandarmërisë, drejt të cilëve protestuesit hodhën objekte. Situata u përshkallëzua shpejt, me policinë që rrethoi protestuesit nga të gjitha anët, duke krijuar kaos.
Një veteran ushtarak raportoi se kishte marrë një plagë në hundë nga një mburojë policie, ndërsa të tjerë i drejtoheshin oficerëve me akuza për tradhti, teksa turma brohoriste “turp të keni”. Dekani i fakultetit përsëriti se nuk ndihej i kërcënuar apo i pasigurt, duke dhënë këtë si përgjigje zyrtare ndaj studentëve.
Ndërkohë, përpara hyrjes së fakultetit është vendosur një kordon policor me helmeta dhe mburoja. Në vijën e parë ndodhen veteranët ushtarakë, ndërsa pas tyre studentë dhe qytetarë, që vazhdojnë të thërrasin “administrata jashtë”. Situata mbetet e tensionuar, me të rinj përballë forcave të rendit, teksa policia ka ngritur mburojat dhe turma përgjigjet duke kërkuar “lironi studentët dhe ulni mburojat”.