Studentët në Serbi, të përfshirë në protestat e fundit, po përballen me presion të madh, duke u përpjekur të vazhdojnë studimet ndërkohë që përjetojnë kërcënime, dhunë dhe arrestime.
Sipas një reportazhi të realizuar nga gazetaret, studentët kanë mbetur jashtë ambienteve të fakulteteve, duke marrë me vete edhe krevatet dhe sendet personale që kanë përdorur për muaj me radhë.
Shumë prej tyre janë të detyruar të vendosin nëse do të bojkotojnë provimet ose do t’i japin përparësi detyrimeve akademike. Një studente tha: “Unë vendosa të bojkotoj provimet, por secili duhet të vendosë për vete. Disa kolegë ndihen të detyruar të i japin provimet.”
Studentët e tjerë shprehin shqetësim mbi pasojat psikologjike të kësaj situate. Ata thonë se ndihen të lodhur dhe të pasigurt, ndërsa pyetja se a ka vlere përpjekja e tyre në protestë mbetet e pranishme. Prof. dr Nevena Čalovska Hercog thekson se këto ndjenja janë të natyrshme dhe mund të kuptohen si një “hap i ndërmjetëm në një proces më të gjatë”, duke inkurajuar studentët të mos humbasin motivimin.
Ndërkohë, universitetet po përpiqen të pastrojnë godinat dhe të paraqesin kthimin në fakultete si një normalizim të situatës. Por studentët aktivë në protesta, si Emilija Milenković, thonë se është e pamundur të përqendrohen në mësim për shkak të arrestimeve, dhunës dhe stigmatizimit në media.
Ministria e Arsimit nuk ka ofruar një përgjigje mbi mundësinë e mbështetjes psikologjike për studentët. Vetëm disa fakultete filozofike në Beograd dhe Novi Sad kanë ndërmarrë nisma të kufizuara, ku studentë të ardhshëm psikologë kanë ofruar mbështetje për kolegët që kanë nevojë për biseda psikologjike.
Situata tregon një tension të vazhdueshëm mes aktiviteteve protestuese dhe detyrimeve akademike, ndërsa studentët përballen me një dilemë të vështirë: të angazhohen në mbrojtjen e të drejtave të tyre apo të përqendrohen në arsimim.