Me një vendim të paprecedent dhe të miratuar në heshtje, kryeministri Edi Rama mësohet se ka vulosur marrëveshjen e dytë për strehimin e refugjatëve, këtë herë me Gjermaninë, duke e kthyer Shqipërinë në një territor të kontrolluar nga pazaret e Romës dhe Berlinit. Në vetëm 40 ditë nga deklarata publike gjatë konferencës së përbashkët me homologun anglez në Tiranë, ku mohoi çdo marrëveshje tjetër, kreu i qeverisë shqiptare shkel fjalën e dhënë dhe dorëzon një pjesë të sovranitetit kombëtar në këmbim të mbështetjes politike për pushtetin e tij personal.
Asnjë transparencë, asnjë informacion
Marrëveshja e re është miratuar që fundmi në parim nga qeveria, por nuk jep asnjë informacion për kampet: nuk përmendet vendndodhja, numri i refugjatëve apo afati i qëndrimit. E vetmja gjë e qartë është se qendrat do të ngrihen. Njësoj si me Italinë, Shqipëria po shndërrohet në “gardhin e pasmë” të BE-së, ku grumbullohen emigrantët e padëshiruar të Europës. Vendimi është marrë në mënyrë të pazakontë: projektvendimi u propozua nga Ministria e Ekonomisë dhe jo nga Ministria e Brendshme, që ka kompetencën ligjore për emigracionin. Agjencia gjermane GIZ, që nuk ka mandat për çështje refugjatësh, është vënë në qendër të procesit, duke përforcuar dyshimet për një marrëveshje të paligjshme dhe të manipuluar.
Një shtet që shërben si zyrë e BE-së
Por në vend që të mbrojë interesat kombëtare, Rama po shndërron Shqipërinë në një zyrë shërbimi për kancelaritë europiane. Kampe të ngjashme me ato të Italisë në Shëngjin e Gjadër tani shumëzohen me firmën gjermane. Mirëpo kjo nuk është më strategji integrimi, por është strategji mbijetese për pushtetin e një njeriu të vetëm. Refugjatët janë kthyer në monedhë pazari për përfitime politike. Edi Rama përdor shtetin si mjet shërbimi për kancelaritë e huaja, ndërsa vendi zhytet më thellë në krizë ekonomike, korrupsion dhe largim masiv të të rinjve. Pra kjo është një kolonizim modern institucional, i justifikuar me premtime boshe për “rrugën drejt Europës”.
Megjithatë nëse ky është modeli i integrimit, atëherë Shqipëria nuk po bëhet anëtare e BE-së, por koloni e saj. Pa përmbushje kriteresh, pa dinjitet, pa asnjë garanci për të ardhmen. Por shqiptarët duhet të pyesin veten: Kush vjen pas Gjermanisë? Franca? Austria? Sa kampe do ndërtohen ende në heshtje? Nëse qytetarët nuk reagojnë, Shqipëria do të kthehet në një zonë të padukshme, ku të tjerët shkarkojnë problemet e tyre dhe vendimmarrja ndodh jashtë vendit. Ky nuk është integrim. Është shitje.
Rama kthen Shqipërinë në strehë emigrantësh, pas Melonit dyndje nga Gjermania në kampe refugjatesh,…
