Flet Jonian Antoni, CEO i “Century 21 Albania” Bregdeti shqiptar po tërheq gjithnjë e më shumë vëmendjen e blerësve të huaj dhe diasporës, të cilët po investojnë në prona për qëllime pushimi, apo qiraje afatshkurtër.Zona si Gjiri i Lalëzit, Golemi, Qerreti, Vlora dhe Saranda janë në qendër të zhvillimeve të reja rezidenciale, me tipologji moderne dhe oferta të larmishme.Sipas Jonian Antonit, CEO i “Century 21 Albania”, kërkesa për prona në zonat bregdetare shqiptare mbetet e lartë, ndërsa çmimet janë në rritje, por ende ndjeshëm më të ulëta se në vende fqinje si Mali i Zi. Për blerësit nga Europa Qendrore dhe diaspora, Shqipëria mbetet një destinacion investimi me potencial të madh. Në cilat zona bregdetare janë duke u zhvilluar projekte të reja – rezidenca banimi në zonat bregdetare dhe si kanë ndikuar këto projekte të oferta? A rrezikohen zonat bregdetare nga mbioferta?Bregdeti ynë ofron një varietet shumë të mirë në ofertën e produkteve Real Estate kundrejt konsumatorit.Duke filluar kryesisht nga zonat bregdetare në Veri me çmime relativisht të lira, në zonat qendrore, ku çmimet shtrenjtohen disi dhe në zonat e Jugut ku çmimet rriten.Përgjithësisht në gjithë bregdetin janë duke u zhvilluar projekte rezidenciale ose të miksuara. Për sa i përket volumit, pjesa më e madhe është e fokusuar në zonat qendrore, Gjiri i Lalëzit, Durrës, Qerret, Kavajë. I ndjekur nga zonat jugore, përkatësisht nga Palasa deri në Borsh.Tregu i blerësve që synojnë këto projekte është i huaj, i ndjekur nga diaspora, fatmirësisht ky treg është pa limit dhe nëse arrihet të rritet interesi i blerësve të huaj në 5 vendet kryesore europiane si Anglia, Gjermania, Franca, Italia dhe Beneluksi, atëherë do të duhen shumë më tepër ndërtime për të plotësuar kërkesën.Për momentin mund të themi që nuk shikojmë të mbeten prona në treg nga mbioferta. Duke marrë në analizë kërkesën, si paraqitet përfshirë vilat dhe apartamentet në Golem, Durrës, Qerret, Vlorë, Orikum dhe Sarandë? Krahasuar me vjet, është më e lartë apo më e ulët dhe cilët janë faktorët ndikues?Niveli i kërkesës ka qenë dhe mbetet gjithnjë i lartë. Për shembull mund të themi që një agjenci e madhësisë si “Century 21” ka rreth 8,000-9,000 kërkesa në vit për zonat bregdetare.Faktori ku fokusohemi është te numri i mbylljeve të transaksioneve dhe përgjithësisht ky rezultat mund të analizohet vetëm në fund të sezonit veror.Përgjithësisht gjatë një viti mbyllet më pak se 10% e kërkesës, pra 700-800 prona në vit kundrejt të huajve dhe diasporës. Çfarë tipologjie prone parapëlqehet të blihet më tepër në zonat bregdetare vila apo apartamente? Të dhënat tona statistikore tregojnë se përgjithësisht në bregdet kërkohen prona të tipologjisë apartament 1+1, që është tipologjia më e shitur, e ndjekur nga apartament 2+1, që është tipologjia e dytë më e shitur.Të dyja përbëjnë rreth 90% të shitjeve kundrejt blerësve të huaj dhe diasporës. Cili është profili i një blerësi në zonat bregdetare, duke i analizuar sipas të ardhurave? Cili është qëllimi që blihen këto prona, për shtëpi pushimi apo investimi?Profili i blerëseve të huaj në Shqipëri është i qartë dhe mjaft i dukshëm. Së pari, vijnë nga vendet europiane pa det ose me det, jo të përshtatshme për pushime, nga shtetet, si: Çekia, Polonia, Hungaria, Kosova, Maqedonia Veriut etj.Së dyti, vijnë nga shtresa e mesme, që kanë mundësi të kenë një shtëpi të dytë për pushim ose investim. Ata nuk mund të jenë të varfër, por as nuk janë blerës të pasur, sepse nëse kanë buxhete më të mëdha, drejtohen në vende më elitare, si Spanja ose Greqia.Së treti, për 80% të tyre, buxheti është i mirëpërcaktuar nga mundësitë e shtresës që ata përfaqësojnë në shtetin e tyre, duke filluar nga 80,000 euro deri në 130,000 euro.Nëse pronat dalin jashtë çmimit të tyre maksimal, ata thjesht nuk i blejnë.Në 70% të rasteve synohet për investim miks. Pra e përdorin shtëpinë për nevojat e tyre 7-14 ditë në vit dhe pjesën e mbetur mundohen të përfitojnë diçka duke e dhënë me qira ditore ose javore. Sipas analizës suaj, sa për qind e totalit të shitjeve te zonat bregdetare e zënë blerësit e huaj dhe ata vendas? Nuk e disponojmë këtë analizë. Pa të dhëna statistikore, por me logjikë do të thosha që rreth 60% janë blerës të huaj ose diaspore dhe 40% blerës vendas.Kjo ndryshon me zona, për shembull në Durrës 80% e blerësve janë të huaj dhe 20% nga diaspora dhe vendasit. Si variojnë çmimet e shitjes për apartamentet dhe vilat? A ka rritje të çmimeve krahasuar me vjet? Cilët faktorë kanë ndikuar te ndryshimi i tyre?Është një analizë shumë e zgjeruar, pasi çdo projekt ndryshon në politikën e çmimit të tij dhe gjithashtu çdo zonë ka nivelin e përgjithshëm të çmimit të saj në raport me vendndodhjen, infrastrukturën dhe afërsinë nga deti.Në vija të përgjithshme, çmimet e apartamenteve variojnë:Golem: 1,300 – 1,500 euro/m²Durrës: 1,000 – 1,800 euro/m²Qerret: 1,000 – 1,400 euro/m²Vlorë: 1,400 – 3,000 euro/m²Orikum: 1,200 – 2,000 euro/m²Sarandë: 1,000 – 4,000 euro/m²Palasë: 2,600 – 3,800 euro/m²Dhërmi: 2,200 – 3,800 euro/m²Konstatohet si për qytetet e mëdha, si: Durrësi, Vlora ose Saranda kanë variacion më të madh çmimesh, sepse ndryshojnë shume distancat nga deti dhe nga zona ne zone.Për pronat në bregdet vendndodhja e tyre, sidomos pamja e objektit nga deti ul ose rrit deri në 20% çmimin e shitjes. Si ndryshojnë çmimet e shitjes për pronat në bregdet krahasuar me rajonin? Ju keni hartuar një analizë krahasuese çmimesh, cilat janë të dhënat kryesore të saj?Nga analiza jonë, kemi bërë disa krahasime, kryesisht me Malin e Zi, i cili është edhe tregu më i ngjashëm me atë shqiptar për momentin. Për momentin, varieteti i çmimeve në Shqipëri në zonat bregdetare është shumë më i ulët se sa në Malin e Zi.Për shembull, në Mal të Zi, një kompleks si “Lushtica Bay” ofron apartamente duke filluar nga 6,998 euro/m² deri në 13,960 euro/m².Kompleksi “Tivat Gardens” ofron apartamente që fillojnë nga 4,985 euro/m² dhe arrijnë deri në 7,454 euro/m².Kompleksi më i përballueshëm në Mal të Zi, në qytetin e Bar, “Amma Resort Intercontinental”, fillon nga 3,907 euro/m² dhe shkon deri në 4,385 euro/m².Këto çmime tregojnë qartë se edhe zonat më elitare në Shqipëri ofrohen ende me çmime më të ulëta se ato më të përballueshmet në Malin e Zi.Si rrjedhojë, kjo jep optimizëm se, nëse menaxhohen mirë politikat e përgjithshme, infrastruktura dhe turizmi, Shqipëria ka ende hapësirë për rritje çmimesh dhe përmirësim të ofertës. Ky është artikull ekskluziv i Revistës Monitor, që gezon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”.Artikulli mund të ripublikohet nga mediat e tjera vetm duke cituar “Revista Monitor” shogëruar me linkun e artikullit origjinal.
“Kërkesa mbetet e lartë nga çmimet ende konkurruese krahasuar me rajonin”
