28 Prill 2025
20:38
Telesport
Xavi Hernandez, pas largimit të tij nga Barcelona, mund të jetë në prag të nisjes së një aventure të re si trajner, këtë herë në Serie A, ku përflitet se është në bisedime me klubin e Romës.
Ish-trajneri i Barçës, i cili ka qenë jashtë vëmendjes për disa muaj, del si një nga kandidatët kryesorë për të marrë drejtimin e ekipit italian për sezonin e ardhshëm. Klubi kryeqytetas, përveçse është në garë për një vend për në Champions League për sezonin e ardhshëm, po kërkon një trajner me prestigj dhe një filozofi të qartë loje.
Sezoni aktual ka qenë pozitiv për Romën nën drejtimin e Claudio Ranieri-t, por trajneri veteran tashmë ka komunikuar vendimin e tij për të mos vazhduar pasi të mbarojë ky sezon. Ndaj, drejtuesit e klubit verdhekuq kanë filluar punën për të gjetur trajnerin e ri.
Nga Italia raportohet se diskutimet mes palëve tashmë kanë filluar në mënyrë joformale, megjithëse ende nuk ka një marrëveshje përfundimtare. Roma beson se profili i Xavit i përshtatet vizionit të saj për të ndërtuar një projekt ambicioz afatgjatë, duke zgjedhur një trajner të ri me përvojë në nivele të larta.