Ish-presidentët e Federatës Ndërkombëtare të Futbollit (FIFA) Joseph Blatter dhe Federatës Evropiane të Futbollit (UEFA) Michel Platini janë deklaruar të pafajshëm në fillim të një seance apeli për akuzat për mashtrim në Muttenz, Zvicër, dhe janë të sigurt për një lirim të ri.
Pothuajse tre vjet pas lirimit të tyre në shkallë të parë, Platini dhe Blatter të hënën përsëri insistuan në pafajësinë e tyre në një apel para një gjykate zvicerane në rastin e pagesave të dyshimta që shkatërruan karrierën e tyre në vitin 2015, raporton AFP.
Blatter dhe Platini u liruan në vitin 2022 nga një gjykatë më e ulët zvicerane pas një hetimi shtatëvjeçar për një pagesë prej dy milionë frangash zvicerane (2.1 milionë euro) ndaj Platinit.
Prokurori federal zviceran apeloi vendimin, duke çuar në një seancë të re përpara Dhomës së Apelit të Jashtëzakonshëm të Gjykatës Penale të Zvicrës në Muttenz, pranë Bazelit, me një vendim që do të jepet më 25 mars.
Blatter përsëriti pafajësinë e tij të hënën.
“Kur flisni për mashtrim, ky nuk jam unë, nuk është në jetën time”, tha Blatter në një intervistë të shkurtër me disa përfaqësues të mediave pas mbërritjes në seancë, ndërsa avokati i Platinit shtoi: “Klienti im i mohon plotësisht të gjitha akuzat”.
Blatter, 88 vjeç, dhe Platini, 69 vjeç, akuzohen për mashtrim, “menaxhimi jo besnik”, “shkelje besimi” dhe “falsifikim dokumentesh”, për të cilat përballen me pesë vjet burg.
“Pagesat e pabaza”
Akuza lidhet me një pagesë prej dy milionë frangash zvicerane, ose 2.1 milionë euro, që ish-zyrtari më me ndikim i futbollit zviceran i pagoi Platinit në vitin 2011 për shërbimet e këshillimit gjatë mandatit të tij të parë presidencial në krye të FIFA-s.
Prokuroria pretendon se kjo ishte një pagesë e “pabazuar”, e marrë duke “mashtruar me mjeshtëri” kontrollet e brendshme të FIFA-s me deklarata të rreme të dy drejtuesve, që ishte kriteri kryesor i mashtrimit.
Mbrojtja dhe prokuroria bien dakord për një gjë: francezi këshilloi Blatterin midis viteve 1998 dhe 2002, gjatë mandatit të tij të parë si kreu i FIFA-s, dhe të dy nënshkruan një kontratë në vitin 1999 duke rënë dakord për një tarifë vjetore prej 300,000 frangash zvicerane, e paguar plotësisht nga FIFA.
Megjithatë, në janar 2011, “më shumë se tetë vjet pas përfundimit të veprimtarisë së tij si këshilltar”, Michel Platini “kërkoi dy milionë franga zvicerane”, të cilat u paguan nga autoritetet e futbollit “me ndihmën” e Sepp Blatter, pretendon prokuroria.
Gjatë gjyqit, i cili përfundoi tre vjet më parë, Blatter shpjegoi se pagesat përfshinin tarifa konsulence disavjeçare dhe se presidentët e FIFA-s dhe UEFA-s kishin rënë dakord verbalisht për shumën. Prokuroria mbrojti qëndrimin se FIFA nuk kishte bazë ligjore për t’i paguar Platinit dy milionë frangat në fjalë.
Tri vite më parë gjykata vendosi mbi parimin “in dubio pro reo” dhe për mungesë provash vendosi në favor të Blatterit dhe Platinit dhe i shpalli të pafajshëm, por pas shpalljes së pafajësisë prokuroria bëri ankim.
Rasti i tyre tronditi skenën ndërkombëtare të futbollit dhe si pasojë, Blatter dhe Platini u detyruan të largoheshin nga pozicionet e tyre. Zvicerani Gianni Infantino mori postin e presidentit të FIFA-s në shkurt 2016 dhe në shtator të atij viti slloveni Aleksander Čeferin u bë president i UEFA-s. /tesheshi.com/
