Teksa PD ka betejën finale në Kolegjin Zgjedhor për të kundërshtuar rezultatin zgjedhor të 11 majit, në atë që selia blu e cilëson si farsë elektorale, përfaqësuesi ligjor i PD në KQZ, Franc Nuri theksoi se ishte jo normale dhe jo logjike që të mos ankimohej rezultati final për certifikimin e zgjedhjeve.
I ftuar në edicionin e pasdites në Syri Tv, nën moderimin e Edvin Parrucës, Nuri tha se KQZ i pamundësoi aksesin PD për sigurimin e provave, në mënyrë që kjo forcë politike të ankimonte në KAS çdo qark.
Por pavarëisht kësaj, theksoi Nuri, PD ia doli të sigurojë prova jo vetëm gjatë zgjedhjeve të 11 majit, por edhe më pas, mbi të gjitha duke bërë publike edhe farsën me votën e diasporës për të cilën KQZ ende heziton të bëjë pagesën për shërbimin postar, DHL.
Sipas përfaqësuesit ligjor të PD, Franc Nuri, teksa pritet raporti final i OSBE-ODIHR, nuk do të ishte e udhës që institucioni më i lartë ndërkombëtar i certifikimit të zgjedhjeve të anashkalonte gjetjet dhe provat e bëra publike nga Partia Demokratike.
Ne i jemi drejtuar Kolegjit, pasi do të ishte e panatyrshme dhe jo normale të mos ankimonin rezultatin final. Çdo vendimmarrje të KAS e kemi çuar në Kolegjin Zgjedhor. Çdo qark, edhe aty ku ka fituar edhe vetë PD, pasi ne kontestojmë zgjedhjet në tërësi, edhe aty ku ka fituar përtej farsës elektorale. Do të ishte jo logjike të mos ankimonim rezultatin final. Duhet të kalojë dhe kjo hallkë ligjore e formale.
Vetë akti administrativ i miratuar e ka parashikuar se ky vendim mund ta atakojë brenda afatit ligjor brenda 5 ditëve pa kaluar në KAS. Ky është hapi i fundit, s’ka vendimmarrje tjetër në lidhje me zgjedhjet e 11 majit. Teorikisht mund të bëhet, pas kësaj do jemi në pritje të raportit të OSBE –ODIHR. Edhe në seancën e parë e të fundit, që ne s’i njohim zgjedhjet, në seancën e 28 gushtit.
Raporti paraprak ka qenë kritik ndaj zgjedhjeve e qeverisë se si i ka realizuar këto zgjedhje të 11 majit. Pati mjaft elementë që na shërbyen për ankimimet tonë, dhe na shërbyen si prova dhe ne u mbështetëm aty për animimet tona. Për disa javë e muaj pati përqendrim dhe kontestim te rezultatit zgjedhor nga PD, qark pas qarku. Videot famëkeqe në Elbasan, fenomene të manipulimit të votave, që Z. Berisha ka nxjerrë materiale, foto e video të farsës zgjedhore, që u morën me shumë vështirësi nga ana e KQZ, videot kryesisht.
Vota e diasporës, kemi pasur korrespondenca të vazhdueshme për shkelje që kanë ndodhur, i kemi vënë përballë kontradiktave. Raporti final i OSBE-ODIHR s’mund t’i anashkalojë këto gjetje e prova që kanë dalë ditën e zgjedhjeve, gjatë zgjedhjeve, pas zgjedhjeve, numërimi i votave, sidomos në diasporë. Është një problem që e kam ngritur në KAS, për evidencat e votave në Greqi të diasporës. Nënshkrimet e qytetarëve që kanë marrë formularët. Fakti që s’e ka paguar operatorin postar, DHL,tregon se ka një problem.
KQZ refuzuar të bënin transparencë gjatë ankimimeve tona. Çdo gjë që mund të përdorej si provë nga PD, ne na u bë e pamundur aksesimi, u hoq transparenca për të na penalizuar gjatë ankimimeve tona. Me ato pak, ne arritëm të faktojmë, edhe për ndërkombëtarët farsën elektorale, manipulimin masive në shkallë industriale të votës së diasporës.
