Kryetari i Partisë Demokratike, Sali Berisha, gjatë takimit me aleatët e federatës së opozitës së bashkuar, deklaroi se Shqipëria ndodhet në një autokraci elektorale, e ngjashme me regjimin e Maduros në Venezuelë. Berisha u ndal te raporti i OSBE/ODIHR, duke theksuar se zgjedhjet në Shqipëri kontrollohen nga “partia-shtet. Në lidhje me reformën zgjedhore, lideri demokrat, Sali Berisha tha se opozita është e bashkuar për të zbatuar rekomandimet e OSBE/ODIHR dhe se PD është e gatshme të pranojë çdo sistem zgjedhor që përcaktohet me konsensus të gjerë brenda opozitës. Berisha shtoi se me Edi Ramën zgjedhje të lira nuk ka.
Syri TV
Lideri i opozitës Sali Berisha mblodhi këtë të premte aleatët e federatës së opozitës së Bashkuar, për të bërë së bashku reformën zgjedhore dhe atë territoriale. Gjatë fjalës së tij, Berisha garantoi se PD është e gatshme të pranojë çdo sistem zgjedhor që përcaktohet me konsensus brenda opozitës, ndërsa theksoi se me Edi Ramën nuk ka dhe s’do të ketë zgjedhje të lira.
Berisha deklaroi se garanci e padiskutueshme për Reformën zgjedhore, do të jetë zbatimi i rekomdandimeve të OSBE/ODIHR, duke sjellë në vëmendje raportin e vëzhguesve të ODIHR për 11 majin, që faktuan se zgjedhjet në Shqipëri kontrollohen nga partia shtet.
Ndërsa sa i takon reformës territoriale, Berisha u zotua se do të behet gjithçka për ripopullimin e Shqipërisë, teksa i qëndroi angazhimit për shtimin e numrit të bashkive.
Para aleatëve tradicional, lideri i opozitës akuzoi qeverinë se e ka kthyer vendin në autokraci elektorale, e ngjashme me atë Maduros në Venezuelë.
Nuk la pa komentuar dhe skandalin me zv/kryeminsitren Belinda Balluku, dhe presionin që Edi Rama po i bën Kushtetueses për ta mbrojtur, pasi siç theksoi Berisha, janë bashkë në çdo aferë korruptive.
Ndërkohë aleatët dhe përfaqësuesit e partive opozitare të pranishme në këtë tryezë, kritikuan sistemin zgjedhor dhe pasojat që solli reforma territorale, dhe shprehën gatishmërinë e bashkëpunimit, për një reformim të thellë elektoral dhe administrativ.









