Tag: vrasjet

Hetimi i çështjes së “21 Janarit” nga Struktura e Posaçme Antikorrupsion (SPAK) ka marrë një kthesë të re dhe të thelluar, pas paraqitjes së Lulzim Bashës dhe reagimit të Sali Berishës. Gazetari Artan Hoxha ka sjellë në vëmendje elementë thelbësorë të provave, duke pohuar se situata ka ndryshuar dukshëm dhe se hetimi i tanishëm duhet të jetë shterues. Hoxha thekson se vendimi i Gjykatës së Strasburgut ka përcaktuar qartë se ngjarja e 21 Janarit përbën krim shtetëror, duke e detyruar shtetin shqiptar të mos fshihet dot më. Më e rëndësishmja, ai këmbëngul se vrasjet nuk janë bërë nga pakujdesia, siç ishin vendimet e mëparshme të gjykatës, por janë kryer me urdhër. Ky pretendim mbështetet nga një element i ri i provave: një audio e urdhrave të Gardës, e cila dëshmon që vrasjet u kryen me urdhër, pasi brenda vetëm tetë sekondave pas dhënies së urdhrit “Qëllo!”, pati katër të vrarë dhe mbi 13 të plagosur.
Në këtë audio dëgjohen qartë të shtënat e atij që jep urdhrin. Në këtë kontekst, Hoxha bën të ditur se SPAK-u, i detyruar nga Gjykata e Lartë për të marrë çështjen, pritet të thërrasë një hierarki të gjerë zyrtarësh të lartë dhe personash me dijeni. Kjo listë përfshin ish-Presidentin Bamir Topi, ish-Prokuroren e Përgjithshme Ina Rama, ish-Kryeministrin Sali Berisha, ish-komandantin e Gardës dhe madje edhe Kryeministrin aktual Edi Rama. Gjithashtu, ai thekson në intervistën për “News 24”, se komunikimet me radio përmbanin kode (si Tufani 1, 2, 3 dhe Luani 1, 2), pas të cilave fshihen zyrtarë të lartë të Gardës. Ky hetim synon të zbardhë përfundimisht autorët e dy viktimave, Aleks Nika dhe Hekuran Deda, të cilët ende mbeten pa autorë të identifikuar. Kujtojmë se Lulzim Basha u paraqit të enjten e javës së kaluar në Prokurorinë e Posaçme në lidhje me “21 janarin”.
Pjesë nga intervista e z. Hoxha
-Zoti Hoxha, ish-kryeministri Sali Berisha pranon se nëse SPAK e thërret, do të shkojë për 21 janarin. Hoxha, çfarë di më shumë nga ato që…?
Kur u hetua 21 janari mbas 21 janarit, çfarë ndodhi? Berisha nuk shkoi në organin e hetimit, bëri një komision hetimor dhe atje deklaroi para komisionit që bëri vetë dhe dha deklarimet e veta. Sot situata ka ndryshuar dukshëm. Era ka fryrë komplet në krahun tjetër. Pse? Kemi një vendim të Gjykatës së Strasburgut e cila ka përcaktuar një krim shtetëror dhe ti s’ke nga shkon. Pra, shteti shqiptar nuk fshihet dot më. Ajo ta ka përcaktuar dhe të ka dhënë komplet të gjithë skeletin. Duhet hetuar, është krimi shtetëror. Ai ta ka përcaktuar qartë se çfarë duhet të hetosh ti, ku janë shkeljet. E dyta: Kemi vendim të Gjykatës së Lartë e cila e detyroi SPAK-un. SPAK ka luftuar deri në fund që të mos e marrë këtë çështje. Mua më kanë bërë presion për më shumë se një vit të dorëzoj audion e urdhrave të Gardës. Ndërkohë ne kemi vendime të gjykatës që kanë shkuar deri në Gjykatë të Lartë, që vrasjet janë bërë nga pakujdesia. Unë solla një element të ri i cili shërben si indic për të shkuar te prova. Dhe ai element dëshmon që vrasjet janë bërë me urdhër. Vrasjet nuk janë bërë nga pakujdesia, janë bërë me urdhër dhe ka qëlluar komandanti i Gardës dhe shefi i shtabit i njësisë speciale të Gardës, që presupozohen dy nga drejtuesit më të përgatitur në atë detyrë. Nuk ka qëlluar një ushtar i ri rekrut që ka humbur toruan.
Dhe SPAK bëri maksimumin që të mos e merrte çështjen deri në Gjykatë të Lartë. Gjykata e Lartë e detyroi. Mua më kërkua ta çova në Gjykatën e Tiranës. Këmbëngula që nuk do ta çoj. Dhashë deklarimet e mia. Thashë çfarë përbën ai material, por nuk kam besim t’ia çoj prokurorisë së Tiranës sepse kisha parë në 13 vjet s’kishte bërë asgjë. Pse duhet ta bënte në vitin e 14-të? S’bëri prapë. Atëherë, momentin që na u dha mundësia dhe gjykata e detyroi SPAK-un, Gjykata e Lartë e detyroi SPAK-un, unë jam paraqitur. Edhe kallëzimi që kanë bërë familjarët është mbi këtë material të ri që ne e kemi kapur. Pra, unë rashë në dijeni të këtij materiali pas filmimit të 21 janarit. Se shikoj një tjetër që thotë: “Televizioni im.” Jo, ky televizion (News24). Jo televizioni im. Ky televizion, jo televizioni i dikujt që s’ishte fare, s’ka qenë fare në Republikë të Shqipërisë këtu. S’e dinte fare se ç’bënim ne këtu e çfarë hiqnim ne këtu në 21 janar. Ka qenë jashtë territorit të Republikës së Shqipërisë, se dalin sot shumë e rrahin supet e marrin meritat. Për fat të mirë, edhe materiali i dytë, pra audio, është një indicie që vërteton që vrasjet janë me urdhër. Sepse jepet urdhri dhe për tetë sekonda kemi katër të vrarë dhe mbi 13 të plagosur, vetëm tetë sekonda.
Dhe urdhri është: “Qëllo!” Dhe urdhri është: “Ndaloni të shtënat!”. Dhe në audio dëgjohen qartë edhe të shtënat e atij që i jep urdhrin, sepse pistoleta e tij është më afër radios, se po flet me radio ai. Dhe ky është një material për të cilin unë kam qenë pesë orë në SPAK. Më kërkoi burimin vitin e kaluar. Sigurisht që s’mund ta jap burimin e njeriut që ka bërë për mua një shërbim shumë të madh të vendit. Sepse me këtë material ka rrëzuar gjithë vendimet që kishin dhënë shkallët e tjera të gjyqësorit. Dhe na tregon që, po, kjo provë, edhe mbi këtë element, Gjykata e Strasburgut ka thënë që vrasjet janë krim shtetëror. Dhe çfarë ka ai material që ne dorëzuam vitin e kaluar? Ai material, dhe unë e kam përcaktuar qartë dhe me kode, se aty flitet me kode. Kanë kode. Dhe prandaj është e thjeshtë për organin e hetimit sot, sepse nuk është më Prokuroria që u vu në trysni, Prokuroria e Krimeve të Rënda, e cila ka bërë një punë atëherë brenda mundësive që ajo pati.
Ka bërë maksimumin e mundshëm. Vetëm për të gjetur predhën e gjuajtësit. Është pjesë fillestare, po mbrapa, mbrapa. Pra, ai është një hetim. Hetimi i sotëm ka si bazë atë hetimin tjetër të mëparshëm, por sot ka ndryshuar dhe situata politike dhe konjukturat. Ti sot mund të thërrasësh kë të duash, se nuk e ndalon dot askush. Prandaj dhe Berisha thotë: “Unë do të jem në dispozicion,” se s’ke mundësi tjetër. Do të shkosh, çfarë bën? Dhe në atë zbardhje, të paktën në dëshminë që kam dhënë unë vitin e kaluar, kam dhënë kodet. Kodet janë: Tufani 1, Tufani 2, Tufani 3, 400, 500, siç i kanë thënë ata, me njerëz: Luani 1, Luani 2. Pra, mbas çdo kodi fshihet një zyrtar i lartë i Gardës, sepse ai ka qenë një kanal komunikimi në radio i cili është bërë nga drejtuesit e nivelit të lartë. Nuk ka qenë komunikim poshtë. Dhe ky komunikim aty del ish-drejtori i përgjithshëm i Policisë, edhe Ministri i Brendshëm, se prandaj ishte Basha.
Edhe zoti Basha dëgjohet në atë komunikim. Por ajo shërben thashë gjithmonë si një orientim ose një indicie për prokurorin, ose grupin e hetimit, për të shkuar sot në një mënyrë shteruese të hetimit, për të konfirmuar atë që thotë dhe Gjykata e Strasburgut dhe për të nxjerrë përfundimisht. Ne sot kemi dy nga katër viktimat e janarit pa autor. Pra, sot Aleks Nika, i cili është vrarë në mes të Bulevardit Dëshmorët e Kombit, të paktën në një distancë prej 70 metrash nga gardhi i Kryeministrit. Dhe nga krahu tjetër, personi tjetër që është pa autor, pra ende pa autor, i cili është Hekuran Deda, i vrarë mbi podiumin ku ishte Top Channel. Pra, të dy këto viktima janë pa autorë. Dhe meqenëse këto janë pa autorë, ti nuk ke nga të shkosh te ajo ngjarje dhe pastaj hetimi është shterues. Pse? Sepse të paktën në atë që di unë, aty duhet të thirret, dhe më saktë do të thirret, ish-Presidenti Bamir Topi.
Ai ka pasur një informacion, sepse ai i merr informacionet dhe nga Shërbimi Informativ. Ai ka pasur një qëndrim të vetin mbi ngjarjen. Ai ka bërë dhe një libër të vetin ku tregon shumë detaje. Dhe mbi të gjitha, Prokurorja e Përgjithshme ka shkuar, Ministri i Brendshëm ka shkuar tek ai. Ai ka marrë informacion të bollshëm mbi atë ngjarje, i cili nuk është përdorur në hetimin e parë. Së dyti: ish-prokurorja e Përgjithshme, Ina Rama, e cila në atë kohë ka thënë që mua më ka sabotuar Policia, Kryeministri, Garda. Sot situata nuk është më ajo që ka qenë. Do të thirret dhe ajo. Ish-Kryeministri Berisha. Ish-komandanti i Gardës, i cili ndodhet në Kanada. Ai erdhi vitin e kaluar, por nuk e pyetën për këtë gjë. E kanë pyetur për një çështje tjetër, për hetimin pasuror të zotit Berisha. Ai jeton në Kanada dhe besoj do të thirret dhe duhet të thirret dhe për këtë gjë. Dhe në hierarkinë e personave që do pyeten aty është dhe Kryeministri Rama, madje. Edhe kameramani i ‘News24’, Ervin Daja, që ka qenë në 21 janar, ka filmuar momentin e vrasjeve dhe ai do të thirret.
-Po vjen?
Lëre se po të them, sepse hetimi duhet të jetë hetim shterues se ta kanë kërkuar ata. Dhe ai ka të parë elementë që s’i ka treguar. Se ai ka vetëm kasetën, po se çfarë ka ndodhur. Ervin, e ke nga tani? Po, normal. Se derisa kam vajtur unë, kam treguar shokët. Unë kam treguar shokët, jashtë shakasë. Ervin Daja është operator i shkëlqyer.