Tag: vllaznia

Adriatik BALLA
Java e 33-të e Kategorisë Superiore u mbyll mbrëmjen e djeshme në stadiumin “Arena Kombëtare” në kryeqytet, ku u përplasën dy gjigantët e futbollit tonë, Tirana dhe Partizani, në një derbi emocionues mes tyre. Bëhet fjalë për një ndeshje që kishte vlerë veçanërisht për Tiranën, e cila pozicionohej në vend të fundit, e i duheshin me patjetër pikët. Tirana ia doli mbrëmë të thyente Partizanin me rezultatin 3-0, duke marrë një trepikësh që e ndihmon shumë në luftën për mbijetesë, pasi shkëputet me dy pikë nga fundi dhe tani ngjitet në vend të tetë, duke pasur besim se mund t’ia dalë të mbetet në elitë.
Për Partizanin nuk ishte mbrëmja e duhur. Sfida ka folur gjatë gjithë ndeshjes për bardheblutë, të cilët kërkuan më me ngulm fitoren dhe kishin kontrollin e lojës. Ndaj edhe golat e shënuar në pjesën e parë nga Zharmuni ishin rrjedhojë logjike e asaj që po shfaqej në fushë, ku Partizani ishte inaktiv. Gega bëri lëvizje në pushim dhe Partizani u ngjall. Por një gabim i Sembene dhe goli i tretë me penallti nga Ernest vulosën fatin e kësaj ndeshje, ku VAR-i nuk la të kuqtë as t’i gëzoheshin golit të flamurit. Pas kësaj jave, Partizani ndihet i kërcënuar seriozisht në vend të katërt, pasi Elbasani i është afruar me një pikë (47-46), kurse gara për fundtabelën vijon të jetë e fortë dhe emocionuese, pasi janë jo pak, por pesë ekipe që rrezikojnë dhe me sa duket rivaliteti për mbijetesë do të shkojë deri në vërshëllimën e fundit.
Kështu, diferenca midis vendit të gjashtë që mbahet nga Skënderbeu dhe të dhjetë që mbahet nga Laçi është vetëm 3 pikë (36-33). Thënë ndryshe, skuadrat e Skënderbeut, Bylisit, Tiranës, Teutës dhe Laçit, do të jenë në ankth deri në xhiron e fundit, pasi asgjë nuk është përcaktuar, kush qëndron e kush bie nga kategoria. Për momentin, tri skuadrat e kreut janë të padiskutueshme që janë në “Final Four”, Egnatia, Dinamo dhe Vllaznia (edhe pse Vllaznia ende jo matematikisht).
Elbasani thyen Egnatian dhe i bën presion katërshes kryesuese
Elbasani mori dje një fitore me vlera me shifrat 2-1 përballë Egnatias së Rrogozhinës, në fushën e kësaj të fundit, duke lakmuar të jetë në fund të sezonit në top-4, pozicion që e fut skuadrën në garën e titullit. Edhe pse mbetet në vend të pestë, Elbasani po ngulmon fort ta realizojë këtë objektiv dhe deri tani ia ka dalë të bëjë presion për një vend në “final Four”. Pjesa e parë ishte e ekuilibruar mes dy skuadrave, por me Elbasanin që e zgjidhi në minutat e fundit, duke goditur dy herë brenda tre minutash për të shkuar në pushimin e sfidës me avantazh të dyfishtë. Pritej reagimi i rrogozhinasve por ai mungoi, me ekipin që u zgjua vetëm pas incidentit në stadium ku ra nga tribuna një tifoz i vendasve e që solli ndërprerjen e duelit për disa minuta. Një penallti e transformuar saktësisht nga Fernando me “Panenka”, ishte shkëndija e vetme e mirëfilltë në minutat e fundit të ndeshjes, që u mbyll me festën e ekipit verdheblu. Mbetet të shihet deri në fund ecuria e Elbasanit, por në tri javë garë që kanë mbetur verdheblutë do të tentojnë surprizën deri në sekondën e fundit.
Java 33
Të dielën
Bylis-Vllaznia             1-0
Laçi-Skënderbeu         1-2
Dinamo-Teuta             1-1
Të hënën
Egnatia-Elbasani         1-2
Tirana-Partizani           3-0
Renditja
Nr.Ekipi         Pikë
1.Egnatia         58
2.Dinamo        55
3.Vllaznia        52
4.Partizani       47
5.Elbasani        46
6.Skënderbeu  36
7.Bylis             36
8.Tirana            35
9.Teuta           35
10.Laçi             33