Ministri i Ekonomisë, Petrit Malaj, ka njoftuar se afati për dorëzimin e Deklaratës Vjetore të të Ardhurave Personale ‘DIVA 2024’ është shtyrë me një ditë, nga 31 mars në 1 prill 2025. Sipas tij, kjo shtyrje vjen pasi 31 marsi është ditë pushimi zyrtar për shkak të festës së Fitër Bajramit.
Deklaratën ‘DIVA 2024’ duhet ta plotësojnë individët rezidentë dhe jorezidentë që gjatë vitit 2024 kanë:
Pagë bruto vjetore mbi 1.2 milionë lekë.
Janë të dypunësuar për të paktën një periudhë brenda vitit.
Kanë të ardhura mbi 50 mijë lekë nga burime të tjera, për të cilat nuk është mbajtur tatimi në burim.
Parashikohet që këtë vit numri i deklaruesve të arrijë mbi 144 mijë individë, për shkak të uljes së kufirit të deklarimit nga 2 milionë në 1.2 milionë lekë. Deklarata gjenerohet automatikisht me të dhënat e të ardhurave vjetore bruto dhe përllogaritjen e tatimit mbi të ardhurat nga punësimi.
