Talebanët po hetojnë për pretendimin e një burri afgan se ai është 140 vjeç, gjë që do ta bënte njeriun më të vjetër që ka jetuar ndonjëherë.
Aqel Nazir, që jeton në provincën lindore të Khostit, thotë se ka lindur në vitet 1880.
Ai pretendon se kujton festimin e përfundimit të Luftës së Tretë Anglo-Afgane në vitin 1919 së bashku me mbretin AmanullahKhan, udhëheqësin afgan që nisi një fushatë kundër britanikëve, kur ishte në të tridhjetat.
Naziri, i cili jeton në kodrat piktoreske të Khostit, tha: “Isha në pallat me mbretin Amanullah Khan. Isha mbi 30 vjeç në atë kohë dhe më kujtohet që thashë se britanikët ishin larguar dhe ishin gjunjëzuar. Të gjithë ishin të lumtur dhe falënderuan mbretin Amanullah Khan që i dëboi britanikët. Shumë udhëheqës na shoqëruan në Arg [pallatin presidencial], por tani të gjithë ata kanë ndërruar jetë.”
Katragjyshi nuk ka asnjë dokument për të mbështetur pretendimin e tij, por familja e tij është e përkushtuar të marrë njohje zyrtare për statusin e tij.
Khyal Wazir, nipi i tij 50-vjeçar, tha: “Ai është gjyshi im, dhe unë kam nipërit e mi gjithashtu.”
Një tjetër nip, Abdul Hakim Sabari, tha: “Ne i kërkojmë qeverisë të konfirmojë moshën e gjyshit tonë duke përdorur një ID ose ndonjë metodë tjetër shkencore apo dokumente, për të provuar që ai është 140 vjeç.”
Në përpjekje për ta zgjidhur misterin, administrata talebane ka dërguar një ekip të posaçëm të regjistrimit civil për të vlerësuar moshën e tij të vërtetë.
Mustaghfar Gurbaz, një zëdhënës i talebanëve për provincën, tha: “Nëse konfirmohet me dokumente ose vlerësime, do të punojmë për ta regjistruar atë si personin më të vjetër në botë.”
Nëse verifikohet, ai do të fitonte titullin e personit më të vjetër që ka jetuar ndonjëherë.
Ky rekord mbahet nga Jeanne Calment, e cila lindi në vitin 1875 dhe vdiq në vitin 1997, pas 122 vitesh jetë.
Personi më i vjetër i verifikuar aktualisht në botë është InahCanabarro Lucas, një murgeshë braziliane që mbushi 116 vjeç qershorin e kaluar.
Një tjetër grua braziliane, Deolira Gliceria Pedro da Silva, shpreson të ketë verifikuar pretendimin e saj se është 120 vjeçenga Libri i Rekordeve Guinness.
Por ekspertët tashmë kanë hedhur dyshime mbi pretendimet e Nazirit.
Valery Novoselov, mjek gjeriatër në Universitetin Shtetëror të Moskës, i tha medias ruse AIF: “Nuk ka burra të regjistruar në mënyrë të besueshme në planet që janë më të vjetër se 114-115 vjeç. Në Kaukaz në vitet ’60, kanë regjistruar gjithashtu njerëz ‘jetëgjatë’, barinj që supozohej se kishin jetuar deri në 168 vjeç.Këto janë të ashtuquajturat lojëra me moshën. Nuk ka dokumente, nuk ka të dhëna të besueshme, që do të thotë se kjo është një pamje jorealiste.”
Në vitin 2015, një burrë që pretendonte se ishte 100 vjeç aplikoi për azil në Gjermani pas një udhëtimi të jashtëzakonshëm tetëmujor nga Afganistani.
Si Naziri, Abdul Qadir Azizi nuk kishte ndonjë dokument identifikimi, por familja e tij pretendonte se ai kishte lindur në vitin 1905.
Azizi, i cili është i shurdhër dhe i verbër, kaloi një muaj duke udhëtuar përmes dy kontinenteve nga qyteti i tij në Afganistan, Baghlan, për të mbërritur në Gjermani.
Familja e tij iku pasi tre nga djemtë e Azizit u vranë nga talebanët.
Gjendja e të moshuarve në Afganistan është përkeqësuar që prej marrjes së pushtetit nga talebanët.
Në vitin 2024, ata shfuqizuan sistemin e pensioneve, duke lënë shumë afganë të moshuar në vështirësi për të përballuar nevojat bazë.
Më parë, çdo person mbi moshën 65 vjeç merrte një pagesë mujore rreth 100 dollarësh nga shteti. / Daily Mail – Syri.net
