Tag: vjeçarin

 
Ka përfunduar seanca për masën e sigurisë në spital për autorin e plagosjes Aleks Qiqi. Togat e zeza kanë vendosur masën e “arrestit në burg” për 41-vjeçarin i cili pak ditë më parë plagosi me thikë një 27- vjeçar në fshatin Dvoran të Korçës. Prokuroria kërkoi masën e arrestit në burg, ç’ka u pranua nga Gjykata e Korçës. Masa u dha në ambientet e spitalit, ku autori i dyshuar po trajtohet. Më herët (po ditën e djeshme, 18 gusht), Gjykata kishte caktuar masën detyrim paraqitje për 3 prej të arrestuarve, ndërsa për njërin prej tyre u vendos të hetohet në gjendje të lirë. Konkretisht në masë detyrim paraqitje u lanë Isuf Dalip, Dhimitër Kodra dhe Bilal Shkëmbi, ndërsa në gjendje të lirë do hetohet Thanas Paskali. Ata akuzoheshin se dhunuan autorin Qiqi pasi ky plagosi me thikë 27-vjeçarin pas sherrit. Ekspertiza mjeko-ligjore ka konkluduar se Aleks Qiqi u plagos lehtë nga katër të arrestuarit, pak pasi sulmoi dhe goditi me thikë Ari Kodrën, që mori plagë në shpatull dhe shumë pranë zemrës. Këta të fundit akuzohen se pasi Qiqi plagosi me thikë 27 vjeçarin Ari Kodra, reaguan duke e goditur. Qiqi ishte person me precedentë të shumtë penalë për plagosje dhe drogë, në Shqipëri dhe në Greqi, ku jetonte herë pas here. Së fundmi ishte arrestuar dhe dënuar për drogë, teksa ishte liruar nga burgu disa javë më parë. Të dy personat kanë qenë në të njëjtën tavolinë lokali bashkë me persona të tjerë dhe pas ngacmimeve me fjalë Qiqi ka shkuar në shtëpi për të marrë thikën, duke plagosur Kodrën. Në këto momente personat e tjerë sulmuan Qiqin me grushte e shkelma, duke e dëmtuar lehtë.
U konfliktuan fizikisht me 2 persona dhe kundërshtuan punonjësit e policisë, 3 në pranga
Ndërkohë 3 persona mes të cilëve një punonjës i tatimeve në Korçë janë arrestuar pasi u përfshinë në një sherr të ndodhur gjatë Festës së Birrës që po zhvillohej në Korçë. Ngjarja ka ndodhur më datë 18.08.2025, rreth orës 01:00, në lagjen nr. 17, Korçë, në vendin ku ishte duke u zhvilluar Festa e Birrës. Sipas informacioneve punonjësi i tatimeve i identifikuar si Aurel Mullalli 51- vjeç dhe dy personat e tjerë që ishin së bashku me të, në gjendje të dehur janë konfliktuar me një vajzë dhe një djalë që ishin punonjës tek njëra prej stendave të aktivitetit duke përdorur edhe dhunë fizike, ndërsa më pas kanë kundërshtuar me forcë edhe punonjësit e policisë gjatë shoqërimit. Përveç 3 të arrestuarve policia bën me dije se nisi procedimi edhe për 7 persona të tjerë shokë të tre të arrestuarve, të cilët janë përpjekur të pengojnë forcat e policisë për të shoqëruar 3 personat në fjalë. “Në përfundim të veprimeve hetimore të kryera nga oficeri i Policisë Gjyqësore i Prokurorisë së Korçës, në bashkëpunim me shërbimet e Komisariatit të Policisë Korçë, u arrestuan në flagrancë  shtetasve Aurel Mullalli, 51 vjeç, S. M., 23 vjeç, dhe E. B., 40 vjeç, banues në Zëmblak, për veprat penale “Kundërshtimi i punonjësit të policisë së rendit publik” dhe “Plagosja e lehtë me dashje”, kryer në bashkëpunim. Gjithashtu, u referuan materialet në Prokurori, ku filloi procedimi penal për shtetasit A. P., 21 vjeç, banues në Tiranë, A. P., 30 vjeç, banues në fshatin Kuç i Zi, B. H., 18 vjeç, D. M., 35 vjeç, G. B., 19 vjeç, L. M., 39 vjeç dhe Xh. H., 25 vjeç, banues në fshatin Zëmblak, për veprën penale “Kundërshtimi i punonjësit të policisë së rendit publik”, njoftoi dje policia. Materialet procedurale iu referuan Prokurorisë së Korçës, për veprime të mëtejshme.