Një ngjarje që mund të ishte kthyer në tragjedi është shmangur në qytetin e Viterbos në Itali, gjatë festës tradicionale të Shën Rozës. Dy shtetas turq janë arrestuar nga policia italiane pasi dyshohet se po përgatitnin një atentat të armatosur gjatë eventit, ku ishin të pranishëm rreth 40 mijë njerëz.
Dy të dyshuarit, të lidhur me rrjetin kriminal të bosit turk Boris Boyun, u kapën në një bed & breakfast pranë vendit të ngjarjes, në rrugën “Via di Santa Rosa”, ku u gjetën të pajisur me një mitraloz dhe dy armë zjarri me municion. Dyshohet se qëllimi i tyre ishte të shkaktonin panik dhe të ndërmerrnin një operacion për lirimin e Boyun nga burgu.
Policia ndërhyri pas një sinjalizimi nga pronari i banesës, i cili u shqetësua nga mungesa e bagazheve dhe sjellja e çuditshme e të dyshuarve. Sipas autoriteteve italiane, një nga pasaportat e konfiskuara nuk përputhet me identitetin e njërit prej të ndaluarve, duke lënë të hapur mundësinë e pranisë së një personi tjetër në arrati.
I pranishëm në Viterbo ishte dhe ministri i Jashtëm dhe zëvendëskryeministri i Italisë, Antonio Tajani, i cili u transferua në një kazermë për arsye sigurie, ndërsa ambasadori izraelit, i ftuar për të marrë pjesë në festë u këshillua të largohej.
Hetimet italiane zbulojnë një prani të konsiderushme të elementëve të mafies turke në zonën e Viterbos, e lidhur me krimin e organizuar ndërkombëtar dhe fondamentalizmin islamik. Organizata kriminale e Boris Boyun ka shfrytëzuar struktura të mikpritjes së emigrantëve si bazë për depozitimin e armëve dhe për planifikimin e aktiviteteve kriminale. Arrestime të tjera janë kryer edhe muajt e fundit, përfshirë kapjen e Ismail Atiz, i akuzuar për pastrim parash, shantazh dhe posedim armësh.
Hetimet e policisë italiane kanë nxjerrë në dritë lidhje të mundshme midis kësaj organizate dhe degës së ISIS-it të njohur si “Isis-Khorasan”, duke theksuar praninë e elementëve radikalë të ardhur nga Lindja e Mesme pas rënies së kalifatit dhe vrasjes së udhëheqësit të tij, Abu Bakr al-Baghdadi.
Festa e Shën Rozës është një ngjarje shpirtërore me shekuj histori në Viterbo. Këtë vit kishte si temë “Paqen”. Megjithë tensionin dhe shqetësimin e shkaktuar, manifestimi u zhvillua me sukses, edhe pse autoritetet u detyruan të merrnin masa të paprecedenta për të mbrojtur jetën e qytetarëve dhe personaliteteve të pranishme.
Kulla apo makina e Shën Rozës është një strukturë e lartë rreth 30 metra, me peshë që arrin deri në 5 tonë, e ndërtuar nga dru, metal dhe materiale të lehta moderne, e ndriçuar me qindra drita dhe e zbukuruar në mënyrë artistike. Ajo përfaqëson një monument kushtuar Shën Rozës, mbrojtëses së qytetit të Viterbos.
Kjo kullë transportohet mbi supe nga rreth 100 burra të fortë të quajtur “Facchini di Santa Rosa” (barrëmbajtësit e Shën Rozës), të cilët e mbartin nëpër rrugët e qytetit në mbrëmjen e 3 shtatorit, datë që përkon me përvjetorin e vdekjes së shenjtores në vitin 1258.
Sipas hipotezave të para hetimore, objektivi mund të kishte qenë turma e pjesëmarrësve ose drejtpërdrejt “kulla” e Shën Rozës që gjatë festimeve shëtit nëpër rrugët e qytetit si simboli fetar i Viterbos. Lajmi ka shtyrë autoritetet lokale të ndërmarrin menjëherë masa operative urgjente, duke thirrur Komitetin për Sigurinë Publike. Janë mobilizuar repartet speciale si njësitë NOCS, njësite antishpërthyese me qen, snajperë të vendosur në çatitë e ndërtesave, si dhe kontrolle të shtuara përgjatë gjithë itinerarit të procesionit. Në mënyrë krejtësisht të jashtëzakonshme, transportimi i Kullës ose Makinës së Shën Rozës është zhvilluar me ndriçimin publik përgjatë një pjese të madhe të rrugës e një vendim pa precedent në histori e që zakonisht zhvillohet në errësirë për të theksuar efektin skenik të kullës së ndriçuar./ Alba Kepi/
