Data 28 dhjetor është caktuar për mbajtjen e zgjedhjeve të jashtëzakonshme në Kosovë. Shpallja e kësaj date u bë nga presidentja e vendit, Vjosa Osmani, në një konferencë për media.
Por analisti Blerim Burjani, në një lidhje të drejtëpërdrejtë në edicionin qendror të lajmeve në televizionin kombëtar Vizion Plus, me moderator Roland Zilin tha se kjo datë nuk u prit mirë nga subjektet politike.Lexo edhe :Related Posts
Siç u shpreh analisti, partia opozitare pretendon se u zgjodh pikërisht kjo datë pasi rikthehen emigrantët, dhe sipas tyre LVV-ja i ka raportet e mira me diasporën.
Z. Burjani parashikoi se Vetëvendosja nuk mund të marrë më shumë se 40% të votave.
Ai shtoi se nga e gjithë kriza e tejzgjatur politike në Kosovë, partia që është prekur më shumë është ajo e Albin Kurtit, Vetëvendosja.
INTERVISTA E PLOTË:
Si e gjeti klasën politike vendimi i sotëm i presidentes Osmani për zgjedhjet e reja në datën 28?
Burjani: Disa subjekte politike në Kosovë e kanë cilësuar ose e kanë interpretuar ndryshe këtë vendim, sepse nuk është dashur të jetë data 28 dhjetorit. Në anën tjetër, Lëvizja Vetëvendosje dhe presidentja duket se kanë një marrëveshje ndërmjet tyre. Kështu mendohet në Kosovë, përkatësisht nga partia opozitare, për shkak se vjen diaspora. LVV-ja i ka raportet e mira me diasporën, ata kanë punuar më shumë me diasporën dhe dëshirojnë që ta kenë diasporën me vete në ditën e zgjedhjeve, më 28 dhjetor. Është, thjesht, një luftë e madhe për pushtet në Kosovë midis pozitës dhe opozitës, apo tani midis partive politike në Kosovë, se kush do të fitojë. Populli tani e ka në dorë kë do ta ndëshkojë. A do ta ndëshkojë Lëvizjen Vetëvendosje që ishte në pushtet dhe nuk arriti të zgjidhë asnjë prej problemeve, e futi shtetin në kolaps ekonomik dhe në bllokadë ekonomike? I la punëtorët pa punë të RTK-së, pra, 700 gazetarë, përkatësisht punëtorë teknikë të RTK-së, mbeten pa paga. Kjo rrezikoi po ashtu edhe dhënien e pagave në shërbimin civil të shtetit dhe në transportin publik, veçanërisht në Komunën e Prishtinës dhe Gjilanit.
Ndërkohë, ju thatë që ky është një vendim që në një farë mënyre ndëshkoi Vetëvendosjen. Në krahun tjetër, a pritet të riorganizohet faktori opozitar në mënyrë që të maksimalizojë votat për të marrë pushtetin?
Burjani: Nuk besoj që opozitarët do të mblidhen të gjithë së bashku, apo partitë politike opozitare të bëjnë një koalicion të fuqishëm kundrejt LVV-së. Ata dëshirojnë të garojnë vetëm. Nuk kanë vullnet, sepse të gjithë e shohin njëri-tjetrin si kundërshtar të ashpër politik, dhe gjithkush dëshiron të përfitojë më shumë, apo të fitojë më shumë vota nga elektorati. Kjo mbetet ideja, luftë e madhe për pushtet jo vetëm brenda pozitës, por edhe brenda opozitës. Edhe në pozitë ka njerëz që kanë probleme në LVV qysh me hyrë në lista. Edhe te këta të opozitës ka problem, as nuk munden të komunikojnë njëri me tjetrin në opozitë dhe nuk dëshirojnë fare ndoshta të komunikojnë, sepse dëshirojnë që vetë të fitojnë aty. Madje, është e çuditshme, as Aleanca nuk ka kurrfarë ideje nëse do ta kalojë pragun. Ajo nuk ka kurrfarë ideje që do të shkojë në zgjedhje të përbashkëta me dikë, apo do të jetë pjesë e koalicionit me ndonjë subjekt politik. Ajo dëshiron të garojë vetë. Nisma po ashtu nuk dihet a do të jetë vetëm apo do të hyjë në koalicion me ndonjë subjekt politik për të maksimalizuar shanset e saj që të hyjë në Parlament.
Nga krahu tjetër, Vetëvendosja, a mundet ajo që të riorganizohet brenda për brenda për të marrë votat që i munguan në zgjedhjet e kaluara, në mënyrë që të jetë e pavarur, le të themi, nëse merr pushtetin më 28 dhjetor?
Burjani: Qëllimi kryesor i Lëvizjes Vetëvendosje është vetë të garojë, vetë t’i bëjë të gjitha punët. Ajo tenton t’ia lërë fajin plotësisht opozitës se ka ndodhur kjo situatë. Nuk e besoj që Vetëvendosja mund të marrë më shumë se 42%, madje mund të bjerë në 40%. Sidoqoftë, ta shohim vullnetin apo verdiktin e popullit, sepse edhe opozita po luan me të njëjtën letër. Po thotë që këta s’mund t’i marrin më 42%, e lëre më 48% apo 50% sa mendojnë vetëvendosja që mund të fitojnë. Pra, Vetëvendosja ka qëllim të fitojë 50%, por këtë s’mund ta bëjë më. Të shohim se ata po kalkulojnë 50%. Të shohim se çfarë do të na sjellin zgjedhjet e ardhshme në Kosovë. Po besoj që Vetëvendosja më asnjëherë në historinë e vet nuk do të mund t’i marrë ato vota që i ka pasur para katër vjetëve, por mund të bjerë në 40%. Tani shohim kë do ta ndëshkojë populli, opozitën apo Lëvizjen Vetëvendosje që ishte në pushtet dhe nuk e ka kryer punën siç duhet.
Cilën nga forcat politike dëmtoi më shumë kriza e tejzgjatur politike në Kosovë?
Burjani: Po, të gjitha partitë kanë probleme. Mendoj që më së shumti e ka dëmtuar Vetëvendosjen, sepse ishte parti në pushtet. Pra, nuk arriti t’i zgjidhë problemet e mëdha në Kosovë, siç janë ato ekonomike dhe reformat sociale. U mor vetëm me veriun, përfundoi ashtu siç përfundoi, e dini, në zgjedhje të jashtëzakonshme. LVV-ja nuk dëshironte të bënte kompromis dhe të hynte në koalicion me ndonjë subjekt tjetër politik, e donte vetëm LDK-në. LDK-ja nuk deshi. Po ashtu, nuk e bëri një kompromis me Nismën, t’i jepte asaj ato tre vota dhe të kalonte, domethënë, të bënte një “qeveri të minorancës” ose një “qeveri të vogël”. Por nuk deshi as me Nismën të bënte kompromis pa ia dhënë pozitën e kryeparlamentarit. E çoi veten, siç thonë në gjuhën popullore, poshtë, e çoi veten në zgjedhje të jashtëzakonshme. Nuk i dihet më çfarë do të ndodhë me Lëvizjen Vetëvendosje. A mund ta përsërisë rezultatin e njëjtë? Është pikëpyetje e madhe a mund t’i fitojë prapë 42%, e lëre më 50%. Ata po vlerësojnë që është mirë që po shkojnë në zgjedhje dhe mund të fitojnë pak më shumë. Ta shohim pra këtë ide dhe qëllimin e tyre.
/vizionplus.tv
