Tag: vatikan

Kryeministrit Edi Rama duket se po i del situata jashtë kontrollit, teksa një goditje e fortë i ka ardhur këtë fundjavë nga Italia (Vatikani). Në një ngjarje historike që mori vëmendje botërore, varrimi shtetëror i Papa Françeskut në Vatikan këtë të shtunë ishte një moment i shenjtë, ku morën pjesë më shumë se 50 liderë shtetesh dhe qindra mijëra besimtarë. Por, ndërsa shumë udhëheqës botërorë u bashkuan për t’i dhënë lamtumirën e fundit Papës, një emër mungoi në këtë listë të shquar: kryeministri shqiptar, Edi Rama. Ky i fundit, megjithëse kishte mundësinë për të qenë pjesë e kësaj ngjarjeje madhështore, thuhet se nuk mori ftesë për të marrë pjesë në ceremoninë solemne. Në vend të tij, Presidenti Bajram Begaj udhëhoqi delegacionin shqiptar, i shoqëruar nga ministrat Igli Hasani dhe Adea Pirdeni, si dhe Ambasadorja e Shqipërisë në Vatikan, Majlinda Frangaj.
Prapaskenat
Por mungesa e Z. Rama, ndërkohë që dy ministra të tij ishin të pranishëm, madje pjesë të ceremonisë kishte edhe rreth 23 kryeministra të tjerë, si ai i Hungarisë, Viktor Orban, është një tregues i qartë se shefi i qeverisë shqiptare është lënë qëllimisht jashtë këtij momenti të rëndësishëm. Për këtë mungesë të ftesës, burimet thonë se një nga arsyet mund të jetë ndërhyrja e shërbimeve sekrete amerikane, të cilat kanë shprehur shqetësimin se kryeministri Rama mund ta shfrytëzonte këtë ceremoni për të bërë takime të mundshme me figura të njohura, si presidenti i Shteteve të Bashkuara të Amerikës, Donald Trump, apo liderë të tjerë si presidenti frances, Macron, dhe për të realizuar fotografi që mund të përdoren për fushatën e tij politike në Shqipërië, duke qenë se jemi para zgjedhjeve parlamentare të 11 majit.
Ky lloj manovrimi është i njohur për kryeministrin shqiptar, i cili ka shpeshherë tendencën për të shfrytëzuar çdo mundësi për përfitime personale dhe imazhin e tij politik. Kështu që fakti që dy ministrat e tij, Pirdeni dhe Hasani, ishin të ftuar dhe morën pjesë në varrimin e Papës, hedh dritë mbi një realitet të hidhur, se, Edi Rama mund të kishte marrë pjesë, por ai nuk është konsideruar si një figurë e dëshiruar për këtë ngjarje. Por ky vendim ka dërguar një mesazh të fortë që Rama, ndonëse i fuqishëm brenda Shqipërisë, është perceptuar si i padobishëm dhe i papërshtatshëm për takime të tilla ndërkombëtare. Pra kjo mungesë e ftesës është një tregues i qartë që Edi Rama nuk është parë si një lider i besueshëm dhe i përputhshëm për momentet kyçe në arenën ndërkombëtare. Edhe pse Shqipëria ka një histori të pasur dhe të respektuar në marrëdhëniet ndërkombëtare, duket se udhëheqësi i saj është i padobishëm në sytë e komunitetit botëror.
Ndërkohë Rama është gjithashtu i njohur për përdorimin e çdo mundësie për të krijuar imazhe që mund ta ndihmojnë atë në fushatën e tij, dhe ky moment solemn në Vatikan, natyrisht, mund të ishte një mundësi për ta shfrytëzuar për qëllime politike. Por, sipas informacionit të mbledhur, kjo lloj sjellje ka ngritur shqetësime tek partnerët ndërkombëtarë, duke e lënë atë jashtë ngjarjes. Megjithatë kjo ka hapur një debat të madh në Shqipëri dhe në rrethin ndërkombëtar. Rama është parë si një lider që nuk mund të bashkëpunojë në nivel global me atë seriozitet dhe përkushtim që kërkohet për të qenë pjesë e ngjarjeve të tilla dhe kjo është një goditje e fortë për imazhin e tij si lider i një shteti që kërkon të integrohet më thellë në strukturat ndërkombëtare.
Detaje nga ceremonia e varrimit të Papa Françesku
Ndërkaq kujtojmë se në një ceremoni ku morën pjesë nga mbretër dhe mbretëresha, 50 krerë shtetesh, 23 kryeministra, delegacione nga 160 vende, rreth 4000 meshtarë dhe të paktën 120 delegacione me përfaqësues fetarë nga e gjithe bota, u varros këtë të shtunë Papa Françesku, i cili ndërroi jetë më 21 prill 2025, pasi udhëhoqi për 12 vite rreth 1.3 miliardë katolikë në mbarë botën. Ceremonia mortore u mbajt në sheshin “Shën Pjetri” në Vatikan, me arkivolin që u vendos në qendër të oborrit të kishës, pasi qëndroi i hapur për homazhe 3 ditë radhazi brenda bazilikës, në të cilat morën pjesë 200 mijë besimtarë.
Procesioni i kardinalëve në Bazilikën “Shën Pjetri” shënoi fillimin e ceremonisë mortore. Arkivoli i kreut të Kishës Katolike u mbajt mbi supe nga sediarët, duke dalë nga Bazilika “Shën Pjetri” .Mbi arkivolin e Papës Françesku u vendos i hapur Ungjilli. Duartrokitjet e forta, aq sa hidhërimi që kishte kapluar sheshin “Shën Pjetri”, hapën dhe mbyllën ceremoninë mortore të drejtuar nga kardinali Giovanni Battista Re, Dekan i Kolegjit Kardinalëve. Pas ceremonisë mortore që nisi në orën 10:00 dhe përfundoi në orën 12:03, arkëmorti i kreut të Kishës Katolike u dërgua në Bazilikën “Shën Maria e Madhe”, ku u varros, ndërsa 150 mijë besimtarë ishin të pozicionuar në trotuaret e rrugëve ku kaloi kortezhi. 250 mijë të tjerë ishin të pranishëm brenda dhe përreth Bazilkës “Shën Pjetri”, ku u mbajt ceremonia mortore. Françesku është Papa i parë që varroset në Bazilikën “Shën Maria e Madhe” pas 400 vitesh, dhe i pari Papë që varroset jashtë Vatikanit pas 100 vitesh.
Ceremonia e varrimit në Bazilikën “Shën Maria e Madhe”- që u kryesua nga kardinali Kamerlengo, Kevin Farrell, i cili do të kujdeset për çështjet e përditshme të Kishës deri në zgjedhjen e Papës së ri – nisi me një skenë shumë domethënëse. Lulet e fundit për Françeskun u vendosën nga fëmijë të racave të ndryshme, pjesë të shtresave të margjinalizuara, për të cilët Papa i Kishës së të varfërve foli dhe kërkoi më shumë. Në mesin e dhjetëra liderëve botërorë ishin dhe presidenti Donald Trump, presidenti Emmanuel Macron, kryeministri Keir Starmer, presidentja e Komisionit Europian, Ursula Von der Leyen, presidenti Volodymyr Zelensky, Sekretari i Përgjithshëm i Kombeve të Bashkuara, Antonio Guterres, delegacioni zyrtar i Federatës Ruse, i kryesuar nga Ministrja e Kulturës, Olga Borisovna Lyubimova. Në ceremoni është i pranishëm edhe ish-presidenti amerikan Joe Biden, bashkë me bashkëshorten e tij, Jill Biden.
Kryeministrja italiane Giorgia Meloni ishte ndër të parët që mbërriti në shesh, duke përfaqësuar shtetin mikpritës të Vatikanit në një nga momentet më të rëndësishme ceremoniale të dekadës. Delegacioni shqiptar përbëhej nga presidenti Bajram Begaj, ministri i Jashtëm Igli Hasani, ministrja e Shtetit për Administratën Publike dhe Kundër Korrupsionit, Adea Pirdeni, ambasadorja e Shqipërisë në Vatikan, Majlinda Frangaj dhe krerët e komuniteteve fetare në vendin tonë: Kreu i Kishës Katolike, Arjan Dodaj, Kreu i Komunitetit Mysliman, Bujar Spahiu, Kryegjyshi i Bektashinjve, Haxhi Dede Edmond Brahimaj dhe Kryepeshkopi i Ortodoksëve, Joani.