Vasil Llajo
TIRANË- “Veprën nuk e bëj as për vete, as për fëmijët e mi, por pikërisht për njerëzit”. Me këtë shprehje “alla-Prometeu” e përshkroi veten Vasil Llajo, pronari i laboratorëve “Intermedica”, njeriu që është akuzuar më së shumti publikisht se ka abuzuar në qindra mijëra euro me çmimet e testeve të Covid-it dhe që tashmë kërkon votat e qytetarëve, si pjesë e listës së hapur të kandidatëve për deputetë të kryeministrit Edi Rama, në Sarandë.
Llajo u prezantua nga modertorja Grida Duma në “Top Story” të martën e kësaj jave të fundit elektorale si një “politikan i ri”, pavarësisht moshës së tij, afro 70 vjeç.
Me kalimin e viteve, kur mosha biologjike të afron në fazën e “gjyshërimit”, ndërgjegja fillon dhe lëshon thirrjet e saj për pastrim. Askush nuk është pa mëkate në këtë botë dhe gjithësecili, në një moshë të caktuar, kërkon “katharsinin”. Biznesmeni Llajo, mesa duket, mund të ketë zgjedhur politikën për të realizuar “katharsisin” e tij. Një zgjedhje jo shumë tipike, duke pasur parasysh se politika, në asnjë vend të botës nuk shihet si lumë i pastër. Aq më tepër në Shqipëri, ku politika, jo vetëm nuk ka shërbyer për pastrim, por, përkundrazi, është përdorur si një mjet efikas për të mbuluar edhe paudhësitë e të shkuarës. Këtë e dëshmojnë plot raste të vjetra e aktuale.
Megjithatë, Vasil Llajo ka bërë zgjedhjen e tij dhe premton se “do të mendojë vetëm për njerëzit”, pasi paratë nuk i duhen. Kthehemi pak në kohë, në mesin e vitit 2020, kur pandemia e Covid-19 arriti kulmin e saj. Strukturat spitalore publike u përfshinë në kolaps. Qeveria e Edi Ramës ndërmori nismën për “liberalizimin” e kryerjes së testeve (tamponëve) që konstatonin ekzistencën ose jo të virusit Sars-Cov-2. Nën pushtetin e panikut nga sëmundja, si edhe nga nevoja për të lëvizur në kushtet e kufizimit, qindra mijëra qytetarë ishin të detyruar të kryenin testet e Covid.
“Liberalizimi” ishte krijimi i një lloj monopoli nga ana e qeverisë, duke i dorëzuar licensën përkatëse vetëm dy laboratorëve, në gusht 2020. Njëri prej tyre ishte “Intermedica” e Vasil Llajos. Tjetri ishte “Alnet” i Klodjan Allajbeut.
Dy laboratorët, në kushtet “monopolistike”, aplikuan çmime shumë të fryra për shqiptarët e varfër-12 mijë lekë të reja për tampon (95 euro).Ky çmim, në dukje shumë abuziv, krahasuar me vendet e tjera, u aplikua për një periudhë 4-mujore, nga gushti deri në nëntor 2020.
Vetëm pas një reagimi të fuqishëm publik, dy laboratorët, në nëntor të atij viti, u detyruan të ulnin çmimin për tampon në 65 euro (8500 lekë të reja), sërish shumë më i lartë se vendet e rajonit, por edhe shtete të tjera të fuqishme europiane.
“Boldnews.al” ka raportuar në atë kohë për çmimet abuzive të Vasil Llajos dhe Klodjan Allajbeut.
Në një hulumtim të kryer nga redaksia, si edhe bazuar në informacione publike, rezultonte se shtete, përfshirë edhe ato të zhvilluara, çmimi për një test PCR është shumë më i ulët në Shqipëri, madje, në vende si Franca edhe 3 herë më pak. Më konkretisht, në Serbi, vlera e një testi PCR në laboratorë privatë është 6 mijë dinarë, rreth 50 euro. Në Kosovë ishin licensuar dy laboratorë privatë për kryerjen e testeve PCR dhe çmimi varionte nga 40-50 euro.
Në Bosnje-Hercegovinë, çmimi i një testi PCR (tamponi për Covid-19) është rreth 70 euro. Ndërkohë, në Itali, në rajonin e Sardenjas, një prej më të pasurve në fqinjin tonë përtej Adriatikut, kryerja e një tamponi PCR kushton 70 euro. Referuar gjithnjë asaj kohe, mjeku Ermal Dobi, në një lidhje nga Franca për një emision në Tiranë, deklaroi për një emision në Tiranë se çmimi për një tampon në laboratorët privatë të atij vendi përllogaritet në rreth 23 euro.
Mjeku Fadil Cani nga Shkupi, po në të njëjtin emision, deklaroi se kryerja e tamponit për Covid-19 në Maqedoni kushton nga 40-60 euro.
Milionat e fituara nga “paniku” i njerëzve
Për të kuptuar më qartësisht se sa ka përfituar “Intermedica” e Vasil Llajos dhe “Alnet” i Allabeut nga historia e tamponëve të Covid-it, “Boldnews.al” iu rikthyer arkivit të saj, tek një raportim i datës 18 nëntor 2020. Në atë kohë, redaksia bëri disa llogari të thjeshta, referuar deklaratave publike të përfaqësuesve të të dy laboratorëve. Drejtuesja “ALNET” të Spitalit Amerikan në atë kohë, Albana Daka, në emisionin “Opinion” të Blendi Fevziut deklaroi, ndër të tjera se laboratori që ajo drejton, ka kryer 350 deri në 600 tamponë në ditë.
Referuar këtyre shifrave dhe duke mbajtur në konsideratë se çmim për tampon ishte 95 euro (12 mijë lekë të reja), atëherë “ALNET” i Spitalit Amerikan, gjatë periudhës Korrik-17 Nëntor 2020, ka arkëtuar në ditë nga 4.1 milionë lekë të reja deri në 7 milionë lekë të reja.
Më konkretisht;
– Për sasinë 350 tampone/në ditë, arkëtimi i “ALNET” është 33.250 euro (ose 4.1 milionë lekë të reja
– Për sasinë 600 tampone/në ditë, arkëtimi i “ALNET” është 57.000 euro (ose 7 milionë lekë të reja
Laboratori “Alnet” ka arkëtuar për rreth 4 muaj (120 ditë), kohë që ka aplikuar çmimin 95 euro për tampon, nga 400 mijë euro deri në 685 mijë euro. E shprehur në lekë shqiptare, nga 50 milionë lekë të reja deri në 85 milionë lekë të reja.
Në një situatë të ngjashme fitimi duket se është edhe laboratori tjetër i licensuar, “Intermedica”. Në emisionin e Fevziut, përfaqësuesi i “Intermedica-s”, Vasil Llajo, deklaroi se laboratori kryen 500-600 tamponë në ditë. Duke ndjekur të njëjtën logjikë shifrash, “Intermedica” ka arkëtuar një vlerë që varion nga 47.500 euro (5.8 milionë lekë të reja) deri në 57 mijë euro (7 milionë lekë të reja) në ditë.
Për rreth 4 muaj, laboratori “Intermedica”, vetëm për tamponin për Covid-19, ka arkëtuar një shifër nga 68 milionë lekë të reja deri në 85 milionë lekë të reja./BoldNews
