Adriatik BALLA
Federiko Valverde, njëri prej liderëve të Real Madridit ka folur për televizionin zyrtar të klubit në prag të ndeshjes me Salsburgun, e vlefshme për t’u kualifikuar në të tetën e finales së Botërorit të Klubeve. Uruguaiani e ka nënvizuar rëndësinë e kësaj loje për rritjen kolektive dhe koordinimin e grupit me trajnerin e ri. “Kjo ndeshje na shërben për t’ju përshtatur atyre që i kërkon trajneri. Duhet të qëndrojmë të bashkuar, që të njihemi më mirë. Kanë ardhur shokë të rinj në skuadër dhe do të jetë mjaft e rëndësishme të përgatitemi sa më mirë të jetë e mundshme për t’u përballur në një ndeshje të vështirë dhe të rëndësishme”, deklaroi fillimisht ai.
Pas fitores kundër Paçukas, aq më shumë me golin e shiritit të kapitenit në krahë, Valverde e ka shprehur krejt gëzimin e tij. “Është një turne i ri, një eksperiencë e bukur. Pasioni i tifozëve të Real Madridit këtu është impresionues dhe na jep një forcë të madhe.” Në aspektin fizik, mesfushori e ka pranuar se ka hasur në disa vështirësi që iu shfaqën nga klima verore amerikane. “Është mjaft nxehtë, por është e njëjta për të gjithë. Kundër Salzburgut loja do të luhet natën dhe kjo do të na ndihmojë.” Në fund, fjalë të rëndësishme dhe me peshë për trajnerin e ri, Ksabi Alonso, i cili së fundmi e mori postin e Karlo Ançelotit. “Ksabi më jep besim, më kërkon të jem i qetë, më kërkon kontroll dhe të sulmoj e të gjej hapësira. Për mua është shumë e rëndësishme ta dëgjoj këtë qasje dhe mbështetje.
Duhet ta vazhdoj të jap shembull për bashkëlojtarët e mi.” Një fitore kundër Salzburgut do t’ia siguronte Real Madridit vendin e parë në grup dhe një përballje në të tetën e finales me Juventusin ose me Mançester Sitin. Ndërkohë, një mesfushor i ri mund të vijë, por sipas një legjende të klubit, Real Madridi duhet të mendojë edhe për një sulmues tjetër – konkretisht për Niko Uilliams. Këto janë fjalët e Luis Figos, i cili së fundmi ka folur për “Diario AS”. “Ka shumë lojtarë që më pëlqejnë. Do ta nënshkruaja Niko Uilliams, patjetër. Ai është një thesar. Dhe çmimi i tij më duket i përballueshëm, duke pasur parasysh sa shpenzohet sot. Do të ishte një përforcim i mirë për shkak të cilësisë që ka, por edhe për shkak të moshës së tij”, nënvizoi ai. Figo, që ka qenë vetë anësor gjatë karrierës si futbollist, e krahasoi veten me Uilliams: “Jemi lojtarë të ndryshëm. Ai është një lojtar që më pëlqen shumë për shkak të pozicionit të tij. Më pëlqejnë anësorët, sepse aty kam luajtur më mirë në karrierën time. Por nuk isha aq i shpejtë sa ai, do të doja të isha aq i shpejtë.”
