Tag: valiev

Adriatik BALLA
Kampionati Botëror i Mundjes që po zhvillohet në Kroaci, po sjell fryte për Shqipërinë, pasi dje u sigurua medalja e radhës për mundjen tonë të lirë. Ishte Çermen Valiev që i dha Shqipërisë medalje argjendi, pasi zuri vendin e dytë në peshën e tij trupore, duke ngjitur mundjen shqiptare në nivele shumë të larta në botë. Nuk është i vetmi, pasi edhe dy mundësit e tjerë, Islam Dudaev dhe Zelimkhan Abakarov, gjithashtu të ardhur nga Federata Ruse e të natyralizuar me pasaportë si shqiptar, kanë performuar në nivele të larta dhe i kanë sjellë Shqipërisë medalje të rëndësishme europiane, botërore e madje dhe olimpike.
Gara e Valievit
E thonë edhe mediat sportive në tërësi që mundja shqiptare shkroi një tjetër arritje në arenën ndërkombëtare teksa ka siguruar medalje në Kampionatin Botëror që po zhvillohet në Zagreb të Kroacisë. Çermen Valiev, mundësi rus i natyralizuar si shqiptar, pas medaljes së bronztë në Lojërat Olimpike, ka siguruar sot medaljen e argjendtë në Botëror. Valiev kishte arritur të kalonte me radhë kualifikueset me lehtësi duke mposhtur mongolin Togsjargal, belgun Veliev, amerikanin Karr dhe rusin Sidakov për të arritur në finalen e madhe tre peshës deri në 74 kilogram të stilit të lirë. Përballë tij në finale ishte japonezi Kota Takahashi i cili u tregua më i saktë ne veprimet e tij në fillim dhe ia doli ta mposhte në pak më shumë se 4 minuta me rezultatin 8-2, duke siguruar medaljen e artë falë edhe një dëmtimi në gju të Valiev i cili nuk mund të vazhdonte dot më ndeshjen. Gjithsesi, për Valiev ky ishte një rezultat shumë i mirë, duke pasur parasysh që kjo ishte hera e parë në karrierë që ai merrte pjesë në një Kampionat Botëror.
Referencat e një finaleje të madhe, dhe qëndrimi i federatës së mundjes
Mbrëmjen e djeshme, ruso-shqiptari Valiev, që ka prejardhje nga Osetia, kërkoi të artën në kategorinë deri 74 kg, në stil të lirë. Por pësoi 8:2 nga mundësi i Japonisë, Kota Takahashi. Kështu Valievit, që ishte bartës i parë, i takoi medalja e argjendtë botërore. 26-vjeçari nga Osetia Veriore, për Shqipërinë ka fituar medalje të bronztë olimpike dhe medalje të artë evropiane. Tani i siguroi Shqipërisë edhe medalje të argjendtë botërore. Valievi finalen e siguroi që në takimin e të dielës. Për të ardhur deri në finale i siguroi katër fitore bindëse. Federata Shqiptare e Mundjes ka shkruar se Valievi në finale u paraqit i lënduar. “Në përballjen finale, Çermen Valiev tregoi shpirtin e një kampioni të vërtetë. Pavarësisht një dëmtimi të rëndë në ligament, ai zgjodhi të mos dorëzohej dhe vazhdoi garën me guxim e forcë të jashtëzakonshme. Dhimbja dhe pamundësia fizike nuk e lanë të triumfonte ashtu siç e meritonte, por nuk e ndaluan dot të siguronte një medalje të argjendtë të madhe për Shqipërinë. Shërim të shpejtë kampion, je shembulli i sakrificës, forcës dhe krenarisë sonë”, ka shkruar Federata Shqiptare e Mundjes.