Lajmidites.com

Tag: universiteti

  • Disapora4Innovation, vizitë studimore në H-Farm, platforma më inovative e Europës

    Disapora4Innovation, vizitë studimore në H-Farm, platforma më inovative e Europës

    Në kuadër të projektit “Diaspora4Innovation”, që ka si qëllim aktivizimin e kapitalit intelektual të diasporës shqiptare – akademikë dhe profesionistë – për të ndikuar në zhvillimin ekonomik si dhe krijimin e një ekosistemi të ndërlidhur e të qendrueshëm inovacioni dhe sipërmarrjeje, në Shqipëri, një grup akademikësh shqiptarë, rezidentë dhe nga diaspora, do të zhvillojnë një vizitë studimore në H- FARM, një nga platformat më inovative të Europës për arsim, sipërmarrje dhe teknologji, në Venecia.

    Kjo vizitë studimore, e cila është propozuar nga akademikja e diasporës Valentina Ndou, është konceptuar si një përvojë dinamike mësimore për akademikët e Diaspora4Innovation, për t’u njohur përmes komunitetit akademik dhe sipërmarrës të H-FARM me qasje të reja mbi inovacionin dhe sipërmarrjen. Ata do të ndajnë përvojat dhe praktikat e tyre, ndërsa do të fitojnë njohuri të drejtpërdrejta mbi metoda dhe perspektiva bashkëkohore dhe mbi mënyrën, se si krijohen dhe zhvillohen mjediset e bazuara në inovacion.

    Përgjatë kësaj vizite, akademikët do të vizitojnë Future Farming, që përfaqëson një nga projektet më inovative të H-FARM, duke treguar se si teknologjia po transformon bujqësinë.

    Do të vijojnë me vizitën në kampusin H-FARM, ku do të njihen me Qendrën e Startup-eve, udhëhequr nga Zeno Tosoni, Menaxher i Qendrës së Sipërmarrjes dhe Startup-eve; do të njihen me modelet praktike të H-FARM mbi punëtorinë mbi sipërmarrjen dhe iniciativat startup, si edhe me aktivitetet e kolegjit H-FARM, që do të prezantohet nga Antonella Sannella, Drejtore Ekzekutive e Kolegjit H-FARM dhe Silvia Dell’Acqua, Shefe e Partneriteteve Ndërkombëtare dhe Korporative të Kolegjit H-FARM.

    Projekti Diaspora4Innovation që u lançua zyrtarisht në maj 2024, është konceptuar mbi tre shtylla kryesore: Diaspora akademike; Diaspora profesionale si mentore, start-up-e apo aktorë të ekosistemit sipërmarrës; Diaspora si promovuese dhe lehtësuese e lidhjeve ndërkombëtare.

    Pjesa më thelbësore e projektit është Diaspora4Education, që mundëson, përmes Marrëveshjes së Bashkëpunimit “Diaspora4Education”- nënshkruar në Tiranë – në partneritet me EU4Innovation, projekt i GIZ në Shqipëri, GERMIN dhe tetё Universiteteve Shqiptare, të cilat angazhohen që nëpërmjët akademikëve e lektorëve të tyre në bashkëpunim me akademikë e profesionistë të diasporës, të rishikojnë e përmirësojnë kurse specifike brenda programeve të ndryshme studimore, duke përfshirë koncepte të inovacionit dhe sipërmarrjes, por edhe si të zhvillojnë bashkëpunime në fushën e kërkimit shkencor, me një vëmendje të shtuar mbi projektet e Horizon Europe.

    Pritet, gjithashtu që rreth 500 nxënës të ekspozohen ndaj këtyre temava/koncepteve mbi sipërmarrjen e inovacionin, apo metoda të reja në mësimdhënie në universitetet përkatëse.

    Pjesëmarrës në këtë vizitë studimore do të jenë akademikët rezidentë: Irina Branko – Lektore, Fakulteti i Arkitekturës dhe Urbanistikës, Universiteti Politeknik i Tiranës; Blendi Shima – Lektor, Fakulteti i Ekonomisë, Instituti Kanadez i Teknologjisë; Gentjan Ulaj – Asistent Lektor, Fakulteti i Ekonomisë dhe Biznesit, Universiteti i New York-ut në Tiranë; Entelë Gavoçi – Shefe e Departamentit të Inxhinierisë Elektronike dhe Telekomunikacionit, Instituti Kanadez i Teknologjisë; Nihat Adar – Shef i Departamentit të Inxhinierisë së Softuerit, Instituti Kanadez i Teknologjisë; Blerta Dragusha – Dekane e Fakultetit të Ekonomisë, Universiteti i Shkodrës “Luigj Gurakuqi”; Vehap Kola – Asistent lektor i Menaxhimit, Departamenti i Administrimit të Biznesit, Universiteti i New York-ut në Tiranë; Edmira Cakrani – Lektore, Fakulteti i Ekonomisë, Universiteti Western Balkan University si dhe akademikët nga diaspora, Valentina Ndou – Profesore e Asociuar e Certifikuar dhe Kërkuese shkencore, Fakulteti i Inxhinierisë për Inovacion në Inxhinierinë e Menaxhimit, Universiteti i Salentos; Endrit Kromidha – Profesor i Asociuar në fushën e Ndërmarrjes dhe Inovacionit, Departamenti i Menaxhimit, Universiteti i Birmingham-it; Adelajda Matuka – Asistente junior, Departamenti i Ekonomisë, Universiteti i Bolonjës; Lisana Berberi – Senior Researcher, Qendra e Llogaritjeve Shkencore / Karlsruhe Institute of Technology.

  • Nis faza e dytë e regjistrimeve në Universitetin e Tiranës, zgjat vetëm 48 orë

    Nis faza e dytë e regjistrimeve në Universitetin e Tiranës, zgjat vetëm 48 orë

    Universiteti i Tiranës ka hapur sot fazën e dytë të regjistrimeve për vitin akademik 2025–2026.

    Sipas një njoftimi të publikuar në rrjetet sociale, faza II e raundit të parë të regjistrimeve do të zgjasë vetëm 48 orë.

    Kandidatët që kanë rezultuar fitues duhet të paraqiten pranë sekretarive mësimore të fakulteteve përkatëse me dokumentacionin e kërkuar për të përfunduar procesin e regjistrimit.

    Universiteti thekson se “pas çdo faze zhvendoset vija e kuqe në listë, duke krijuar mundësinë për përfshirjen e fituesve të rinj, të cilët mund të regjistrohen në fazën pasardhëse”.

    Raundi i parë i regjistrimeve zhvillohet nga 29 gusht deri më 11 shtator 2025, i ndarë në shtatë faza 48-orëshe: Faza I ishte më 29–30 gusht, Faza II nis sot dhe do të zgjasë deri më 1 shtator, Faza III: 2–3 shtator, Faza IV: 4–5 shtator, Faza V: 6–7 shtator, Faza VI: 8–9 shtator dhe Faza VII: 10–11 shtator.

  • Fatima Al-Fihri, gruaja që themeloi universitetin e parë në botë, nëna e intelektualëve marokenë

    Fatima Al-Fihri, gruaja që themeloi universitetin e parë në botë, nëna e intelektualëve marokenë

    Ajo ishte arabe dhe myslimane, por mbi të gjitha një grua e madhe, grua me vizion dhe vullnetmira që shkroi emrin e saj në librin e madh të dijes dhe besimit. Fatima Al-Fihri, ishte gruaja që themeloi universitetin e parë në botë, nëna e intelektualëve marokenë, shpirti i begatuar nga besimi dhe fisnikëruar nga qëllimet e larta, të cilat e pavdekësuan atë, duke e shpërblyer përjetësinë e shpirtit të saj me lartësimin në shenjtërim. Ajo nuk ishte e vetmja grua e lavdishme e botës, por vepra e saj e ngjiti në qiejt e famës vlerën që blatoi ajo në themelet e dritës dhe shpirtërores.

    Historia e vendeve myslimane në përgjithësi dhe e Marokut në veçanti është plot me figura që kontribuuan në ndryshimin e rrjedhës së njerëzimit. Gjatë gjithë kohës, marokenët kanë ndikuar në fushat e shkencës, gjeografisë, filozofisë, fesë, arsimit dhe më shumë.

    Një figurë e tillë është Fatima bint Muhamed Al-Fihriya (e njohur gjithashtu si Fatima al-Fihri). Fatima al-Fihri u lind në vitin 800 pas Krishtit. Ajo ishte e bija e Mohammed Bnou Abdullah al-Fihri, një tregtar i pasur i cili u vendos në Fez me familjen e tij gjatë sundimit të Idris II. Deri më sot, jeta e Fatimes mban shumë sekrete edhe për historianët. Një mister i tillë rrethon datën e vdekjes së saj, e cila mund të ketë qenë rreth vitit 878. Gjatë jetës së saj, Fatima u quajt “nëna e djemve”. Sipas historianit Mohammed Yasser Hilali, “ky pseudonim ndoshta rrjedh nga bamirësia e saj dhe nga fakti që ajo mori studentët nën krahun e saj”.

    Fatime el-Fihri konsiderohet një shenjtore dhe ajo është shumë e respektuar në mesin e besimtarëve, veçanërisht në Fez. Në vitin 2017, në Tunizi u krijua një çmim për nder të saj. Ai shpërblen iniciativat që inkurajojnë aksesin në trajnime dhe përgjegjësi profesionale për gratë. Për më tepër, një program akademik dhe një bursë që u jepet studentëve nga Evropa dhe Afrika e Veriut i bëjnë homazhe Fatima al-Fihri.

    Fatimeja ishte një besimtare e devotshme. Kur ajo trashëgoi një shumë të madhe parash në kohën kur i vdiqën i ati dhe i shoqi, ajo vendosi t’i përdorte për të ndërtuar një xhami, të cilën komuniteti i saj mysliman në Fez i nevojitej urgjentisht, aq i madh sa për të përshtatur një numër gjithnjë në rritje besimtarësh. Pasi bleu tokë nga një burrë i fisit “Hawaara”, Fatimeja filloi projektin e saj të ndërtimit në fillim të muajit të Ramazanit të vitit 254 të Hegirës, ​​domethënë 859 pas Krishtit Nga shekulli i 10-të xhamia e famshme e el-Karawiyyin u bë instituti i parë fetar dhe universiteti më i madh arab i Afrikës së Veriut. Ajo tërhoqi shumë studentë dhe shkencëtarë të njohur. Aty organizoheshin rregullisht simpoziume dhe debate. Sipas dokumenteve të disponueshme, në universitet dhe në anekse të tjera në të gjithë Fes-in u krijuan katedra mësimore.

    Universiteti i parë në botë dhe institucioni i parë arsimor që jep diploma, Al Quaraouiyine është një nga më me ndikim dhe mbresëlënës në histori, veçanërisht duke pasur parasysh gjendjen e shoqërive në shekullin e 9-të, si dhe vendin e grave në ato shoqëri.

    Që një grua myslimane e Afrikës së Veriut të krijojë një institucion të tillë, të cilin e hapi për njerëzit e të gjitha moshave, klasave shoqërore dhe besimeve, është dëshmi e vizionit të saj të jashtëzakonshëm për shoqërinë e saj dhe mendësisë së saj novatore për mënyrat se si mund të transformohet arsimi.

    Universiteti më i vjetër ekzistues dhe që funksionon vazhdimisht, Universiteti i Al Quaraouiyine paraprin themelimin e të gjitha institucioneve arsimore më të themeluara dhe mbresëlënëse në botë, duke përfshirë Universitetin e Bolonjës (1088), Universitetin e Oksfordit (1096), Universitetin e Salamankës ( 1243), dhe Universiteti i Harvardit (1636).

    Për më tepër, termat dhe konceptet që lidhen me arsimin e lartë janë të gjitha të gjurmuara në praktikat e gjetura në Al Quaraouiyine, nga marrja e diplomave, tek veshja e xhufkave dhe rrobave akademike, tek paraqitja e një mbrojtjeje gojore, tek shokët që “lexojnë”.

    Biblioteka e Al Quaraouiyine është gjithashtu më e vjetra në botë, që përmban një kopje të Kuranit që daton në shekullin e 9-të të erës sonë, të shkruar me shkrimin kuf në lëkurën e një deveje, si dhe mijëra dorëshkrime nga një gamë e gjerë fushash. . Ai përmban gjithashtu një version arab të Ungjillit që daton në shekullin e 12-të pas Krishtit

    Përveçse ka një ndikim të thellë në arsim në shekujt pas themelimit të tij, Universiteti i Al Quaraouiyine ka tërhequr figura të panumërta të famshme gjatë historisë.

    Përveç një numri studiuesish të shquar myslimanë, universiteti tërhoqi edhe figura të shquara hebreje dhe të krishtera.

    Diplomati dhe gjeografi andaluzian Hassan al Wazzan ( Leo Africanus ), filozofi hebre Moses ben Maimon (Maimonides), filozofi islamik Ibn Rushd (Averroes), historiografi dhe mendimtari Ibn Khaldun dhe poeti dhe filozofi sufi, Ibn Hazm, studionin të gjithë në universitet. Studiuesi mjekësor Ibn Beja, gramatikani Ben Ajrum, orientalisti dhe matematikani holandez, Jacob van Gool dhe udhëheqësi sufi, Muhammad al-Jazuli, si dhe Gerbert i Aurillac (i cili ishte Papa nga viti 999 deri në vitin 1003 pas Krishtit dhe vlerësohet për prezantimin e numrave arabë që përdorim deri më sot në Evropë) besohet gjithashtu se kanë studiuar në Al Quaraouiyine .

    Arsimi falas, kurset e trajnimit dhe cilësia e kurrikulës janë disa nga aspektet e trashëgimisë së al-Fihrit që vazhdojnë ta bëjnë Universitetin e Al Quaraouiyine një destinacion për filozofët, studiuesit dhe intelektualët edhe sot e kësaj dite.

    Universiteti i Al Quaraouiyine vazhdon të kontribuojë dhe pasurojë debate shkencore dhe intelektuale në fushën e gjuhës dhe letërsisë, filozofisë, astronomisë dhe mjekësisë, si dhe ligjin dhe jurisprudencën islame. Universiteti ka kontribuar veçanërisht në shkollën e mendimit Maliki brenda jurisprudencës islame. Për më tepër, në më shumë se një debat historik, studiuesit e Universitetit të Al Quaraouiyine janë gjetur në vijën e parë të debateve politike.

    Gjatë një kohe në të cilën shoqëritë evropiane mesjetare ishin ende në errësirë, një grua muslimane e shekullit të 9-të pati përkushtimin dhe largpamësinë për të ndërtuar një vend unik të të mësuarit dhe përparimit intelektual që i ka qëndruar provës së kohës. Pjesa tjetër e botës ka Fatima al-Fihri, nëna e intelektualëve, për të falënderuar për ndikimin e jashtëzakonshëm dhe të gjerë që universiteti i saj pati në histori.

    Përgatiti: Albert Vataj

  • Ky është universiteti që ndryshoi botën!

    Ky është universiteti që ndryshoi botën!

    Më shumë se 500 vjet përpara se të themelohej Universiteti i Oksfordit, në Universitetin Nalanda të Indisë studionin rreth 10.000 studentë. Në botën e lashtë, konsiderohej një prej qendrave më të mëdha të të mësuarit, por sot gjithçka që ka mbetur janë rrënojat me tulla të kuqe.

    E themeluar në vitin 427 të erës sonë, Nalanda konsiderohet një nga universitetet e para në botë, shtëpia e nëntë milionë librave dhe mijëra studentëve nga e gjithë Azia Lindore dhe Qendrore. Ata ndiqnin degët e mjekësisë, logjikës, matematikës dhe mbi të gjitha parimet budiste nga disa prej studiuesve më të nderuar të epokës.

    Burimi i të gjitha njohurive“Burimi i gjithë njohurive budiste që kemi, ka ardhur nga Nalanda”, është shprehur dikur Dalai Lama për këtë universitet.

    Kurikulat akademike të këtij universiteti u bënë ndikuese dhe përcaktuese për shumëçka, jo vetëm në Indi, por edhe më gjerë. Sistemi i lashtë mjekësor indian, i cili bazohet në metodat e shërimit nëpërmjet natyrës, mësohej gjerësisht në Nalanda dhe më pas u shpërnda në pjesë të tjera të Indisë. Institucione të tjera budiste u frymëzuan nga dizajni i oborreve të hapura të kampusit, nga sallat e lutjeve dhe dhomat e leksioneve. Gjithashtu, një ilaç i prodhuar në këtë universitet u përhap në pak kohë në Tajlandë, ndërsa arti i përpunimit të metalit nisi të zbatohej në Tibet dhe gadishullin Malajan.

    Megjithatë, trashëgimitë më të rëndësishme të Nalandës janë arritjet e saj në matematikë dhe astronomi. Aryabhata, i konsideruar si babai i matematikës indiane, mendohet se ka drejtuar universitetin në shekullin e 6-të të erës sonë.

    “Ne besojmë se Aryabhata ishte i pari që caktoi zeron si një shifër, një koncept revolucionar, i cili thjeshtoi llogaritjet matematikore dhe ndihmoi në evoluimin e rrugëve më komplekse si algjebra dhe llogaritja. Pa zero, ne nuk do të kishim kompjuterë. Ai ishte gjithashtu i pari që ia atribuoi shkëlqimin e hënës dritës së reflektuar të diellit.” Anuradha Mitra, profesoreshë e matematikës

    Universiteti dërgonte rregullisht disa nga studiuesit dhe profesorët e tij më të mirë në vende si Kina, Korea, Japonia, Indonezia dhe Sri Lanka për të përhapur mësimet dhe filozofinë budiste. Ky program i lashtë i shkëmbimit kulturor ndihmoi në përhapjen dhe formësimin e budizmit në të gjithë Azinë.

    Fundi i një traditeMbetjet arkeologjike të Nalandës janë tashmë një vend i Trashëgimisë Botërore të UNESCO-s. Në vitet 1190, universiteti u shkatërrua nga një trupë plaçkitëse pushtuesish të udhëhequr nga gjenerali turko-afgan Bakhtiyar Khilji. Kampusi ishte aq i madh sa zjarri i ndezur nga sulmuesit thuhet se u dogj për tre muaj me radhë. Megjithatë, ky nuk ishte sulmi i parë ndaj Nalandës, pasi ajo u sulmua nga hunët në shekullin e 5-të, dhe përsëri pësoi dëme të rënda nga një pushtim i mbretit të Bengalit, Gauda, në shekullin e 8-të.

    Gjatë 6 shekujve të ardhshëm, Nalanda gradualisht do të zhytej në harresë dhe do të kthehej në rrënoja, përpara se të zbulohej nga topografi skocez Francis Buchanan-Hamilton në vitin 1812, dhe më vonë u identifikua si Universiteti i lashtë Nalanda nga Sir Alexander Cunningham në vitin 1861. Sot, zona e gërmuar prej 23 hektarësh ka të ngjarë të jetë vetëm një pjesë e kampusit origjinal, por gjithsesi kalimi nëpër rrënojat e manastireve dhe tempujve risjell ndjesinë se si duhet të ketë qenë të mësosh në këtë vend fantastik. Për këtë arsye, grupe murgjish, veshur me rroba të kuqe e vizitojnë këtë vend, herë pas here, kryejnë homazhe dhe meditojnë.

  • Universiteti i Oksfordit ka publikuar një hartë që tregon universitetet më të vjetra në botë

    Universiteti i Oksfordit ka publikuar një hartë që tregon universitetet më të vjetra në botë

    Universiteti i Oksfordit ka publikuar një hartë që tregon universitetet më të vjetra në botë:

    1. Universiteti Ez-Zitouna në Tunizi (737)

    2. Universiteti Al-Qarawiyyin në Marok (859)

    3. Universiteti Al-Azhar në Egjipt (972)

    4. Universiteti i Bolonjës në Itali (1088)

    5. Universiteti i Oksfordit në Angli (1096)

    Shënim: Tre universitetet e para dhe më të vjetra në histori ishin në botën arabe/myslimane.

  • Universiteti i Durrësit i vitit 1380, i pari universitet në Ballkan

    Universiteti i Durrësit i vitit 1380, i pari universitet në Ballkan

    Në fillim të viteve ‘90-të, në shtypin ditor të Kosovës si dhe në revistën “Buletini” të Fakultetit Filozofik (1993), kishte parë dritën një studim imi me titullin, “Universiteti i Durrësit” (së bashku me burime e literaturë referente), që ishte rezultat i punës së gjatë hulumtuese jo vetëm në arkiva publike italiane dhe kroate, por edhe në ato kishtare të urdhrit Dominikan, urdhër ky që kishte themeluar Universitetin e Durrësit rreth vitit 1380.

    Jahja Drançolli

    Rezultati është pritur jashtëzakonisht mirë në botë. Këtej, në Kroaci, nga mjetet e Kuvendit të Kroacisë janë ndarë rreth 10 mijë euro që studimi në fjalë, i shoqëruar me rezultate të tjera, të shohin dritën në librin monumental, “Arbërit ndërmjet Perëndimit dhe Lindjes gjatë Mesjetës” (Arbers between West and East during Middle Ages, Zagreb, 2008). Libri është distribuuar kryesisht në librari evropiane. Janë dy arsye pse jam duke e riaktualizuar sërish çështjen në fjalë, tashmë të përqafuar nga pjesa e madhe e shkencës serioze evropiane, e sidomos të asaj kroate e kosovare.

    Arsyeja e parë është se Universiteti i Zarës, kohë më parë, në ueb-faqen universitare (anglisht dhe kroatisht) ka postuar historikun e universitetit, që përputhet plotësisht me rezultatet shkencore të cilat provojnë fuqishëm ekzistimin e Universitetit të Durrësit për të parin e këtij lloji në Ballkan.

    Ky rezultat, tashmë i provuar fuqishëm edhe nga shkenca e historisë kroate, ishte refuzuar nga një pjesë e historiografisë së Shqipërisë politike me prirje mediokre nga medievalistika.

    Fatkeqësisht, në mesin e tyre ka pasur dhe ka emra të shquar, të cilët me ndonjë puthadorë mediokër edhe nga Kosova, jo vetëm që refuzuan botimin e këtij zbulimi në projektin “Historia e Popullit Shqiptar: Ilirët, Mesjeta…” (Akademia e Shkencave e Shqipërisë-Instituti i Historisë, Tiranë: 2002), por e shpallën Universitetin e Durrësit si të paqenë.

    Një fushatë e përafërt është zhvilluar pothuajse në intervale të njëjta me zbulimin e origjinës hasjane të Skënderbeut.

    Fatbardhësisht ky rezultat në vitet e ‘50-ta, pjesërisht qenka provuar edhe nga më i madhi historian shqiptar, Aleks Buda.

    Me rastin e fushatës së zhurmshme, ndonjë prej tyre, autorin (J. Drançolli) e kishte marrë në spikamë në stilin e humorit, “autori i këtij ‘zbulimi’, duke lexuar se durrsakët e kanë besuar ‘zbulimin’ e tij, tani edhe vet siç më kanë thënë beson me të vërtetë se Durrësi ka pasur universitet në shekullin XIV” (Historiografia shqiptare në tranzicion, Tiranë, 2006, f. 73). Mos të flasim për diferencime nga tubimet shkencore, që mbaheshin në Shqipëri (ndonjëherë edhe në Kosovë), vetëm pse Universiteti i Durrësit ishte zbuluar nga një kosovar dhe jo nga ndonjë prej strukturave të mykura të historiografisë enveriste, të cilat trevat shqiptare jashtë Shqipërisë politike i kanë përjashtuar nga versioni më i ri i “Historisë së Popullit Shqiptar” (Tiranë: 2002).

    Mesazhi është i qartë, duhet ditur se çdo gjë nisë dhe mbaron me Shqipërinë politike të djeshme dhe të sotme, dhe në këtë kontekst kthesat më të mëdha janë bërë në Shqipëri vetëm në periudhën komuniste.

    Do të ishte paradoksale për recidivët e djeshëm dhe të sotëm të komunizmit shqiptar, që kishin masakruar, mbytur dhe internuar mijëra intelektualë të klerit (jo vetëm katolik, por edhe mysliman dhe ortodoks), ta pranojnë Universitetin e Durrësit pikërisht si rezultat të këtij kleri nga pjesëtarët e Urdhrit dominikan, që aktualisht në këtë vit kudo në botë është duke shënuar 800-vjetorin e themelimit të urdhrit në fjalë.

    Arsyeja e dytë është që dashamirësit e shkencës dhe kulturës tonë më në fund t’i gëzojmë edhe më ndonjë sihariq, që afirmon vlerat tona shkencore e kulturore gjatë Mesjetës, kulturë kjo që ka reflektuar gjithandej Mesdheut dhe Evropës përgjithësisht. Për të parë zhvillimin historik të Universitetit të Durrësit (rreth vitit 1380), i cili për shkaqe të sulmeve osmane ishte tërhequr në Zarë për të themeluar atje Studium Generale ose Universitetin e Zarës me Rektor të Parë, Gjon Durrësakun (1396), përveç studimit tim që është botuar shumë kohë më parë, duhet shikuar për verifikim ueb-faqen e Universitetit të Zarës, të postuar në anglisht dhe kroatisht.

    Nga e gjithë ajo që u tha më sipër, e quaj me vend ta përkujtoj fjalinë e famshme të shkencëtarit më të madh të epokës së Humanizmit dhe të Rilindjes, Galile Galileo. “Eppur si muove” (Megjithatë, lëvizë)./ ObserverKult

    Lexo edhe:

    AI QË KËRKON TË PËRFITOJË DIÇKA NGA DASHURIA, NUK ËSHTË I DASHURUAR, ËSHTË TREGTAR

  • Projekti UNIVALENS, për të realizuar një model bashkëpunimi ndërkufitar për universitetet

    Projekti UNIVALENS, për të realizuar një model bashkëpunimi ndërkufitar për universitetet

    Universiteti i Arteve të Tiranës mori pjesë në një nismë rajonale ndërkufitare për “Tejkalimin e kufizimeve në njohjen dhe ekuivalentimin e Programeve të Arsimit të Lartë Ndërkufitar” me akronimin UNIVALENS, mbështetur nga Programi Interreg IPA CBC – South Adriatic duke përfshirë Shqipërinë, Italinë dhe Malin e Zi. UA mori pjesë në këtë nismë në një hark kohor prej 18 muajsh, 1 shkurt 2024 – 31 korrik 2025. Sipas njoftimit, projekti UNIVALENS u strukturua me qëllimin:
    a) për të identifikuar dhe kapërcyer pengesat proceduriale (administrative dhe ligjore) për të zbatuar Programe të përbashkëta të Arsimit të Lartë, të vlefshme e të njohura në të tre vendet e përfshira;
    b) për të realizuar praktikisht një model bashkëpunimi ndërkufitar për universitetet, ku partnerët të mund të testojnë e të zhvillojnë sëbashku një program të Arsimit të Lartë të nivelit Master, në fushën e Arteve të Performuara. “Për sa më sipër, u ngrit një partneritet mes Universitetit të Arteve Tiranë – Shqipëri, Universiteti i studimeve “Aldo Moro” Bari dhe Puglia Culture (ish Teatro Pubblico Pugliese) – Itali dhe Universiteti i Malit të Zi, Podgoricë, Mal i Zi, ku Universiteti i Arteve u caktua të jetë partneri lider i projektit”, thuhet në njoftim.
    Organizatorët ndërtuan skemën e ndërhyrjes me anë të disa tipeve të aktiviteteve të përbashkëta si Seminare, Misionet e vizitave studimore, Workshope dhe Plan Veprimi të Përbashkët, të cilët u artikuluan në mënyrë të balancuar në të tre shtetet ndërkufitare të projektit UNIVALENS, duke filluar nga 7 mars 2024 e deri në eventin përfundimtar, më 21 korrik 2025, i cili u përmbyll edhe me një marrëveshje mes partnerëve të projektit, të firmosur nga tre rektorët e Universiteteve partnere, Prof. Stefano Bronzini, Prof. Dr. Erald Bakalli dhe Prof. Dr. Vladimir Bozovic dhe Presidentit të Puglia Culture, Prof. Paolo Ponzio, si edhe një koncert, ku u luajt Trio Nr. 1 Op. 49 në re minore e Mendelssohn nga Marija Djuranovic (violinë – Mal i Zi), Pjetër Guralumi (violonçel – Shqipëri) dhe Mariacristina Buono (Piano – Itali) si një provë reale e mundësive të shtuara për artistët e të tre shteteve, në një kontekst të ofertave të reja ndërkufitare në fushën e menaxhimit artistik dhe aftësimit të të rinjve të Adriatikut Jugor për të qenë në gjendje të krijojnë produkte artistike, që t’u përgjigjen edhe nevojave të bashkëpunimit artistik.

  • Studentët ndërtojnë një dron hibrid që mund të fluturojë, të zhytet në ujë dhe të ngrihet përsëri në ajër

    Studentët ndërtojnë një dron hibrid që mund të fluturojë, të zhytet në ujë dhe të ngrihet përsëri në ajër

    Një ekip studentësh të elektronikës industriale të aplikuar nga Universiteti i Aalborgut në Danimarkë përdorën një printer 3D për të prodhuar dhe më pas për të testuar një dron hibrid që mund të fluturojë, të zhytet në ujë, të manovrojë nën sipërfaqe dhe pastaj të kthehet në ajër, të gjitha në një sekuencë të vetme pa ndërprerje.

    Prototipi u krijua për një punim diplome dhe demonstron kalime të shpejta nga ajri në ujë, gjë që madje i habiti krijuesit e tij.

    Pjesa më e rëndësishme e performancës së dronit është sistemi i helikës së ndryshueshme, fletët e të cilit rrotullohen në kënde të ndryshme në ujë dhe ajër.

    Pjerrësia e fletëve është më e madhe në ajër për të krijuar rrjedhje ajri, ndërsa në ujë është më e vogël për të zvogëluar rezistencën dhe për të rritur efikasitetin.

    Këto helika gjithashtu mund të krijojnë shtytje negative për manovrim më të saktë nënujor.

    Pamjet tregojnë mjetin duke u ngritur nga një pishinë e madhe, duke u zhytur, duke “notuar” shkurtimisht dhe pastaj duke u kthyer vertikalisht në ajër, duke përsëritur rutinën disa herë, të treguar nga kënde të ndryshme kamerash.

    Ndryshe, dronët hibridë nuk janë krejtësisht të rinj.

    Një raport i Live Science thotë se studiuesit nga Universiteti Rutgers prezantuan një prototip të ngjashëm ajër-ujë në vitin 2015, dhe shkencëtarët kinezë demonstruan një manovër të ngjashme tranzicioni në vitin 2023.

    Ajo që e dallon projektin e studentëve të Aalborg është butësia e tranzicionit midis dy mjediseve të kapura në një kornizë të vazhdueshme dhe të arritur me një zgjidhje të thjeshtë të bazuar në helikë në vend të rikonfigurimeve mekanike më komplekse.

  • DOKUMENTI – Para nisjes së vitit të ri akademik, në Universitetin “Luigj Gurakuqi” miratohet masteri shkencor…

    DOKUMENTI – Para nisjes së vitit të ri akademik, në Universitetin “Luigj Gurakuqi” miratohet masteri shkencor…

    Ndërsa për pak ditë, nisin regjistrimet për vitin e ri akademik, Universiteti i Shkodrës “Luigj Gurakuqi”, ka marrë një lajm të mirë. Ministria e Arsimit ka miratuar hapjen e një tjetër cikli studimesh “Master shkencor”.
    Sipas shkresës zyrtare të Ministrisë së Arsimit të siguruar nga ShkodraWeb, bëhet fjalë për një cikël studimi të nivelit të dytë, me 120 kredite dhe me kohëzgjatje dyvjeçare, “Infermieri Klinike”.
    Është një cikël studimesh i nivelit të dytë, i cili nuk ekziston as në UMT, i cili do ti shtojë vlera të reja jo vetëm degës përkatëse në UNISHK, por edhe vetë këtij universiteti. Ka qenë një nga premtimet publike të rektorit Tonin Gjuraj, i cili tashmë e ka kthyer në realitet.

    Shënim: Disa imazhe gjenden nga interneti, që konsiderohen të jenë në domenin publik. Nëse dikush pretendon pronësinë, ne do të citojmë autorin, ose, sipas kërkesës, do të heqim menjëherë imazhin! Bashkohu me kanalin e SHKODRAWEB në Whatsapp, mjafton të klikoni Kontaktoni për lajmet më të fundit direkt në celularin tënd.
    Ju mirëpresim!

  • Rama “shkund” universitetet: S’ka më 17 shefa! Do ndryshojmë financimet, bëhuni si UBT!

    Rama “shkund” universitetet: S’ka më 17 shefa! Do ndryshojmë financimet, bëhuni si UBT!

    Edi Rama

    TIRANË- Kryeministri Edi Rama ka folur për universitet në eventin që po mbahej për partneritetin me rëndësi UBT-BOKU. Në fjalën e tij, Rama nuk hezitoi apo kurseu kritikat ndaj universiteteve të tjera, duke ua bërë të qartë se rruga që duhet ndjekur është njëjtë si kjo e UBT-së, pra për të lidhur partneritete me “simotrat” e huaja. Kreu i qeverisë theksoi se universiteti ka kaluar në dy faza, ajo e viteve më parë, ku ishte baza kryesore e dijes, dhe më pas rrënimi i tij.
    “Universitetet nuk mund të jenë më si gjimnaze! Do trajtojmë çështjen e shumë kokave brenda një universiteti, zgjidhen shefa, e të gjithë thonë unë kam vizionin tim. Nuk mund të ketë 17 koka me 17 drejtime të ndryshme që duan të mbajnë atë kioskën e tyre. Ky duhet të jetë rregull për të gjithë. Juristë ka plot Shqipëria, por profesionistë për të gjitha këto tema që janë temat më të nxehta të botës, e që do bëhen përvëluese, nuk ka mjaftueshëm! Ata pak që janë, janë pedagogë në UBT. Kështu që secili që do trokasë në derën e këtij universiteti, do bëhet pjesë e asaj kategorie, që do të jetë më e nevojshmja e shoqërisë. Do i keni dyert e hapura në privat, shtet, në Shqipëri e Austri. Në rastin më të mirë do përfundosh sekser gjykatash!,”- tha kreu i qeverisë.
    Kryeministri Edi Rama ka paralajmëruar universitetet në vend, se nëse nuk do të veprojnë njëlloj si Universiteti Bujqësor i Tiranës nuk do të marrin asnjë mbështetje ekstra nga qeveria. Duke shtuar se po planifikon të ndryshojë qasjen financiare të qeverisë për universitetet.
    “Të gjitha Universitetet e Shqipërisë duhet ta kenë shumë të qartë sepse e kanë shembullin, sepse nëse duan mbështetje ekstra, duhet të bëjnë atë që po bën Universiteti Bujqësor i Tiranës (UBT-së), të gjejnë shokun apo shoqen në Evropë, të dorëzojnë letrat e fejesës që ne t’i mbështesim për martesë. Historirat që jo kemi një program këtu, jo atë aty, mund t’i bëjnë, janë autonomë, por nuk kanë mbështetje nga qeveria. Qeveria do ta ndryshojë komplet qasjen financiare dhe për sa kohë nuk do të ketë një të dytë, çfarë janë ekstra ne do ti investojmë në UBT. Do ta bëjmë UBT një rrezatim për gjithë rajonin. Do ta fusim padiskutim në listën e Universiteteve të Evropës për këto tema dhe do t’i japim Shqipërisë një burim të jashtëzakonshëm dije,”- deklaroi Rama këtë të martë, më 22 korrik, në aktivitetin për Universitetin Bujqësor të Tiranës.
    Ndërkohë ditën e djeshme, Rama paralajmëroi edhe një ndryshim në ligjin për arsimin./ZËRI