Pas marrjes si të pandehur të numrit dy të qeverisë Belinda Balluku, në Tiranë ndjehet një tronditje që po përhapet deri në zyrën e kryeministrit. Robert Papa paralajmëron se struktura e pushtetit të Edi Ramës po shembet gur më gur, ndërsa kreu i ekzekutivit përpiqet të gjejë shpëtim te lidhjet me familjen Soros. Sipas tij, Rama është futur në një spirale frike ku përplasen FBI, SPAK dhe interesat ndërkombëtare që po përgatisin dosjet e fundit për kryeministrin. “Rënia gravitacionale” e qeverisë, siç e quan Papa, tashmë ka nisur dhe çdo përpjekje për t’u afruar me djalin e Sorosit apo për të blerë ftesa në Shtëpinë e Bardhë, është shenjë e dëshpërimit politik të një njeriu që e di fundin e afërt.
Ja çfarë thotë Robert Papa
“Donald Trump nuk është përqendruar aspak te Ballkani, natyrisht edhe me Shqipërinë. A do të vijë koha që çështja shqiptare të shkojë te tryeza e Donit të madh? Nuk e di. Por, orvatja e dy senatorëve për të futur si amendament në një ligj të financimit të Pentagonit, duke thënë ndër të tjera se jemi kundër shkëmbimit të trojeve midis Serbisë dhe Kosovës, është diçka pozitive. Por kjo nuk është asgjë në krahasim me platformën e Jesse Helms-it të madh, i cili i kërkonte haptazi në vitet ’80 Presidentit: “Nuk ka zgjidhje në Ballkan, në qoftë se nuk bashkohet Kosova me Shqipërinë”, por me një Shqipëri jokomuniste. Interesat amerikane në Ballkan shkojnë tej interesave të Presidentit Trump. Qendrat e pushtetit në Washington nuk do të donin kurrë që në ujërat e ngrohta të Adriatikut të hyjë “ariu rus”.
Ndaj, kjo na jep shpresë, por kjo nuk ndalon askënd që të kërkojë Bashkimin Kombëtar. Edi Rama, edhe pse ka kohë të gjatë në pushtet, fatkeqësisht nuk ka bërë asnjë veprim pro-shqiptar në këtë aspekt. Shpesh veprimet me dashje/pa dashje, nga paaftësia, nga mungesa e logjikës, të dikujt që ka studiuar të paktën një vit matematikë në shkollë, shfaqet. Ka një paralele me kryeministrin e majtë, Fan Noli, i cili, siç thonë të dërguarit amerikanë të kohës, ngeli nëpër botë dhe nuk bëri detyrën e tij. Rama kërcen në Angli, në Arabi Saudite, në Francë, jep mend për paqen botërore. Nuk ka asnjë përvojë, nuk ka asnjë njohuri. Dhe flet për një realitet surreal shqiptar, me Djellza dhe 83 “kopilët e saj”.
Kur të gjithë e dinë që këtu në Shqipëri, në Tiranë, nuk ka 24 orë ujë. Janë të frikshme kullat që po ndërtohen, të shëmtuara. Ato tregojnë qartazi një korrupsion. Por, mësoj këtu që projektet e afruara për kulla gjigande nga Rama nuk po pranohen nga oligarkët. Nuk ka më treg; askush nuk blen çmimet skandaloze për një vend të pazhvilluar. Ajo që më bën përshtypje këtu në Tiranë është pluhuri dhe ndotja e madhe. Mos harroni, të gjithë jetojnë në këtë ndotje: edhe ata që vjedhin miliona, edhe ata që fitojnë me djersë, edhe ata që janë në pension. Pse ka vdekur shpirti i protestës?
Telashet për qeverinë
Protestat duhet të jenë masive. Pas marrjes si e pandehur të numrit të dytë të qeverisë, qeveria duhet të jepte dorëheqje. Rama ende nuk e kupton që është në rënie gravitacionale. A do të mundet për gjashtë muaj ta ngërthejë mediokrin Kushnerit (dhëndrit të Trump) duke i dhënë edhe Porto Palermon? Çdo gjë do të jepte për të blerë një ftesë në Shtëpinë e Bardhë—një ftesë të munguar, ftesë të blerë. Nuk besoj, dhe këtë e di me siguri, që kush do të guxonte të bënte një kërkesë të tillë te Trump. Do ta pësonte si vëllai i Ramës, Vuçiç, të cilin e mashtruan me para të mëdha, e thirrën deri në Mar-a-Lago dhe e dëbuan si qen të Ballkanit. Ku e gjen guximin i sëmuri i Europës Juglindore që të shkojë nëpër forume dhe të ketë një falënderim ndaj tij prej djalit të Sorosit, Alex Soros? Alex Soros është një nga figurat më të vështira në politikën amerikane: antiamerikan, anti-tradicionalist dhe është në grackën e FBI-së me gjashtë gjyqe potenciale ndaj tij dhe ndaj familjes Soros.
Ndërhyrja e FBI dhe SPAK
FBI ka përfaqësuesit e saj në çdo ambasadë, edhe në Tiranë. Natyrisht që objektivi kryesor i diplomacisë amerikane, përfaqësuar nga Rubio, është të çojë përpara tezat e Trumpit. Rubio e shikon çdo gjë në lidhje me interesat amerikane dhe sa ndikojnë kundër tyre qeveritë si kjo e Ramës. Rubio, duke përcjellë urdhërat e Trump, është kundër narkotrafikut dhe narkoshteteve. Më duhet ta theksoj edhe njëherë se media këtu e shitur, fatkeqësisht shumica, nuk i kanë dhënë hapësirë asaj që Ëashington Examiner shkruan: ‘Edi Rama si Noriega apo Erdogan’. Kjo tregon që këto janë kambana alarmi dhe Rama e kupton. Ti mund të shkosh në Arabi Saudite, ti mund të shkosh në Paris me Macron-in, që s’ka 7% të votave, mund të shkosh në Angli.
Zotëri, në qoftë se ke humbur lidhjet me Amerikën, aleatin tonë strategjik, partnerin më të madh, është e kotë të qëndrosh te zyra e Mehmet Shehut, zyrë të cilën e ke ngjyrosur me pikturat e tua, nga mbrojtja e temës me parullat për Enverin e dikurshëm. Nuk ka rëndësi se sa rritet ajo zyrë kur votat janë të vjedhura dhe kur nuk ke afruar asnjë sistem ekonomik. Kur vazhdon të mbash me arrogancë, kur ke shkatërruar Partinë Socialiste si parti moderne të majtë, e ke kthyer me ushtarë servilë. Dhe ku si intelektual paraqet Ballën, Peleshin e Spiropalin. Ke dështuar, zotëri. Ti mund të rrish edhe gjashtë muaj, mund të rrish edhe një vit, por kriza ekonomike do të ulet në gjunjë. Sidomos pas kafshimit që SPAK po bën, sipas udhëzimeve që vijnë pas vizitës së Dumanit. Dumani mund të ikë nga kreu i SPAK-ut, por prokurori thjesht do të vazhdojë, dhe në Shqipëri prokurorët e SPAK-ut kanë të drejtë të arrestojnë gjithkënd”, shprehet Robert Papa.
