Pamje nga një lavazh postuar nga kryeministri
TIRANË- Kryeministri Edi Rama ka paralajmëruar lavazhet që ushtrojnë aktivitetin në mënyrë të paligjshme brenda zonave të banuara, mes lagjeve dhe nëpër trotuara. Përmes një video-je në rrjetet sociale, kreu i qeverisë bën thirrje për të gjithë pronarët e këtyre bizneseve që t’i heqin vetë që të mos paguajnë edhe gjobën e krimit mjedisor.
“Asnjë lavazh nuk do të qëndrojë mes lagjeve për të larë makinat nëpër trotuare apo nëpër platforma betoni ku duhet të jetë lulishtja e lagjes, prandaj kush i ka t’i heqë vetë që të mos paguajë edhe gjobën e krimit mjedisor”, shkruan Rama në postimin e tij.
Aksioni i lirimit të hapësirave publike ka nisur pothuajse në të gjithë vendin me urdhër të kryeministrit Edi Rama. Fenomeni “tokë e xanun”, sipas Ramës, nuk do të ekzistojnë më. Lidhur me këtë, ai ka bërë thirrje për të gjitha bizneset apo individët të cilët kanë zaptuar padrejtësisht hapësirat publike, t’i lirojnë menjëherë. Sakaq, kryeministri ka paralajmëruar se do të përballen me ligjin kushdo që e kundërshton aksionin./ZËRI
