Sociologia Entela Binjaku ishte e ftuar në edicionin e pasdites në Syri TV, teksa foli mbi ngjarjen e fundit në Maliq, ku një 14-vjeçar i mori jetën me thikë bashkëmoshatarit të tij, theksoi se ngjarjet e kronikës së zezë ku përfshihen të miturit nuk kanë munguar, dhe shpesh shfaqen histori edhe më të dhimbshme se më parë.
“Gjithmonë gjendemi njëlloj të tronditur, njëlloj të papërgatitur,” u shpreh Binjaku.
Sociologia shtoi se shpesh flitet vetëm për pasojat e këtyre ngjarjeve, të cilat janë të pakthyeshme dhe tragjike, ndërsa pak përqendrohemi në mënyrë serioze në shkaqet që çojnë në këto tragjedi.
Ajo kujtoi se Shqipëria ka nënshkruar shumë konventa dhe dokumenta ndërkombëtare që garantojnë impenjimin e shtetit për mbrojtjen e të miturve, por rastet e tilla tregojnë se dështimet janë të shumta: humbja e jetës së një fëmije, përfshirja e një tjetër në ligj, familje të shkatërruara e pasojat e tjera tragjike.
Binjaku theksoi se krimi dhe ngjarjet tragjike mund të ndodhin kudo, dhe të miturit shpesh bëhen protagonistë të këtyre ngjarjeve, për aq kohë sa ndihen të lënë jashtë vëmendjes së të rriturve përgjegjës. Ajo shtoi se elementët që duhet të mbrojnë të miturit shpesh nuk funksionojnë ose janë të pamjaftueshëm për të përballuar këto situata.
Binjaku:
Ngjarjet nga kronika e zezë ku në qendër janë të miturit nuk kanë munguar për fat të keq, kur mendojmë se kemi parë të keqen vjen një histori tjetër edhe më e dhimbshme se e para, dhe gjithmonë gjendemi njëlloj të tronditur, njëlloj të papërgatitur.
Për fat të keq ne flasim kryesisht për pasojat e këtyre ngjarjeve që janë të pakthyeshme, tragjike, me jetë të marra apo jetë të humbura dhe fare pak përqendrohemi në mënyrë të përgjegjshme, në mënyrë serioze dhe të vijueshme për ato që janë shkaqet që çojnë në këto pasoja.
Vetë fakti se Shqipëria ka nënshkruar mjaft konventa, mjaft dokumenta ndërkombëtar të rëndësishëm që garantojnë impenjimin e shtetit tonë në drejtim të jetës së të miturve tregojnë të gjitha se bashku se në një rast të tillë ku një fëmijë ka humbur jetën, por edhe një i mitur tjetër që tani do të jetë objekt i ligjit, familje të shkatërruara e me radhë, të gjitha këto në një fare mënyre janë një dështim i plotë i të gjitha këtyre hallkave.
Mendoj që historia fatkeqe e 24 orëve të fundit tregon që krimi ndodh kudo, të miturit kudo në Republikën e Shqipërisë mund të bëhen protagonistë të ngjarjeve të kronikës së zezë dhe të ngjarjeve tragjike, për aq kohë sa ndihen si të lënë jashtë vëmendjes, duket dikur rriten si pa kuptuar dhe pa qenë vërtetë nën tutelën edukative të të rriturve që kanë përgjegjësi të drejtëpërdrejtë për ta, për aq kohë sa janë të mitur.
Ne nuk është se na mungojnë elementet, por këta ose nuk funksionojnë ose janë të pamjaftueshëm ose nuk janë seriozë për angazhimin që kanë marrë përsipër.
