edi rama dhe belinda balluku
TIRANË- Gjatë prezantimit të reformës në sektorin e ujit, kryeministri Edi Rama foli në lidhje me protestat që janë bërë nga banorët e zonave të Tragjasit dhe Shushicës, për të cilët tha se janë keqinformuar në lidhje me përdorimin e këtyre burimeve. Rama tha se burimet ujore nuk janë të banorëve që i kanë më pranë, por të gjithë qytetarëve, dhe është qeveria ajo që vendos në lidhje me shpërndarjen e tyre, duke lënë të kuptohet vijimin e projekteve.
“Të gjithë do ta kuptojnë që burimet ujore të Republikës së Shqipërisë, nuk janë burimet e atij që i ka më afër, janë burimet ujore të Republikës së Shqipërisë. Në Republikën e Shqipërisë nuk ka njerëz me fat që e kanë ujin afër dhe njerëz pafat që kanë burimin larg. Siç ua kam shpjeguar shumë banorëve të Tragjasit, as nuk diskutohet që nuk ekziston në asnjë botë tjetër, veçse në botën e konspiracioneve dhe fantazive politike, mediatike, apo rreth tryezës duke pirë raki, që qeveria e Shqipërisë, ministria, t’i marrin ujin disave për t’ia dhënë disave”, tha Rama.
Sa i takon artikujve të bëra në media dhe për zonën e Shushicës, se projekti i ujësjellësit të Himarës, do të thajë një degë të lumit Vjosa, Rama tha se projekti është i drejtë, dhe jo në shërbim të oligarkëve.
“Ata që çohen dhe flasin, janë dhe ca që flasin anglisht për Vjosën, dhe se si ne po thajmë një burim të Shushicës për të shuar etjen e popullit tonë dhe se si ne po thajmë një degë të lumit për të furnizuar me ujë të pijshëm banorët e Himarës. Ata s’kanë për ta kuptuar, se marrin fonde për këtë punë, por duhet ta dinë që prioriteti është furnizimi me ujë i popullsisë. Në ekuilibrin më të mirë të mundshëm me natyrën, as në rastin e Shushicës, as Tragjasit nuk bëhet fjalë për investime të papërgjegjshme për të tharë.
Duke respektuar njerëzit atje, 9 muaj, ditë për ditë, kemi bërë të gjithë raportin e monitorimit të burimit, shifrat janë kaq kokëforta dhe kuptim plota, sa s’kanë diskutim që projekti ishte i drejtë, jo se ishte projekt që financohej nga qeveria, por i bërë mbi monitorimin e burimit. Nuk ka qeveria qëllime të errëta, nuk ua heqim uji njerëz të për t’ua dhënë oligarkëve. Oligarkë në Shqipëri nuk ka, nuk bën vaki kjo”, tha Rama, ndërsa shtoi se asnjë ‘kuçedër’ nuk mund të thajë burimet.
“Sot po ndërtohet ujësjellësi i Tragjasit. Nuk kishte ujë e bërtisnin për burimin a thua se vajti një kuçedër që tu thante burimin ku e pinin uji nga burimi”, vijoi kryeministri. /ZËRI
