Tag: telefoni

Elmas Bogdani
Mjaftoi zbërthimi i një iPhone 5 që kishte përdorur vite me parë Monika Kryemadhi për të zbuluar qindra mesazhe të shkëmbyera mes saj dhe dhjetëra personave të tjerë, përfshirë dhe zyrtarë të lartë institucionesh apo biznesmenë që mbushën me prova dosjen e SPAK për të fundosur deputeten dhe ish-presidentin Ilir Meta, i cili prej disa muajsh ndodhet në burg me urdhër të Prokurorisë së Posaçme. Ka qenë vetë Kryemadhi që ka zbuluar të pathënat në intervistën e saj të fundit për mediat për aksionet e SPAK te shtëpia e saj në Kodër të Diellit. “Janë 6 telefona që maja ime i kishte të garderopa e saj. Ishte një kuti me shumë telefona të vjetër të saj që i kishte mbajtur. Mblidhte gjërat e vjetra. Ishin Iphone 5, të viteve 2013 dhe 2014 dhe të fëmijëve.
Njëri nga ata është telefoni im. Një telefon që e kam ndërruar dhe e lashë atje. Telefonat e tjerë janë të fëmijëve dhe të mamasë sime. Telefoni i famshëm që flitet është në periudhën 2013 deri në dhjetor 2014. Ne ishim në koalicion me PS. Komunikimi më i madh është me Ramën. Çdo gjë ishte e ligjshme. Metën e vunë në pozitë të vështirë, duke krijuar fantazira të ndryshme. “Zemra ime”, ishte i regjistruar numri i telefonit të Metës. Telefoni u hap, fashikujt u panë, mesazhet i lexuam. Nuk ka asgjë. Flet për ndërhyrjet e mia kirurgjikale dhe të fëmijës. Telefoni është një pretekst. Metën do e fusnin në burg me apo pa telefonin. Do gjenin një bluze dhe do thoshin aty ka pasur shenja gishtash.
Në Gjykatën e Apelit, mesazhet që nxori prokuroria për fibrën optike, minierat, etj., vetë tha që janë të ligjshme. Ishte një sebep për të krijuar një veprim të tillë me rrëmbimin që i bënë Metës tregon dhe shkakun”, tha ndër të tjera Kryemadhi. Kujtojmë se hetimet e nisura në vitin 2019 u finalizuan nga Prokuroria e Posaçme me arrestimin e Metës dhe ngritjen e akuzave zyrtare për veprat penale “Korrupsion pasiv i zyrtarëve të lartë shtetëror dhe të zgjedhurve vendorë”, “Pastrim i produkteve të veprës penale dhe veprimtarisë kriminale”, “Refuzim për deklarim, mosdeklarim, fshehje ose deklarim i rremë i pasurive”.
Meta vazhdon fushatën nga burgu
Por edhe me gjithë këto akuza të rënda, ndryshe nga Kryemadhi që u tërhoq nga politika, Ilir Meta vazhdon fushatën nga qelia, ku ndodhet prej tetorit të vitit të kaluar me shpresën e fitores së opozitës që pas 11 majit të shkrihet SPAK dhe të shpëtojë nga burgu. Meta u shpreh dje se me 11 Maj, shqiptarët do të duhet të votojnë për të larguar Edi Ramën, të cilin e cilëson si “kryetaksa” e tyre, pasi në vitet e qeverisjes së tij, ka pasur vetëm për qëlllim grabitjen e tyre. Sipas tij, me programin e tyre elektoral, ata synojnë që të ndërtojnë një Shqipëri me fuqi prodhuese dhe eksportuese në rajon. Duke votuar më 11 Maj për programin ekonomik “Made in Albania” të Shqipërisë Madhështore, shqiptarët do të votojnë për uljen e taksave dhe ndërtimin e një Shqipërie fuqi prodhuese dhe eksportuese në rajon.
Duke votuar më 11 maj për Shqipërinë Madhështore, shqiptarët në këtë mënyrë do të votojnë për rritjen e të ardhurave të familjeve të tyre, si dhe për rritjen masive të punësimit të mirëpaguar. Ky program do të realizohet në mënyrë të padiskutueshme duke: Ulur numrin e shkallëve të ndryshme tatimore. Vendoset taksa e sheshtë 10% mbi kapitalin, mbi të ardhurat nga puna, me përjashtim të 50 mijë lekëve të para nuk do tatohen. Taksa e sheshtë 10% mbi të ardhurat jo nga paga.Zero taksim për profesionet e lira dhe biznesin e vogël.Tavani vjetor për tatim fitimin zero për biznesin e vogël. Kufiri i përjashtimit nga TVSH do jetë 18 milion lekë xhiro vjetore. TVSH do ulet në 15%. Taksa e ndikimit në infrastrukturës do të ulet nga 8 përqind e çmimit të shitjes në 2% të preventivit. Taksa 3% e strehimit social mbi çmimin e shitjes do të shfuqizohet. Tarifa 1% e lejes së zhvillimit mbi vlerën e investimit do të shfuqizohet. Tarifa e rivlerësimit të pronës do ulet nga 5% në 1%. Akciza për birrën do jetë me dy fasho: 600 lekë hektolitri për prodhuesit mbi 200 mijë hektolitra në vit dhe 300 lekë hektolitri për prodhuesit nën 200 mijë hektolitra në vit.
Çmimi i pullave fiskale nga 17 euro për 1 mijë pulla do ulet në 3 euro për 1 mijë pulla. Çmimi i pullave fiskale për verën do ulet nga 25 euro për 1 mijë pulla në 3 euro për 1 mijë pulla. Për verën, do të unifikohet akciza e lidhur me gradacionin e alkoolit. Akciza do të lidhet me prodhues të mëdhenj dhe të vegjël. Energjia elektrike për biznesin nga 18-24 lekë që është sot, do shitet në 6 lekë. Taksa e shitjes së pronës ulet nga 15% në 2%. Taksa e karburantit hiqet dhe në të gjitha pikat e shitjes së karburantit nuk mund të shitet karburant me ndryshim çmim plus/minus 10% me pompat e vendeve fqinje. Çdo shqiptar që vjen për të investuar në Shqipëri do të jetë 5 vite pa taksa kudo që të investojë, ndërsa për investimet në zonat malore 8 vite pa taksa. Do krijohet bordi që do monitorojë dhe kompensojë dëmet e krijuara nga lëkundjet e kursit të narko-euros. Për të rinjtë nën 30 vjeç, zero sigurime shoqërore dhe shëndetësore për 12 muajt e parë të punësimit.
Përjashtim nga tatimi mbi të ardhurat deri në moshën 25 vjeç. Stimuj fiskalë dhe mbështetje financiare për investitorët nën moshën 35 vjeç që duan të investojnë në startup-e dhe inovacion. Për zonjat dhe gratë, zero tatim fitimi për vitin e parë të biznesit. Subvencionim i sigurimeve shëndetësore dhe shoqërore për 4 muajt e parë, me kushtin që gjysma e të punësuarve të jenë femra dhe të rinj. Programi ekonomik “Made in Albania” i Shqipërisë Madhështore, ul ndjeshëm koston e jetesës dhe çliron ekonominë familjare dhe kombëtare”, tha ndër të tjera Meta.