Tag: tares

Adriatik BALLA
Shqiptarët janë gati tani jo vetëm të luajnë në top-ligat e mëdha europiane, por edhe të marrin rol drejtuesi. Mes tyre spikat Igli Tare ë ka qenë për shumë vite drejtor sportiv i Lacios dhe po bën përpjekje të kthehet sërish në Itali, këtë herë në krye të Milanit. Kështu, Milani vazhdon kërkimin për drejtorin e ri sportiv dhe, me afrimin e verës, emri i Igli Tares del gjithnjë e më shumë në plan të parë. Sipas “La Gazzetta dello Sport”, pas një takimi të gjatë që u zhvillua disa ditë më parë në Romë me CEO-n kuqezi, Xhorxhio Furlani, janë zhvilluar edhe kontakte të tjera mes palëve dhe një takim i dytë duket tashmë në horizont. Klubi kuqezi dëshiron të reflektojë me kujdes për këtë vendim të rëndësishëm, por koha nuk premton.
Vendimi përfundimtar pritet të merret brenda gjysmës së parë të muajit maj, në mënyrë që të ketë kohë të mjaftueshme për të ndërtuar skuadrën e sezonit të ardhshëm. Në takimin e radhës mes Furlanit dhe Tares pritet të vijojë diskutimi pozitiv i nisur në Romë. Aty mund të vijë edhe vendimi final: ose zyrtarizimi i Tares si drejtor sportiv, ose mbyllja përfundimtare e kësaj piste. Ndërkohë, në sfond kanë nisur të qarkullojnë edhe emrat e parë për përforcime të mundshme.
Me Taren në krye të merkatos, një nga përforcimet e para mund të vijë nga Bundesliga. Bëhet fjalë për Jonathan Burkardt, sulmues i ri gjerman i Mainzit, që këtë sezon ka spikatur me 16 gola dhe 3 asistime, duke tërhequr vëmendjen edhe të kombëtares gjermane. Milan ka hyrë në një fazë vendimtare të projektit të tij të ri dhe zgjedhja e drejtuesit sportiv do të jetë hapi kyç për ndërtimin e një skuadre konkurruese për sezonin e ardhshëm.
Vedat Muriqi i dëshiruar te Majorka, klubi spanjoll mendon rinovimin
Drejtori sportiv i Majorkës, Pablo Ortells ka dhënë një intervistë për “Marcan”, ku ndër të tjerash ka folur për situatën e Vedat Muriqi te klubi ishullor. Ai ka thënë se sulmuesi kosovar është një lojtar i rëndësishëm për klubin dhe do të ishin të kënaqur nëse ai do të vazhdonte. “Muriqi ka rënë në këmbë që kur mbërriti në ishull. Ai është një lojtar i rëndësishëm dhe është një shenjë e mirë që dëshiron të vazhdojë me ne. Do të ishim të kënaqur të vazhdojmë ta kemi me ne. Ai ka një kontratë në fuqi dhe kur të vijë momenti, shpresojmë që palët të arrijnë një marrëveshje dhe ai të mund të vazhdojë te Majorka”, tha ai për “Marca”.
Tutje, ai u pyet edhe për Cyle Larin e Abdon Prats, por e përmendi edhe Muriqin në këtë mes, duke bërë me dije se gjatë verës gjithçka mund të ndodhë. “Të gjithë tregjet janë të pasigurt dhe nuk mund të parashikojmë të ardhmen. Të tre ata kanë kontratë dhe në këtë aspekt jemi të qetë. Nuk përjashtohet asgjë. I kemi me ne dhe verën do të shohim se çfarë do të ndodhi”, shtoi ai. Sulmuesi dardan ka kontratë me Majorkën deri në vitin 2027, derisa Majorka i ishte bashkuar më 2022 nga Lacio, në mënyrë permanente. Gjatë karrierës së tij, Muriqi ka luajtur edhe për Fenerbahçen, Rizersporin, Genclerbirligi e Giresunspor në Turqi. Në Shqipëri, Muriqi ishte aktivizuar me Teutën e Besën, derisa aty ishte shkuar pasi kishte luajtur në Kosovë te Liria. Muriqi është golashënuesi më i mirë i kombëtares së Kosovës, duke shënuar 31 gola deri më tani në të gjitha garat.