Adriatik BALLA
Lajmet e këqija duket se po ua lënë vendin lajmeve të mira, e kjo merr vlerë për sulmuesin kuqezi, Armando Broja, i cili rezultoi krejt i pafat në duelin me Anglinë në “Arena Kombëtare” e Tiranës dy ditë më parë. Në fakt, Armando Broja edhe në ditët e tij jo të mira, për të mos thënë më të këqija të karrierës, është një personazh që mbetet në qendër të vëmendjes. Në këtë përballje me Anglinë, ai ishte pika e diskutimit edhe për gazetarët anglezë duke qenë një lojtar i Premier League. Sulmuesi i Bërnli u aktivizua vetëm në minutën e 75-të në ndeshjen ndaj 3 Luanëve ku në ato minuta që u aktivizua, u duk shumë i motivuar, për të bërë një figurë të mirë. Por me sa duket gjendja e tij psikologjike, për momentin, nuk është më e mira dhe është ajo që ndoshta po i kthehet në pengesë. Si për të konfirmuar momentin e keq të tij, Broja nuk arrin as ta mbyllë ndeshjen, pëson një dëmtim që e nxjerr nga fusha me barelë dhe me ankthin se cili do të ishte problemi i tij i ri fizik. “Top Channel” ka mësuar se për fatin e mirë, nuk do të ketë asgjë për t’u shqetësuar, pasi kontrollet e mëtejshme ndaj tij konfirmojnë për një ndrydhje të kaviljes, që do ta mbajë atë vetëm pak ditë jashtë fushe. Po sipas këtyre burimeve, bëhet fjalë për një dëmtim që rikuperohet brenda 4-5 ditësh. Kështu që, Broja do të mund të jetë në dispozicion të trajnerit të Bërnlit shumë shpejt për të vazhduar sezonin normalisht.
Mirlind Daku gjithnjë e më pak në fushë
Në përfaqësuesen kuqezi një nga lojtarët që ka humbur disi terren është dhe sulmuesi Mirlind Daku, i cili nuk ka qenë kurrë titullar me Shqipërinë në këto eliminatore, ku ka luajtur në 4 ndeshje duke qëndruar vetëm pak minuta në fushë. Në total, 59 minuta të cilat të shpërndara në 4 sfida, e shohin atë shumë larg asaj që mund të cilësohet aktivizim i rregullt apo efikas. Me pak fjalë, roli i tyre në Shqipërinë e Silvinjos është ndjeshëm i reduktuar dhe fakti që të dy mbetën në stol në sfidat vendimtare të nëntorit, jep një sinjal të qartë se trajneri ka ndryshuar këndvështrimin ndaj tyre gjatë këtyre viti
Shanset që Shqipëria të përballet me Italinë vetëm në ndeshjen e dytë të marsit
Italia ka mbyllur fazën e grupeve të kualifikimeve për Kupën e Botës 2026 dhe tashmë është në pritje të shortit të “play-off”-it, i cili do të hidhet, më 20 nëntor. Pavarësisht humbjes 4-1 ndaj Norvegjisë në ndeshjen e fundit, azzurrët e kanë siguruar vendin në fazën eliminatore dhe do të jenë në grupin e ekipeve të renditura më lart. Në gjysmëfinale, Italia do të luajë në shtëpi kundër njërit prej këtyre kundërshtarëve: Suedisë, Rumanisë, Irlandës së Veriut ose Maqedonisë së Veriut. Ndeshja zhvillohet, më 26 mars 2026. Fokusi kryesor për tifozët shqiptarë është mundësia që në finalen e “play-off”-it, Italia të përballet me Shqipërinë. Kuqezinjtë janë në listën e kundërshtarëve potencialë të finales së 31 marsit, së bashku me: Uellsin, Skocinë, Sllovakinë, Republikën Çeke, Irlandën, Bosnjë e Hercegovinën dhe Kosovën. Nëse të dyja kombëtaret kalojnë gjysmëfinalet, përballja Itali–Shqipëri mund të vendosë njërin prej vendeve evropiane në Kupën e Botës 2026.
Euro-2026/ Kombëtarja U17 mundet nga moshatarët e Kazakistanit
Kombëtarja U-17 luajti sot ndeshjen e tretë dhe të fundit në raundin e parë të kualifikueseve të Kampionatit Europian 2026 ndaj Kazakistanit. Takimi i zhvilluar në “SRP Trate Nedelishe”, në Nedelishe, u fitua nga Kazakistani U-17 me rezultatin 2-1. Trajneri Fatjon Tafaj e nisi ndeshjen me këtë formacion titullar: Simon Lleshi (GK), Kostantinos Varesi (C), Xhoel Mezani, Denis Pierro, Petro Marku, Dion Vata, Kledi Qosja, Matias Allasufi, Armend Muslika, Frensi Mali, Sokol Uldedaj. Kazakistani U-17 zhbllokoi rezultatin në minutën e 21-të me sulmuesin Çernomorets. Pjesa e parë u mbyll 1-0. Në fraksionin e dytë, Kazakistani U-17 gjeti sërish rrjetën në minutën e 58-të me Zhilkaidar, duke e çuar rezultatin në 2-0. Pavarësisht rezultatit, në pjesën më të madhe të ndeshjes Kombëtarja U-17 ishte në kontroll të lojës dhe krijoi disa mundësi të mira. Nga minuta e 76-të, Shqipëria mbeti me 10 lojtarë pas daljes me të kuq të sulmuesit Himallari. Kuqezinjtë nuk u dorëzuan dhe në fund të takimit në kohën shtesë shënuan gol me Armend Muslikën, megjithatë asgjë nuk ndryshoi dhe ndeshja u mbyll me fitoren 2-1 të Kazakistanit U-17.
Basketboll/ Liga Unike nis sot, 8 skuadra në garë për trofeun
Liga Unike e meshkujve nis sezonin e ri, duke vijuar misionin e saj për të bashkuar basketbollin e Kosovës dhe Shqipërisë në një garë të strukturuar gjithnjë e më konkurrente. 8 skuadra, 4 nga secili vend, do të garojnë në edicionin 2025/26. Janë dy grupe. Dy më të mirat nga secili grup sigurojnë vendin në Final 4, ku përcaktohet kampioni. Ekipet pjesëmarrëse janë Bora, Vëllaznimi, Golden Eagle dhe GO Peja nga Kosova, si dhe Apollonia, Teuta, Besëlidhja dhe Vllaznia nga Shqipëria.
Sulmuesi/ Asani ka humbur besimin e Silvinjos, tani ngroh stolin
Jasir Asani po kalon moment të vështirë në Kombëtare. Ai ftohet, por nuk i jepen minuta. Në fakt, sulmuesi i krahut Asani e nisi edicionin kualifikues të Botërorit si titullar, për t’u zëvendësuar në minutën e 78 të ndeshjes së parë ndaj Anglisë në “Uembli”. Që atëherë, trajneri duket se ka humbur besimin te futbollisti duke mos i rezervuar më asnjë minutë në kualifikuese anësorit i cili me golat e tij ishte një emrat kryesorë që çuan Shqipërinë drejt finaleve të Euro 2024.
Superiore/ Elbasani synon ta mundë sërish Dinamon
Superiorja do të kthehet në fundjavë me duelet e xhiros së 12-të. Elbasani shkon drejt sfidës me Dinamon me qetësi, vetëbesim dhe një grup të plotë e të motivuar. Një fitore do të konsolidonte kreun dhe do të vazhdonte një seri historike për verdheblutë, një shans që skuadra e di mirë se nuk duhet ta lërë të ikë. Në kampin verdheblu mbizotëron optimizëm. Katër fitoret radhazi kanë ndryshuar krejtësisht moralin dhe psikologjinë e ekipit. Elbasanasit këtë sezon synojnë Europën.
