Adriatik BALLA
Lojtarët e Kombëtares po shfrytëzojnë ditët e merkatos për të arritur qëllimet e tyre në treg dhe një prej atyre që synojnë një lëvizje të bujshme është dhe portieri Etrit Berisha, i cili luan me Haken në Suedi, por ka sinjale të qarta nga klubet italiane dhe nuk përjashtohet mundësia e një kthimi në Serie A ose Serie B italiane brenda kësaj vere. Nga ana tjetër, një pjesë e lojtarëve kuqezinj e nisën edicionin e ri e mesfushori Julian Shehu bëri një start spektakolar në Poloni, duke shënuar një gol me vlera për skuadrën e tij Vidzev Lodz. Lojtarë të tjerë kuqezinj janë në pritje të mësojnë emrin e ekipit të ri, por ka dhe të tjerë që kanë rinovuar dhe po përpiqen të kapin ritmin e duhur për të qenë protagonistë në sezonin e ri.
Portieri/ Berisha drejt kthimit në Itali
Lajme të mira vijnë për një tjetër lojtar të përfaqësueses tonë, megjithëse ai bëri kohë që nuk grumbullohet në përfaqësuese, pasi trajneri Silvinjo ka preferuar Strakoshën dhe portierët e rinj në listën e tij të ftesave. Haken eliminoi Spartak Trnavën në turin e parë të Ligës së Europës. Në fokus u kthye e ardhmja e Etrit Berishës, që po bën mjaft mirë te suedezët. Portieri shqiptar ka zbuluar më parë klauzolën, që e lejon të largohet nga Haken këtë verë. Për më të tepër, që për Berishën ka interes nga Italia. “Asgjë nuk është e sigurt ende, do të shohim çfarë ndodh. Siç thashë, kemi filluar të flasim, kemi edhe pak kohë deri në fund të korrikut dhe pastaj do të shohim. Ka pasur disa kontakte në Itali, por është agjenti im që merret. Për mua është e rëndësishme të përqendrohem këtu dhe atë që ndodh në të ardhmen do ta shohim”. Në anën tjetër, drejtori Martin Erikson, ka shprehur dëshirën për të zgjatur më tepër kontratën që përfundon në fundin e këtij viti. “Ne do të dëshironim shumë që ai të qëndronte më gjatë sesa deri në fund të sezonit. Kemi pasur bisedime me të për këtë”, u shpreh drejtori Erikson së fundmi.
Julian Shehu start spektakolar në Poloni
Julian Shehu ka startuar sezonin 2025/26 në mënyrën më të mirë të mundshme me Vidzev Lodz në Ekstraklasa, elita e futbollit polak. Mesfushori shqiptar realizoi një gol spektakolar në minutën e 40-të të sfidës kundër Zaglebie Lubin, takim i vlefshëm për javën e parë të kampionatit. Me një gjuajtje të fuqishme dhe të saktë nga jashtë zone, Shehu dërgoi topin në trekëndëshin e portës, duke ndezur entuziazmin në “Stadion Widzewa”. 26-vjeçari u bë kështu lojtari i parë që shënon për Vidzev në këtë sezon të ri, duke dhënë sinjalet se do të jetë një element kyç për skuadrën. Festimi i tij nuk kaloi pa u vënë re! Shehu zgjodhi të tregojë krenarinë për origjinën, duke bërë simbolin e shqiponjës dykrenare me duar, mes brohoritjeve të tifozëve në stadium. Pjesë e formacionit titullar në këtë sfidë ishte edhe Lindon Selahi, një tjetër shqiptar që i është bashkuar Vidzev Lodz gjatë merkatos së verës, pas transferimit nga kampionët e Kroacisë, HNK Rijeka. Një fillim premtues për dyshen shqiptare në Poloni, që pritet të japin kontribut të rëndësishëm në ambiciet e klubit për sezonin e ri.
