Miratimi i ligjit për ‘barazinë gjinore’, i cili përfshin konceptin e ‘gjinisë së shumëfishtë’, ka ndezur debate të ashpra politike, ku në qendër është pyetja nëse ky akt normativ është një detyrim që buron nga procesi i integrimit të Shqipërisë në Bashkimin Europian.
Ndonëse mazhoranca argumenton se ligji është një hap i rëndësishëm në përafrimin me legjislacionin europian, duke iu referuar edhe reagimeve nga Komisioni Europian, opozita e hedh poshtë kategorikisht këtë pretendim.
I ftuar në një intervistë në Syri TV, me Armela Ferkon, deputeti i Partisë Demokratike dhe njëherësh Kryetari i Komisionit parlamentar të Shëndetësisë, Bardh Spahia, u shpreh se ky ligj nuk ka absolutisht asnjë lidhje me procesin e integrimit. Për të mbështetur argumentin e tij, Spahia solli fakte konkrete, duke theksuar se 21 nga vendet anëtare të Bashkimit Europian nuk kanë një legjislacion të tillë.
“Mjafton të përmendim faktin që janë 21 vende të Bashkimit Europian që nuk e kanë këtë ligj”, u shpreh ai. Spahia shkoi më tej duke përmendur shembuj si Sllovenia dhe Hungaria, të cilat, sipas tij, kanë ndërmarrë hapa legjislativë në drejtimin e kundërt, duke njohur ligjërisht vetëm dy gjini.
Sipas deputetit Spahia, procesi i integrimit rregullohet përmes direktivave të BE-së, të cilat ai pretendon se janë studiuar me vëmendje. Ai sqaroi se dokumentet europiane për barazinë gjinore përdorin nocione të qarta si “barazia midis grave dhe burrave” (Equality between women and men) dhe “barazi gjinore” (Gender equality), por gjithmonë në kuptimin binar, pra duke iu referuar burrit dhe gruas.
Në kontrast, ligji i ri i miratuar në Kuvendin e Shqipërisë përdor terma të reja si “përkatësi e shumëfishtë”, i cili përsëritet 25 herë në tekst, dhe “gjini gjithëpërfshirëse”. Spahia i cilësoi këto terma si “ideologjike, majtiste dhe pjesë të një kulture Woke”, duke argumentuar se ato nuk janë pjesë e kuadrit ligjor të BE-së, por pjesë e një axhende që synon “transformimin e shoqërive”.
Bardh Spahia: Absolutisht jo. Përkundrazi, ne e kemi theksuar vazhdimisht gjatë gjithë kësaj periudhe të shqyrtimit të këtij projektligji, që tanimë u kthye që mbrëmë në ligj, faktin që nuk ka asnjë lidhje me procesin e integrimit në Bashkimin Europian për Shqipërinë. Mjafton të përmendim faktin që janë 21 vende të Bashkimit Europian që nuk e kanë këtë ligj. Të rikujtojmë për qytetarët edhe faktin që shtete si Sllovenia apo Hungaria së fundmi ëh, kanë bërë të kundërtën e këtij ligji. Janë shprehur qartazi për njohjen e vetëm dy gjinive, për të treguar që nuk ka aspak lidhje me procesin e integrimit europian dhe nuk është kusht. Pasi proceset e integrimit europian rregullohen kryesisht nëpërmjet direktivave që Bashkimi Europian lëshon. Dhe ne i kemi studiuar me vëmendje direktivat e Bashkimit Europian për barazinë gjinore. Ne i kemi nxjerrë madje, i kemi evidentuar. Në këto direktiva përdoren vetëm tre nocione. Dhe konkretisht, ‘Equality between women and men’, pra barazia midis grave dhe burrave. ‘Gender equality’, barazi gjinore në kuptimin binar: burrë dhe grua. ‘Equal treatment in employment, occupation and pay’. Pra, trajtimi i barabartë në punë, profesion dhe paga. Dhe gjithmonë i referohet qartazi kuptimit binar, pra të njohjes së vetëm dy gjinive: burrë dhe grua. Në asnjë prej këtyre direktivave të Bashkimit Europian nuk përdoren termat që përdoren në ligjin aktual shqiptar, ku kryesoret janë, përkatësi, termat përkatësi e dyfishtë, e cila përsëritet 25 herë pothuaj në çdo nen të ligjit. Gjini gjithëpërfshirëse dhe variantet e saj, të cilat përsëriten rreth 10 herë në këtë ligj. Apo burrat dhe gratë në gjithë diversitetin e tyre dhe ky term përsëritet rreth 10 herë në të gjitha nenet e këtij ligji. Janë të gjitha terma ideologjik, majtist, të një kulture Woke, axhende Woke, e cila për hir të së vërtetës synon transformimin e shoqërive. Ne jemi njohur me këto axhenda që herët, ku patën një sponsorizim të fuqishëm nga Soros dhe shoqëritë e tij, por që aktualisht në të gjithë botën dhe veçanërisht në Amerikë po marrin një goditje të jashtëzakonshme.
