Presidenti amerikan Donald Trump, para nisjes së tij për në Skoci, ka komentuar mbi çështjet tregtare, duke shprehur një optimizëm të kujdesshëm për një marrëveshje me Bashkimin Evropian, por një qëndrim më të ashpër ndaj Kanadasë. Ndërkohë, Presidentja e Komisionit Evropian, Ursula von der Leyen, ka konfirmuar një takim të afërt me Trump në Skoci, duke sinjalizuar përpjekje diplomatike për të menaxhuar tensionet.
Donald Trump u shpreh para gazetarëve se shanset për një marrëveshje tregtare me BE-në për çështjen e tarifave janë “50-50”. Megjithatë, ai sqaroi se SHBA-të mund të mos arrijnë një marrëveshje tregtare me Kanadanë, duke sugjeruar se administrata e tij mund të vendosë në mënyrë të njëanshme një normë tarifore. Presidenti njoftoi gjithashtu se letra të mëtejshme mbi tarifat do të dërgohen sot, duke përsëritur se afati i fundit mbetet 1 gushti. “Nuk ka shumë hapësirë për manovrim në lidhje me çelikun dhe aluminin,” specifikoi ai në lidhje me detyrimet mbi këto dy metale.
Takimi Trump-Von der Leyen dhe kundërtarifat e BE-së
Ursula von der Leyen njoftoi përmes platformës X se ajo dhe Donald Trump do të zhvillojnë një takim dypalësh në Skoci të dielën.
“Pas një telefonate të mirë me Trump, ramë dakord të takohemi në Skoci për të diskutuar marrëdhëniet tregtare transatlantike dhe si t’i mbajmë ato të forta,” shkroi von der Leyen. Ky takim pritet të jetë një mundësi kyçe për të ulur tensionet dhe për të eksploruar rrugët drejt një zgjidhjeje.
Ndërkohë, BE-ja ka miratuar një listë kundërtarifash që do të hyjnë në fuqi në faza, nga 7 gushti deri më 7 shkurt 2026. Rregullorja zbatuese përcakton se kundërmasat e miratuara në përgjigje të tarifave të SHBA-së mbi çelikun dhe aluminin do të zbatohen më 7 gusht. Megjithatë, për tarifat mbi sojën dhe bajamet, ato do të hyjnë në fuqi më 1 dhjetor.
Detyrimet e parashikuara nga masat shtesë të miratuara më 24 korrik do të hyjnë në fuqi në dy faza, varësisht nga produkti. Për shumicën e produkteve, detyrimet do të vendosen duke filluar nga 7 shtatori, për t’u dhënë autoriteteve doganore kohë të mjaftueshme për t’u përgatitur. Për mallrat e mbetura (të lidhura me sektorin industrial), detyrimet do të vendosen duke filluar nga 7 shkurti 2026. Kjo shtyrje synon t’i japë industrisë së BE-së kohë për të përshtatur zinxhirët e tyre të furnizimit, duke marrë parasysh natyrën e ndjeshme të mallrave të prekura.
Përshtypjet e Trump për normat e interesit të Fed-it
Në lidhje me politikën monetare, Presidenti Trump tha se dje pati një takim të mirë me Kryetarin e Rezervës Federale, Jerome Powell, dhe se kishte përshtypjen se Powell “mund të ulë normat e interesit”. Kjo deklaratë vjen në një kohë kur tregjet po monitorojnë nga afër veprimet e Rezervës Federale dhe ndikimin e tyre në ekonominë globale.
Tag: skoci
-
Tensione tregtare SHBA-BE, Trump optimist për bllokun evropian, por jo për Kanadanë
-
Trump nuk do të luajë golf i qetë, valë e madhe protestash pritet në Skoci kundër Presidentit amerikan gjatë pushimeve të tij
Një valë protestash pritet të shpërthejë këtë fundjavë në Skoci, ndërsa qytetarët nga Ayrshire deri në Aberdeenshire janë mobilizuar për të kundërshtuar atë që ata e quajnë “radikalizimin gjithnjë e më të theksuar” të politikave të Presidentit amerikan Donald Trump.
Ai pritet të mbërrijë të premten në Skoci për një vizitë pesëditore private në resortet e tij luksoze të golfit në Turnberry dhe Menie.
Edhe pse nuk është një vizitë zyrtare shtetërore, kryeministri britanik Keir Starmer do të zhvillojë një takim me Trump të hënën në Skoci.
Nuk është parashikuar një konferencë për shtyp, por gazetarët do të lejohen të ndjekin fillimin e takimit – një moment që mund të sjellë një tjetër dalje spontane nga Trump përpara mediave, siç ka ndodhur më parë.
Policia e Skocisë ka bërë të ditur se nuk pritet ndonjë incident i madh apo trazira nga protestat, megjithatë është paralajmëruar për një ngarkesë të madhe mbi forcat e rendit.
Sipas Federatës së Policisë së Skocisë, operacioni i sigurisë do të shtrijë kapacitetet në maksimum, duke dyfishuar kohën e reagimit ndaj ngjarjeve të tjera në territor.
Koalicioni “Stop Trump” ka njoftuar organizimin e dy protestave të mëdha të shtunën në mesditë: një në qendër të qytetit Aberdeen dhe një tjetër përpara konsullatës amerikane në Edinburgh. Gjatë vizitës së fundit të Trump në Skoci në vitin 2018, protesta të ngjashme mblodhën mijëra qytetarë.
Organizatorët e protestave shprehen se zemërimi ndaj Presidentit amerikan në Skoci është thelluar. “Që në vizitën e tij të parë si president, shumica dërrmuese e skocezëve ishin kundër gjithçkaje që Trump përfaqësonte. Sot, që kemi parë më shumë nga mënyra e tij e qeverisjes, kjo ndjenjë është forcuar edhe më tepër,” tha Connor Dylan, organizator në Aberdeen dhe Edinburgh.
Vizita ndodh në një moment politik delikat, kur shumë prej ideve që dikur konsideroheshin margjinale në politikën amerikane, po përhapen dhe gjejnë jehonë edhe në Europë përmes aleatëve të ekstremit të djathtë. Me përplasjet që ndjekin kudo që shkon, Trump nuk pritet të kalojë pa zhurmë as këtë herë në tokën skoceze.Top Channel