Adriatik BALLA
Mbrëmë u luajtën dy ndeshje të rëndësishme për fatet e sezonit. Në fillim, në orën 18:00, Tirana dhe Pogradeci u përplasën në “Elbasan Arena” për një vend në elitë, duel që u fitua nga bardheblutë 1-0 pas një 90-minutëshi plot ankth për kryeqytetasit, sigurimi i elitës për të cilët erdhi nga një autogol i kundërshtarit. Kurse ndeshja tjetër emocionuese e mbrëmjes ishte ajo e luajtur në stadiumin “Arena Kombëtare” në kryeqytet, midis Vllaznisë dhe Dinamos, në kuadër të gjysmëfinales së “Final Four”, formulë që u jep shansin katër skuadrave të renditura në vendet e para të fitojnë titullin kampion. Këtë duel e fitoi Vllaznia me shifrat 2-1. Në duelin e mbrëmshëm në fillim shënoi Dinamo, por golin e anuloi gjyqtari Hamiti pasi u konsultua me VAR. Tensioni ishte dukshëm i madh në të dy kampet, por Vllaznia u shfaq më këmbëngulëse.
Në minutën e 29-të, pas një goditje këndi, Mandela prek sferën me dorë në zonë e bluve. Hamiti nuk ka dyshime dhe bën shenjë nga pika e bardhë për penallti. Nga pika e bardhë e 11-metërshit Balaj nuk fal dhe dërgon topin në rrjetë. 1-0 për Vllazninë. 6 minuta më vonë, Vllaznia fiton një tjetër penallti. E sërish është Dinamo që e shkakton. Këtë herë është Meksi me dorën e hapur në zonë. Hamiti heziton, por pasi sheh pamjet me VAR bën shenjë nga pika e bardhë! Është sërish Balaj që nuk fal dhe tund rrjetën për herë të dytë, duke e çuar rezultatin në 2-0. Me këtë rezultat mbyllet pjesa e parë. Por në fillim të pjesës së dytë, saktësisht në minutën e 51-të, Dinamo e ngushton rezultatin, me gol të shënuar nga Mandela. Pas këtij goli Dinamo merr epërsi psikologjike dhe zotëron fushën, duke ndërtuar aksione të shumta sulmuese për të barazuar shifrat. Tensioni në fushë është evident dhe gjyqtari Hamiti ndëshkon disa lojtarë nga të dy kampet me karton të verdhë, një pjesë edhe për protesta ndaj trupës së arbitrave. Edhe pse Dinamo këmbënguli deri në fund, nuk ia doli të barazojë. Vllaznia fiton 2-1 dhe siguron finalen e “Final Four”, ku do të presë fituesin e ndeshjes Egnatia-Partizani që luhet sot në orën 20:00, po në stadiumin kombëtar në Tiranë.
Tirana siguron mbijetesën në Superiroe
Tirana mundi Pogradecin 1-0 në finale e “play-out”-it për qëndrimin në Superligë. Në fakt, bardheblutë ishin dukshëm favoritë për suksesin ndaj skuadrës së Kategorisë së Parë, por liqenorët në fraksionin e parë të lojës vunë disa herë në vështirësi portën e Selmanit. Ndërsa kryeqytetasit krijuan më shumë e në fund panë edhe t’i anulohej një gol. Në fraksionin e dytë të lojës, në fushë ishte praktikisht vetëm Tirana, e cila krijoi volum loje përballë Pogradecit të tërhequr në mbrojtje, në pritje të ndonjë kundërsulmi. Trysnia e bardhebluve dha frytet e saj vetëm në minutën e fundit, kur një gjuajtje e Zharmunit u devijua në portën e vet nga Hysenallari, duke i dorëzuar Tiranës fitoren minimale që i mundësoi qëndrimin në elitë edhe në edicionin e ardhshëm. Por kjo ecuri e dobët sezonale e bardhebluve kërkon analizë të thellë e të gjerë, për të parë shkaqet pse skuadra arriti deri në këtë pikë, jo vetëm duke mkos qenë në garë për trofe, por rreziikoi seriozisht të binte nga kategoria e të regjistronte një trp për klubin 105 vjeçar.
