Tag: shkarkua

6 vjet pasi i shkarkua nga KQZ, si i prekur nga ligji i dekriminalizimit, Agim Kajmaku, ish kryetar i bashkisë Vorë, ka fituar në betejë financiare me institucionet që i “prenë ëndrrën”.
Më 4 prill 2025, gjykata administrative e Tiranës ka vendosur që të quajë të padrejtë vendimin e KQZ-së dhe të dëmshpërblejë Kajmakun.Kështu Bashkia e Vorës dhe Këshilli i Qarkut Tiranë detyrohen të paguajnë Kajmakun me të gjitha pagat e një mandati të plotë, 4 vjeçar, edhe pse ai ushtroi vetëm 3 muaj të tij.
Nga ana tjetër, KQZ detyrohet të paguajë Kajmakun, gruan dhe djalin e tij për dëmin moral që ju ka shkaktuar. Përafërsisht 15 mijë euro për ish kryetarin dhe nga 7 mijë euro për gruan dhe të birin e tij.
Si KQZ, ashtu edhe bashkia Vorë kanë nxituar menjëherë t’a ankimojnë këtë vendim në Apel.Si iku Agim Kajmaku?
Komisioni Qendror i Zgjedhjeve vendosi më 1 nëntor 2019 të shkarkojë nga detyra kreun e Bashkisë së Vorës, Agim Kajmaku, vetëm 3 muaj pasi kishte marrë detyrën.
Prokuroria e Përgjithshme vërtetoi se Agim Kajmaku, gjatë kohës që jetonte në Greqi kishte përdorur emrin Jorgo Toto, i cili rezultonte i arrestuar në shtetin fqinj për falsifikim parash. Këtë fakt Kajmaku nuk e kishte pasqyruar në formularin e dekriminalizimit kur kandidoi për Bashkinë Vorë dhe e kishte mohuar deri në momentin që prokuroria verifikoi shenjat e gishtave.
Asokohe, përmes një postimi në Twitter, Rama tha:
“KQZ ka provuar sot përsëri, se është një institucion i shtetit shqiptar që mbron ligjin dhe interesin publik, jo vegla e vjetër e partive siç ishte deri dje? Po ashtu Partia Socialiste ka riprovuar sot, se s’bëhet strehë e askujt që merr përsipër të shkelë ligjin e besimin tonë”.