Tag: sharjah

Adriatik BALLA
Lojtarët e përfaqësueses tonë kanë një shtrirje shumë të gjerë në kampionatet europiane,m por vitet e fundit ka pasur tendenca në rritje edhe në kampionatet aziatike, sidomos në ligat ku klubet paguajnë shuma të majme parash, sikurse bën superliga saudite. Madje, vendet arabe dhe të gjirit Persik japin shuma të konsiderueshme financiare dhe ky trend i transferimeve të lojtarëve shqiptarë atje sa vjen e rritet. Atje përfundoi këtë sezon edhe sulmuesi Rei Manaj, si duket për të mbushur mirë xhepat në këtë moment të karrierës së tij. Ndërkohë, sulmuesi Rei Manaj ka shënuar dy gola në Ligën e Kampionëve të Azisë për skuadrën nga Emiratet e Bashkuara Arabe, Al-Sharjah. Al-Sharjahu në kuadër të raundit të parë të Championsit aziatik e mposhti Al-Gharafan e Katarit me rezultatin 4:3. Manaj e ngushtoi rezultatin në 2:1 në minutën e 60-të. Ai fillimisht nuk u tregua i saktë nga pika e bardhë por konkretizoi nga topi i kthyer. Në minutën e 91-të reprezentuesi i Shqipërisë e barazoi rezultatin në 3:3. 28-vjeçari shënoi supergol nga goditja e dënimit. Manaj tek Al-Sharjahu u transferua në afatin kalimtar të verës nga Sivaspori turk për dy milionë euro.
Golat e Manajt dhe loja e Feta Fetait
Siç e cekëm më lart, fillimisht Manaj mori përsipër penalltinë në minutën e 60-të. Dhe nuk e gjuajti aspak mirë, ndërsa portieri rival e kuptoi krahun duke shpëtuar nga goli direkt. Manaj ishte me fat, pasi topi u kthye më pas pikërisht tek ai. 28-vjeçari nuk fali duke dërguar topin në rrjetë për të rihapur sfidën me rezultatin 2-1. Dhe Kamara që është shok skuadre me Manajn vendosi baraspeshën në shtëpi. Hoselu, fitues i Champions-it me Realin, nga penalltia riktheu Al Gharafan në avantazh. Megjithatë, Al Sharjah nuk ishte dorëzuar ndërsa dhe Feta Fetai po luante. Manaj mrekullisht vendosi baraspeshën nga goditja e dënimit, kur kronometrohej minuta e 91-të. Ky moment i dha zemër Al Sharjah, për përmbysjen e çmendur 4 me 3 ndaj Al Gharafa.
UEFA konfirmon se ndeshja Serbi-Shqipëri do të luhet në Leskovc
Shtëpia e futbollit evropian, UEFA ka konfirmuar se ndeshja Serbi – Shqipëri nuk do të luhet në Beograd, por në një lokacion tjetër. UEFA e ka miratuar kërkesën e Serbisë, që ndeshja me Shqipërinë të zhvendoset nga “Rajko Mitic” në Leskovc, në stadiumin “Gradski stadion Dubocica”. Kjo kërkesë e Serbisë vjen si pasojë e ‘urdhërave’ të presidentit të vendit, Aleksandar Vuçiç, sipas raportimeve nga Serbia. Kjo kërkesë e Vuçiçit erdhi pasi në ndeshjen e kaluar ndaj Anglisë në Beograd, kishte thirrje kundër tij, dhe për t’i ‘qetësuar’ kundërshtarët e tij, ai vendosi për një stadium më të vogël. Stadiumi në Leskovc ka vetëm tetë mijë ulëse, në krahasim me stadiumin “Rajko Mitic” që ka pothuajse 40 mijë. Ndeshja Serbi – Shqipëri do të luhet më 11 tetor, me ndeshjen që i përket kualifikuesve për Botërorin e vitit 2026. Ndeshja e parë mes këtyre dy kombëtareve në këtë grup kualifikues përfundoi 0-0 në “Air Albania” gjatë muajit qershor. Shqipëria është në vendin e dytë momentalisht me tetë pikë të grumbulluara pas pesë ndeshjeve. E para është Anglia me 15 pikë nga pesë ndeshje. Ndërsa, Serbia është e treta me shtatë pikë, por me një ndeshje më pak.