Tag: seferi

Andi Seferi, nënkryetari i bashkisë së Tiranës, i cili është i pezulluar përkohësisht për shkak se kandidon për deputet në listën e hapur të PS për Tiranën thotë se “fokusi dhe qëllimi është maksimizimi i votës”.
I ftuar në emisionin “Kjo Javë” në News24, ai thotë se mes socialistëve “nuk ka luftë brenda llojit”.
Ai u shpreh se mandati i katër do të definojë shumë përpjekje dhe shumë politika që fokusohen në hyrjen në BE.
“Kërkohet një fitore maksimale në këtë mandat, sepse marrja e kohës do të ishte stopim i procesit të integrimit.
E qena 10 vjet nënkryetar i bashkisë së Tiranës nuk më lejon të bëj shumë premtime. E vetmja gjë që mund të them është se Andi që ka qenë këto 10 vjet, Andi do të jetë përsëri. Ky është i vetmi premtim.
Duhet të themi që është normale që në çdo lloj gare, qoftë edhe jo politike të ketë një energji të shtuar midis personave që marrin pjesë. Nuk ekziston kjo lloj lufte negative midis nesh.
Është humane që gjithsecili të ketë atë ndjesinë e garës brenda përbrenda. Ndjesi që rehabilitohet kur shkon në atë fokus të qytetarëve. Pra 37 individët që janë në listë përfaqësojnë 37 realitete të ndryshme. Gjithkush ka atë fokusin e vet dhe kjo është qëllimi, maksimizimi i votës socialiste. Askush nuk e ka fokusin me kolegun e listës, por maksimizimi i votës, përfshirja e shtresës gri, kalimi i kufirit madje pse jo edhe tek krahu i djathtë. Aq më tepër që më shumë kuptoj që qytetarët përveç forcës politik mbështesin edhe individin”, tha Seferi.
Sa i takon arrestimit të Erion Veliajt, Andi Seferi thotë se puna vazhdon, qytetarët i marrin shërbimet, por thekson se mungon kapiteni i Tiranës.
“Të jesh në një skuadër prej 10 vjetësh, patjetër që na mungon. Urojmë që edhe drejtësia të bëjë punën e saj, për ezaurimin e këtyre fakteve që pretendojnë. Unë nuk kam pasur asnjë komunikim”, tha Seferi.